காயம் காரணமாக பாதியிலேயே வெளியேறிய நசீம் ஷா; பாகிஸ்தானுக்கு பெரும் பின்னடைவு!

பாகிஸ்தான் அணி ஆஸ்திரேலியாவில் சுற்றுப்பயணம் மேற்கொண்டு 3 ஒருநாள் மற்றும் 3 டி20 போட்டிகள் கொண்ட தொடர்களில் விளையாடி வருகிறது. இதில் இரு அணிகளுக்கும் இடையேயான ஒருநாள் தொடரானது இன்று தொடங்கிய நிலையில், இரு அணிகளுக்கும் இடையேயான முதல் ஒருநாள் போட்டி மெல்போர்னில் இன்று நடைபெற்றது.

இப்போட்டிய டாஸை இழந்து முதலில் பேட்டிங் செய்த பாகிஸ்தான் அணி 46.4 ஓவர்களில் 203 ரன்களுக்கு ஆட்டமிழந்தது. அந்த அணியில் அதிகபட்சமாக கேப்டன் முகமது ரிஸ்வான் 2 பவுண்டரி, ஒரு சிக்ஸர் என 44 ரன்களையும்,  இறுதிவரை போராடிய நசீம் ஷா அதிகபட்சமாக ஒரு பவுண்டரி, 4 சிக்ஸர்கள் என 40 ரன்களையும் எடுத்தனர். ஆஸ்திரேலியா தரப்பில் மிட்செல் ஸ்டார்க் 3 விக்கெட்டுகளையும், கேப்டன் பாட் கம்மின்ஸ் மற்றும் ஆடம் ஸாம்பா தலா 2 விக்கெட்டுகளையும் கைப்பற்றினர்.

அதன்பின் 204 ரன்கள் எடுத்தால் வெற்றி என்ற இலக்கை நோக்கி ஆஸ்திரேலிய அணி களமிறங்கியது. அதன்படி களமிறங்கிய அந்த அணியில் மேத்யூ ஷார்ட் ஒரு ரன்னிலும், ஜேக் ஃபிரேசர் மெக்குர்க் 16 ரன்களிலும் விக்கெட்டை இழந்தனர். அதான்பின் களமிறங்கிய ஸ்டீவ் ஸ்மித் 44 ரன்களிலும், ஜோஷ் இங்லிஷ் 49 ரன்களிலும் ஆட்டமிழக்க, பின்னர் களமிறங்கிய  லபுஷாக்னே, ஆரோன் ஹார்டி, கிளென் மேக்ஸ்வெல், சீன் அபோட் உளிட்டோரும் சொற்ப ரன்களில் விக்கெட்டை இழந்தனர்.

இதனால் ஆஸ்திரேலிய அணி 8 விக்கெட்டுகளை இழந்து தடுமாறிய நிலையில், அணியி கேப்டன் பாட் கம்மின்ஸ் பொறுப்புடன் விளையாடி 32 ரன்களைச் சேர்த்து அணியை வெற்றிக்கு அழைத்துச் சென்றார். இதன்மூலம் ஆஸ்திரேலிய அணி 33.3 ஓவர்களில் இலக்கை எட்டி 2 விக்கெட்டுகள் வித்தியாசத்தில் பாகிஸ்தானை வீழ்த்தியது. இந்த வெற்றியின் மூலம் 3 போட்டிகள் கொண்ட ஒருநாள் தொடரில் ஆஸ்திரேலிய அணி 1-0 என்ற கணக்கில் முன்னிலை பெற்றுள்ளது.

இந்நிலையில் இப்போட்டியின் போது பாகிஸ்தான் அணியானது மிகப்பெரும் பின்னடைவை சந்தித்துள்ளது. அதன்படி அந்த அணியின் வேகப்பந்து வீச்சாளர் நசீம் ஷா காயம் காரணமாக பாதியிலேயே வெளியேறினார். அதன்படி ஆட்டத்தின் இரண்டாவது இன்னிங்ஸில் நசீம் ஷா தனது 8ஆவது ஓவரை வீசும்போது காயம் அடைந்தார். இதனால் ஆட்டத்தின் 32ஆவது ஓவரின் இரண்டாவது பந்திற்குப் பிறகு, நசீம் நடப்பதற்கு சிரமப்பட்டார்.

Also Read: Funding To Save Test Cricket

மேலும் அவரது இடது காலின் காயம் ஏற்பட்டது தெரியவந்தது. அதன்பின் களத்திற்கு மருத்துவர்கள் வந்த நசீம் ஷாவை பரிசோதித்த நிலையில், அவரால் மேற்கொண்டு பந்துவீச முடியாமல் போட்டியில் இருந்து பாதியிலேயே வெளியேறினார். இதனால் அவர் எஞ்சியுள்ள் போட்டிகளில் விளையாடுவாரா என்ற கேள்வியும் எழுந்துள்ளது. இருப்பினும் பாகிஸ்தான் கிரிக்கெட் வாரியத்திடம் இருந்து இதுவரை எந்தவொரு அதிகாரப்பூர்வ அறிவிப்பு எதுவும் வெளியாகவில்லை என்பது குறிப்பிடத்தக்கது.