ஐசிசி உலகக்கோப்பை 2023: சாண்ட்னர் சுழலில் வீழ்ந்தது நியூசிலாந்து!

ஐசிசி ஒருநாள் உலகக்கோப்பை கிரிக்கெட் தொடர் இந்தியாவில் கோலாகலமாக தொடங்கி நடைபெற்றுவருகிறது. இதில் இன்று நடைபெற்ற 6ஆவது லீக் போட்டியில் நியூசிலாந்து மற்றும் நெதர்லாந்து அணிகள் பலப்பரீட்சை நடத்தின. ஹைதராபாத்தில் நடைபெற்ற இப்போட்டியில் டாஸ் வென்ற நெதர்லாந்து அணி முதலில் பந்துவீசுவதாக அறிவித்தது.

அதன்படி களமிறங்கிய நியூசிலாந்து அணிக்கு டெவான் கான்வே - வில் யங் இணை சிறப்பான தொடக்கத்தை கொடுத்து அடித்தளம் அமைத்தனர்.  இதில் அரைசதம் அடிப்பார் என எதிர்பார்க்கப்பட்ட டெவான் கான்வே 5 பவுண்டரி, ஒரு சிக்சர் என 32 ரன்களை எடுத்த நிலையில் விக்கெட்டை இழந்து பெவிலியனுக்கு நடைடைக் கட்டினார். 

அதன்பின் இணைந்த வில் யங் - ரச்சின் ரவீந்திரா இணையும் பொறுப்பான ஆட்டத்தை வெளிப்படுத்த அணியின் ஸ்கோரும் மளமளவென உயர்ந்தது. இதில் அதிரடியாக விளையாடிய இருவரும் அரைசதம் கடந்தும் அசத்தினர். அதன்பின் 70 ரன்களில் வில் யங்கும், 51 ரன்களில் ரச்சின் ரவீந்திராவும் என விக்கெட்டை இழந்தனர். 

அவர்களைத் தொடர்ந்து களமிறங்கிய டேரில் மிட்செல் அதிரடியாக விளையாடி 5 பவுண்டரி, 2 சிக்சர்கள் என 48 ரன்களுக்கு ஆட்டமிழந்து அரைசதம் அடிக்கும் வாய்ப்பை தவறவிட, அடுத்து களமிறங்கிய கிளென் பிலீப்ஸ் 4, மார்க் சாப்மேன் 5 என அடுத்தடுத்து சொற்ப ரன்களுக்கு விக்கெட்டை இழந்து ஏமாற்றமளித்தனர்.  அதன்பின் கேப்டன் டாம் லேதமுடன் இணைந்த மிட்செல் சாண்ட்னரும் அதிரடி காட்ட அணியின் ஸ்கோரும் உயர்ந்தது. 

இதில் சிறப்பான ஆட்டத்தை வெளிப்படுத்திய டாம் லேதம் தனது அரைசதத்தைப் பதிவுசெய்தார். பின் அதிரடியாக விளையாட முயற்சித்த டாம் லேதம் 53 ரன்களில் விக்கெட்டை இழந்தார். இறுதிப்பினும் இறுதிவரை களத்தில் இருந்த மிட்செல் சாண்ட்னர் 17 பந்துகளில் 3 பவுண்டரி, 2 சிக்சர்களை விளாசி  36 ரன்களைச் சேர்த்தார். 

இதன்மூலம் நியூசிலாந்து அணி 50 ஓவர்கள் முடிவில் 7 விக்கெட் இழப்பிற்கு 322 ரன்களைச் சேர்த்தார். நெதர்லாந்து அணி தரப்பில் ஆர்யன் தத், பால் வான் மீகெரன், வாண்டர் மெர்வ் ஆகியோர் தலா 3 விக்கெட்டுகளைக் கைப்பற்றினர்.

இதையடுத்து இலக்கை நோக்கி களமிறங்கிய நெதர்லாந்து அணிக்கு விக்ரம்ஜித் சிங் - மேக்ஸ் ஓடவுட் இணை தொடக்கம் கொடுத்தனர். இதில் விக்ரம்ஜித் சிங் 12 ரன்களுக்கும், மேக்ஸ் ஓடவுட் 16 ரன்களுக்கும் என ஆட்டமிழந்து பெவிலியன் திரும்ப, அடுத்து களமிறங்கிய நட்சத்திர வீரர் பாஸ் டி லீடும் 18 ரன்களில் ஆட்டமிழந்து ஏமாற்றமளித்தார்.

அதன்பின் ஜோடி சேர்ந்த காலின் அக்கர்மேன் - தேஜா நிடமனுரு இணை நிதான ஆட்டத்தை வெளிப்படுத்தி விக்கெட் இழப்பை தடுக்க முயன்றனர். இதில் 18 ரன்களை மட்டுமே எடுத்திருந்த நிடமனுரு விக்கெட்டை இழக்க, மறுபக்கம் சிறப்பான ஆட்டத்தை வெளிப்படுத்தி வந்த காலின் அக்கர்மேன் அரைசதம் கடந்த நிலையில் 69 ரன்களில் ஆட்டமிழந்தார். 

இதையடுத்து களமிறங்கிய கேப்டன் ஸ்காட் எட்வர்ட்ஸ் 2 பவுண்டரி, ஒரு சிக்சர் என 30 ரன்களிலும், அடுத்து வந்த வாண்டெர் மெர்வ், ரியான் கிளென் ஆகியோரும் அடுத்தடுத்து மிட்செல் சாண்டனர் பந்துவீச்சில் விக்கெட்டை இழந்தனர். இதன்மூலம் மிட்செல் சாண்டனர் ஒருநாள் உலகக்கோஒப்பை கிரிக்கெட்டில் முதல் முறையாக 5 விக்கெட்டுகளை கைப்பற்றி அசத்தினார். 

பின்னர் களமிறங்கிய வீரர்களாலும் நியூசிலாந்து அணியின் பந்துவீச்சை சமாளிக்க முடியாமல் அடுத்தடுத்து விக்கெட்டை இழந்தனர். இதனால் நெதர்லாந்து அணி 46.3 ஓவர்களில் அனைத்து விக்கெட்டுகளையும் இழந்து 223 ரன்களுக்கு ஆல் அவுட்டானது. இதன்மூலம் நியூசிலாந்து அணி 99 ரன்கள் வித்தியாசத்தில் நெதர்லாந்தை வீழ்த்தி நடப்பு உலகக்கோப்பை தொடரில் இரண்டாவது வெற்றியைப் பதிவுசெய்துள்ளது.