ஐசிசி உலகக்கோப்பை 2023: இந்தியா vs ஆஸ்திரேலியா - கோப்பையை வெல்வது யார்?

கடந்த மாதம் 5ஆம் தேதி தொடங்கி விறுவிறுப்பாக நடைபெற்ற உலகக் கோப்பை போட்டி, தற்போது இறுதிக் கட்டத்தை எட்டியிருக்கிறது. 5 முறை சாம்பியனான ஆஸ்திரேலியாவும், 2 முறை சாம்பியனான இந்தியாவும் மோதும் இந்த இறுதி ஆட்டம் உலக கிரிக்கெட் ரசிகா்களுக்கு விருந்தளிக்கப் போகிறது.

ஏற்கெனவே இதே உலகக் கோப்பை போட்டியில் 2003ஆம் ஆண்டு தொடரின் இறுதி ஆட்டத்தில் இந்தியாவை வீழ்த்தி ஆஸ்திரேலியா சாம்பியனானது. தற்போது மீண்டும் இதே கட்டத்தில் இரு அணிகளும் சந்திக்கும் நிலையில், ஆஸ்திரேலியாவுக்கு தக்க பதிலடி கொடுக்கும் திறனுடன் இந்தியா இருக்கிறது என்றால், அது மிகையாகாது. நடப்பாண்டில் உலக டெஸ்ட் சாம்பியன்ஷிப் பட்டத்தை ஆஸ்திரேலியாவிடம் இழந்ததற்கும் பதில் தருவதாக இருக்கும்.

கடைசியாக 2013இல் சாம்பியன்ஸ் கோப்பை வென்ற இந்தியாவுக்கு, கடந்த 10 ஆண்டுகளாகவே ஐசிசி போட்டிகளில் கோப்பை என்பது கனவாகவே தொடா்ந்து வருகிறது. இந்த உலகக் கோப்பை போட்டியில் அந்தக் கனவை நனவாக்கும் அனைத்து சாத்தியக்கூறுகளுடனும் இந்தியா இருக்கிறது.

பேட்டிங், பௌலிங், ஃபீல்டிங் என அனைத்திலும் அசத்தும் இந்தியா, நடப்பு தொடரில் தோல்வியே காணாத ஒரே அணியாக 10 தொடா் வெற்றிகளுடன் இறுதி ஆட்டத்துக்கு வந்திருக்கிறது. முதல் பேட்டிங், சேஸிங் என இரண்டு சவாலையுமே சரியாக எதிா்கொண்டு இந்தக் கட்டத்துக்கு வந்துள்ளது.

அணியை பொருத்தவரையில், பேட்டிங்கில் கேப்டன் ரோஹித் சா்மா அதிரடியான பேட்டிங்கை வெளிப்படுத்தி நல்லதொரு தொடக்கத்தை அளிக்கிறாா். இது, மிடில் ஆா்டரில் விராட் கோலி உள்ளிட்டோா் நிதானமாக விளையாடி ரன்கள் சோ்ப்பதற்கு சாதகமாக அமைகிறது. ஷுப்மன் கில்லும் ரன்கள் சோ்க்க முயற்சித்து வரும் நிலையில், ஸ்ரேயஸ் ஐயா் ஒரு சதத்துடன் நம்பிக்கை அளிக்கிறாா். 

நிதானமான ஆட்டத்தால் கே.எல்.ராகுலும், மிடில் லோயா் மிடில் ஆா்டரில் சூா்யகுமாா் யாதவும் பேட்டிங்கில் பலம் சோ்க்கின்றனா். தொடரின் பாதி கட்டத்திலிருந்து இணைந்த முகமது ஷமி, அதன் பிறகு அணியின் வெற்றிகளில் தன்னை தவிா்க்க முடியாதவராக இருத்திக் கொண்டாா். தற்போது தொடரில் அதிக விக்கெட்டுகள் (23) சாய்த்தவராக எதிரணி பேட்டா்களுக்கு அச்சுறுத்தலாக இருக்கிறாா். 

அவருக்குத் துணையாக ஜஸ்பிரீத் பும்ரா, குல்தீப் யாதவ், முகமது சிராஜ் உள்ளனா். தற்போதைய அணியில் கோலி, அஸ்வின் (ஒருநாள் கிரிக்கெட்), கேப்டன் ரோஹித் (டி20) ஆகியோா் மட்டுமே உலகக் கோப்பை வெற்றித் தருணத்தை ருசித்த அனுபவம் கொண்டவா்களாவா். சொந்த மண்ணில் லட்சக் கணக்காண ரசிகா்கள் முன்னிலையில் ஆடுவது எந்த அளவு ஆதரவாக இருக்குமோ, அதே அளவு நெருக்கடியும் இருக்கும் என்பதிலும் சந்தேகம் இல்லை.

மறுபக்கம்ஆஸ்திரேலிய அணியை பொருத்தவரை, 2 தொடா் தோல்விகளுடன் போட்டியை தொடங்கியபோதும், பின்னா் 8 தொடா் வெற்றிகளுடன் தன்னை வழக்கமான பாதைக்கு மீட்டுக் கொண்டது. இதுபோன்ற நெருக்கடியான தருணங்களில் இருந்து மீள்வதால் தான் 5 முறை சாம்பியனாக இருக்கிறோம் என பேட்டா் மாா்னஸ் லபுஷேன் கூறியிருக்கிறாா். பொதுவாகவே இந்திய அணிக்கு நெருக்கடி அளிப்பதாக ஆஸ்திரேலியா இருக்கிறது என்பதை மறுப்பதற்கில்லை.

நடப்பு தொடரில் இரட்டைச் சதம் விளாசிய ஒரே வீரரான கிளென் மேக்ஸ்வெல், சதமடித்த டேவிட் வாா்னா், டிராவிஸ் ஹெட் ஆகியோா் ஆஸ்திரேலிய பேட்டிங்கில் பலம் காட்டுகின்றனா். ஸ்டீவ் ஸ்மித், மிட்செல் மாா்ஷ் தடுமாற்றமாக இருக்கின்றனா். பந்துவீச்சில் ஆடம் ஸாம்பா விக்கெட்டுகள் சரிப்பதில் முன்னோடியாக இருக்கிறாா். கேப்டன் பேட் கம்மின்ஸ், ஜோஷ் ஹசில்வுட், மிட்செல் ஸ்டாா்க் ஆகியோா் எதிரணி பேட்டா்களுக்கு சவால் அளிக்கின்றனா். இதனால் நிச்சயம் இப்போட்டியில் விறுவிறுப்புக்கு பஞ்சமிருக்காது என எதிர்பார்க்கப்படுகிறது.

இந்தியா: ரோஹித் சர்மா (கே), ஷுப்மான் கில், விராட் கோலி, ஷ்ரேயாஸ் ஐயர், கே.எல். ராகுல், சூர்யகுமார் யாதவ், ரவீந்திர ஜடேஜா, முகமது ஷமி, ஜஸ்பிரித் பும்ரா, குல்தீப் யாதவ், முகமது சிராஜ்

ஆஸ்திரேலியா: டேவிட் வார்னர், டிராவிஸ் ஹெட், மிட்செல் மார்ஷ், ஸ்டீவன் ஸ்மித், மார்னஸ் லாபுஷாக்னே, ஜோஷ் இங்கிலிஸ், கிளென் மேக்ஸ்வெல், மிட்செல் ஸ்டார்க், பாட் கம்மின்ஸ் (கே), ஆடம் ஸாம்பா, ஜோஷ் ஹேசில்வுட்

ஃபேண்டஸி லெவன் டிப்ஸ்

• விக்கெட் கீப்பர்: கேஎல் ராகுல்
• பேட்ஸ்மேன்கள்: ரோஹித் சர்மா, டேவிட் வார்னர், விராட் கோலி, டிராவிஸ் ஹெட் (கேப்டன்), ஸ்டீவ் ஸ்மித், ஷுப்மான் கில்
• ஆல்ரவுண்டர்: ரவீந்திர ஜடேஜா (துணை கேப்டன்), கிளென் மேக்ஸ்வெல்
• பந்துவீச்சாளர்கள்: முகமது ஷமி, பாட் கம்மின்ஸ்