இன்டர்நேஷ்னல் மாஸ்டர்ஸ் லீக் டி20 தொடரில் நேற்று நடைபெற்ற 14ஆவது லீக் போட்டியில் தென் ஆப்பிரிக்கா மாஸ்டர்ஸ் மற்றும் வெஸ்ட் இண்டீஸ் மாஸ்டர்ஸ் அணிகள் பலப்பரீட்சை நடத்தின. ராய்ப்பூரில் நடைபெற்ற இபோட்டியில் டாஸ் வென்ற தென் ஆப்பிரிகக மாஸ்டர்ஸ் அணி முதலில் பந்துவீசுவதாக அறிவித்தது.
அதன்படி களமிறங்கிய வெஸ்ட் இண்டீஸ் அணிக்கு எதிர்பார்த்த தொடக்கம் கிடைக்கவில்லை. அணியின் தொடக்க வீரர்கள் டுவைன் ஸ்மித் மற்றும் பெர்கின்ஸ் ஆகியோர் தலா 5 ரன்களை மட்டுமே எடுத்த நிலையில் விக்கெட்டை இழந்து ஏமாற்றமளித்தனர். பின்னர் இணைந்த லிண்டல் சிம்மன்ஸ் - கேப்டன் பிரைன் லாரா இணை பொறுப்பான ஆட்டத்தை வெளிப்படுத்தியதுடன் அணியின் விக்கெட் இழப்பையும்தடுத்து நிறுத்தினர். இதில் அபாரமாக விளையாடிய சிம்மன்ஸ் தனது அரைசதத்தைப் பதிவுசெய்து அசத்தினார். மறுபக்கம் 29 ரன்களை எடுத்திருந்த நிலையில் லாரா தனது விக்கெட்டை இழந்தார்.
அவரைத்தொடர்ந்து களமிறங்கிய அஷ்லே நர்ஸும் ரன்கள் ஏதுமின்றி விக்கெட்டை இழக்க, அதிரடியாக விளையாடி வந்த சிம்மன்ஸ் சதமடித்து அசத்தியதுடன் 13 பவுண்டரிகள், 5 சிக்ஸர்கள் என 108 ரன்களைச் சேர்த்த நிலையில் விக்கெட்டை இழந்தார். இறுதியில் தினேஷ் ராம்டின் தனது பங்கிற்கு 6 சிக்ஸர்களை பறக்கவிட்டதுடன் 38 ரன்களைச் சேர்த்து அணிக்கு தேவையான ஃபினிஷிங்கை கொடுத்தார். இதன்மூலம் வெஸ்ட் இண்டீஸ் மாஸ்டர்ஸ் அணி 20 ஓவர்கள் முடிவில் 5 விக்கெட் இழப்பிற்கு 200 ரன்களைச் சேர்த்தது. தென் ஆப்பிரிக்க தரப்பில் குரூகர், நிதினி தலா 2 விக்கெட்டுகளை கைப்பற்றினர்.
பின்னர் இலக்கை நோக்கி களமிறங்கிய தென் ஆப்பிரிக்க மாஸ்டர்ஸ் அணியில் நட்சத்திர வீரர் ஹாஷிம் அம்லா 3 ரன்களில் விக்கெட்டை இழந்து ஏமாற்றமளித்தார். பின்னர் இணைந்த ரிச்சர்ட் லெவி மற்றும் கேப்டன் ஜாக் காலிஸ் இணை நிதானமாக விளையாடி அணியின் ஸ்கோரை உயர்த்தும் முயற்சியில் இறங்கினர். இதில் அரைசதம் அடிப்பார் என எதிர்பார்க்கப்பட்ட ரிச்சர்ட் லெவி 5 பவுண்டரி, 3 சிக்ஸர்களுடன் 44 ரன்களில் தனது விக்கெட்டை இழக்க, அவரைத்தொடர்ந்து 45 ரன்களை எடுத்திருந்த நிலையில் அணியின் கேப்டன் ஜேக் காலிஸும் தனது விக்கெட்டை இழந்தார்.
Also Read: Funding To Save Test Cricket
அதன்பின் களமிறங்கிய வீரர்களில் ஜாக் ருடால்ப் 39 ரன்களைச் சேர்த்ததை தவிர்த்து மற்ற வீரர்கள் யாரும் பெரிதளவில் ரன்களைச் சேர்க்க தவறினர். இதனால் தென் ஆப்பிரிக்க மாஸ்டர்ஸ் அணி 20 ஓவர்கள் முடிவில் 8 விக்கெட்டுகள் இழப்பிற்கு 171 ரன்களை மட்டுமே சேர்த்தது. வெஸ்ட் இண்டிஸ் மாஸ்டர்ஸ் தரப்பில் அபார பந்துவீச்சை வெளிப்படுத்திய ரவி ராம்பால் 5 விக்கெட்டுகளை கைப்பற்றினார். இதன்மூலம் வெஸ்ட் இண்டீஸ் மாஸ்டர்ஸ் அணி 29 ரன்கள் வித்தியாசத்தில் தென் ஆப்பிரிக்க மாஸ்டர்ஸை வீழ்த்தியதுடன் அரையிறுதி வாய்ப்பையும் உறுதிசெய்துள்ளது.