சர்வதேச டெஸ்ட் போட்டிகளுக்கான சாம்பியனை தீர்மானிக்கும், டெஸ்ட் சாம்பியன்ஷிப் தொடரின் இறுதி போட்டிக்கு இந்திய அணியும், ஆஸ்திரேலிய அணியும் தகுதி பெற்றுள்ளன. டெஸ்ட் சாம்பியனை தீர்மானிக்கும், டெஸ்ட் சாம்பியன்ஷிப் இறுதி போட்டி ஜூன் 7ஆம் தேதி லண்டனின் ஓவல் மைதானத்தில் துவங்க உள்ளது. சமகால கிரிக்கெட்டின் தலைசிறந்த இரு அணிகள் இடையேயான இந்த டெஸ்ட் போட்டி மீது அதிகமான எதிர்பார்ப்பு நிலவி வருகிறது.
டி20 உலகக்கோப்பை மற்றும் ஒருநாள் உலகக்கோப்பைகளுக்கு, டெஸ்ட் சாம்பியன்ஷிப் கோப்பையையும் சளைத்தது இல்லை என்பதால், ஒட்டுமொத்த ரசிகர்களும் இந்த போட்டிக்காக மிகுந்த ஆவலுடன் காத்துள்ளனர். இதனால் முன்னாள் மற்றும் இந்நாள் வீரர்கள் பலர் இந்த போட்டி குறித்தான தங்களது கருத்துக்களையும், கணிப்புகளையும் வெளிப்படுத்தி வருகின்றனர்.
அந்த வகையில் ஆஸ்திரேலியா அணியின் நட்சத்திர வேகப்பந்துவீச்சாளர் ஸ்காட் போலண்ட்., கடந்த இரண்டு வருடங்களாகவே நாங்கள் சிறப்பாக விளையாடி வருகிறோம் இதனால் இங்கிலாந்தில் நடைபெறும் டெஸ்ட் சாம்பியன்ஷிப் போட்டியில் எங்களுடைய ஆட்டம் வெறித்தனமாக இருக்கும் என்று இந்திய அணிக்கு எச்சரிக்கை கொடுக்கும் வகையில் பேசியுள்ளார்.
இதுகுறித்து பேசிய ஸ்காட் போலண்ட், “கடந்த இரண்டு வருடங்களாகவே நாங்கள் மிகச் சிறப்பாக விளையாடி உலக டெஸ்ட் சாம்பியன்ஷிப் போட்டிக்கான முதல் இரண்டு இடங்களுக்கு முன்னேறியுள்ளோம், இந்த போட்டி மிகவும் முக்கியமான ஒன்றாகும். நிச்சயம் இந்த போட்டியில் சிறப்பாக விளையாடி குளிர்காலத்தை நல்லபடியாக ஆரம்பிப்போம். நான் இதுவரை 7 போட்டிகளில் விளையாடியுள்ளேன், நிச்சயம் எதிர்வரும் போட்டிகளில் என்னை நான் மெருகேற்றிக் கொள்வேன்.
இங்கிலாந்தில் நடைபெறும் இந்த டெஸ்ட் சாம்பியன்ஷிப் போட்டியில் என்னுடைய திறமையை வெளிப்படுத்துவேன். இது மற்ற இடங்களில் விளையாடுவதை விட வித்தியாசமாக இருந்தாலும் இந்திய அணிக்கு எதிராக விளையாடுவதற்கு போதுமான அதிர்ஷ்டம் என்னிடம் உள்ளது. இங்கிலாந்து மைதானம் எனக்கு பொருந்தாது என்றாலும் நிச்சயம் இந்த போட்டியில் நான் சிறப்பாக விளையாடுவேன்” என தெரிவித்துள்ளார்.