இந்திய அணிக்கு பயிற்சியாளராக இருக்க மிகவும் விரும்புகிறேன் - கௌதம் கம்பீர்!

வெஸ்ட் இண்டீஸ் மற்றும் அமெரிக்காவில் நடைபெற்று வரும் டி20 உலகக் கோப்பை கிரிக்கெட் தொடருடன் இந்திய தலைமைப் பயிற்சியாளர் ராகுல் டிராவிட்டின் பதவிக் காலம் நிறைவடையவுள்ளது. இதன் காரணமாக இந்திய அணியின் புதிய தலைமைப் பயிற்சியாளரை தேர்ந்தெடுப்பதற்கான பணிகளை பிசிசிஐ தீவிரப்படுத்தியுள்ளது. மேலும் தலைமை பயிற்சியாளர் பதவிக்கான விண்ணபங்களையும் சமீபத்தில் பிசிசிஐ வெளியிட்டிருந்தது. 

இந்நிலையில் விணப்பத்திற்கான கால அவகாசம் நிறைவடைந்த நிலையில், மூன்றாயிரத்திற்கும் மேற்பட்ட விண்ணபங்கள் வந்துள்ளதாக பிசிசிஐ தெரிவித்தது. இதனையடுத்து இந்திய அணியின் தலைமை பயிற்சியாளருக்கான அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது. அதேசமயம் ராகுல் டிராவிட்டிற்கு பிறகு இந்திய அணியின் முன்னாள் வீரர் கௌதம் கம்பீர் பயிற்சியாளராக நியமிக்கப்பட்டுள்ளார் என்ற தகவலும் வெளியாகியுள்ளது. 

இது குறித்து பேசிய முன்னாள் வீரர் சௌரவ் கங்குலி, “வெளிநாட்டு பயிற்சியாளர்களைவிட இந்தியர்கள் யாராவது தேர்வு செய்தால் நன்றாக இருக்கும். ஏனெனில் இந்தியாவில் அபரிமிதமான திறமைசாலிகள் பலர் இருக்கின்றனர். திராவிட்டுக்குப் பதிலாக கம்பீர் தேர்வானால் நன்றாகத்தான் இருக்கும். கம்பீர் விண்ணப்பதாரா தெரியவில்லை. அவர் விண்ணப்பித்தால் மட்டுமே வேலை கிடைக்கும். அவர் நல்ல பயிற்சியாளராக இருப்பார்” என்று தெரிவித்தார். 

இந்நிலையில் பயிற்சியாளர் பதவி குறித்து பேசியுள்ள கௌதம் கம்பீர், “இந்திய அணிக்கு பயிற்சியாளராக இருக்க மிகவும் விரும்புகிறேன். உங்கள் தேசிய அணிக்கு பயிற்சியளிப்பதை விட உங்களுக்கு வேறு எதும் பெரிய மரியாதை இல்லை. நீங்கள் 140 கோடி இந்தியர்கள் மற்றும் உலகெங்கிலும் உள்ளவர்களையும் பிரதிநிதித்துவப்படுத்துகிறீர்கள்” என்று தெரிவித்துள்ளார். 

முன்னதாக நடப்பு ஐபிஎல் தொடரில் கொல்கத்தா நைட் ரைடர்ஸ் அணியின் ஆலோசகராக செயல்பட்டு வந்த கௌதம் கம்பீர், அணியை மீண்டும் சாம்பியனாக்கி அசத்தியுள்ளார். அதுமட்டுமின்றி சர்வதேச கிரிக்கெட்டில் இந்திய அணியின் தொடக்க வீரர் மற்றும் மிடில் ஆர்டர் வீரராக விளையாடிய கௌதம் கம்பீர் இதுவரை 58 டெஸ்ட், 147 ஒருநாள் மற்றும் 38 டி20 போட்டிகளில் விளையடி 10ஆயிரத்திற்கும் மேற்பட்ட ரன்களைக் குவித்துள்ளார் என்பது குறிப்பிடத்தக்கது.