ஐசிசி தரவரிசை : அடுத்தடுத்த இடங்களில் கோலி, ரோஹித்!

சர்வதேச கிரிக்கெட் கவுன்சில் இன்று ஒருநாள் வீரர்களுக்கான தரவரிசை பட்டியலை வெளியிட்டுள்ளது. இதில் பந்து வீச்சாளர்களுக்கான பட்டியலில் ஆஸ்திரேலியாவின் ஜோஷ் ஹசில்வுட் இரண்டாம் இடத்தைப் பிடித்து அசத்தியுள்ளார். 

அதேபோல் இப்பட்டியலில் இந்திய அணி வீரர் ஜஸ்பிரீத் பும்ரா 7ஆவது இடத்திற்கு தள்ளப்பட்டுள்ளார். நியூசிலாந்து அணி வீரர் டிரெண்ட் போல்ட் முதலிடத்தைப் பிடித்துள்ளார். 

மேலும் ஐசிசி ஒருநாள் கிரிக்கெட் தரவரிசையில் இந்திய அணியின் முன்னாள் கேப்டன் விராட் கோலி, இந்நாள் கேப்டன் ரோஹித் சர்மா ஆகியோர் 2ஆவது மற்றும் 3ஆவது இடத்தில் நீடிக்கின்றனர். இப்பட்டியலின் முதலிடத்தில் பாகிஸ்தான் வீரர் பாபர் அசாம் உள்ளார்.

ஐசிசி தரவரிசையில் முதல் 10 இடங்களில் இரண்டு இந்திய வீரர்கள் மட்டுமே இடம்பெற்றுள்ளனர். இவர்களுக்கு அடுத்தபடியாக ஷிகர் தவான் 14ஆவது இடத்தில் உள்ளார்.

மேலும் பாகிஸ்தானின் ஃபகர் ஸமான் 9ஆவது இடத்திற்கும், இங்கிலாந்தின் ஜோ ரூட் 10ஆவது இடத்திற்கும் முன்னேறியுள்ளனர். 

ஆல்-ரவுண்டர்கள் தரவரிசையில் இந்திய அணி சார்பில் ரவீந்திர ஜடேஜா மட்டும் முதல் 10 இடங்களில் இடம்பெற்று 8ஆவது இடத்தில் உள்ளார். இதில் வங்கதேசத்தின் ஷகிப் அல் ஹசன் முதலிடத்திலும், பென் ஸ்டோக்ஸ் 2ஆவது இடத்திலும் நீடிக்கின்றனர்.