தென் ஆப்பிரிக்காவுக்கு எதிரான 2ஆவது டி 20 கிரிக்கெட் போட்டியில் இந்திய அணி இன்று மோதுகிறது. இதில் வெற்றி பெறும் பட்சத்தில் உள்நாட்டில் தென் ஆப்பிரிக்காவுக்கு எதிராக முதன்முறையாக டி 20 தொடரை இந்திய அணி வென்று சாதனை படைக்கும்.
இரு அணிகள் இடையே திருவனந்தபுரத்தில் நடைபெற்ற முதல் டி 20 கிரிக்கெட் போட்டியில் இந்திய அணி 8 விக்கெட்கள் வித்தியாசத்தில் வெற்றி பெற்றிருந்தது. இந்த ஆட்டத்தில் அர்ஷ்தீப் சிங், தீபக் சாஹர் ஆகியோர் ஆடுகளத்தின் தன்மையை சிறப்பாக பயன்படுத்தி 3 ஓவர்களுக்குள்ளேயே தென் ஆப்பிரிக்க அணியின் 5 முக்கிய விக்கெட்களை வீழ்த்தி மிரளச் செய்தனர்.
ஆனால் கௌகாத்தி ஆடுகளம் திருவனந்தபுரத்தில் இருந்து மாறுபட்டது. இந்த ஆட்டம் இந்திய பந்து வீச்சுத்துறைக்கு சவால் நிறைந்ததாக இருக்கக்கூடும். பும்ரா இல்லாத நிலையில் முதல் ஆட்டத்தில் விளையாடிய அதே பந்து வீச்சாளர்களுடன் இந்திய அணி களமிறங்கக்கூடும். திருவனந்தபுரத்தில் அக்சர் படேல், அஸ்வின் கூட்டணியும் அசத்தியிருந்தது.
இவர்கள் இருவரும் கூட்டாக 8 ஓவர்களை வீசி 24 ரன்களை மட்டுமே விட்டுக்கொடுத்திருந்தனர். அதிலும் அஸ்வின் ஒரு மெய்டனுடன் 8 ரன்களை மட்டுமே வழங்கியிருந்தார். டி 20 உலகக்கோப்பை நெருங்குவதால் மீண்டும் ஒரு முறை இந்த கூட்டணி சிறப்பாக செயல்படும் பட்சத்தில் சுழற்பந்து வீச்சு துறை வலுப்பெறும்.
பேட்டிங்கை பொறுத்தவரையில் கேஎல்ராகுல் மீண்டும் ரன்கள் சேர்க்கத் தொடங்கியுள்ளது பலம் சேர்த்துள்ளது. சூர்யகுமார் யாதவிடம் இருந்து மேலும் ஒரு சிறந்த இன்னிங்ஸ் வெளிப்படக்கூடும். இன்றைய ஆட்டத்தில் இந்திய அணி வெற்றி பெறும் பட்சத்தில் உள்ளூரில் தென் ஆப்பிரிக்காவுக்கு எதிராக முதன் முறையாக டி 20 தொடரை கைப்பற்றி சாதனை படைக்கும்.
அதேசமயம் தென் ஆப்பிரிக்க அணி கடந்த போட்டியில் பவர் பிளேவில் 9/5 என படுமோசமாக திணறியது. திருவனந்தபுரத்தில் இந்திய அணி முதலில் களமிறங்கியிருந்தாலும் இப்படிதான் சொதப்பியிருக்கும். அங்கிருந்த பிட்ச் தொடக்கத்தில் முழுக்க முழுக்க வேகத்திற்கு சாதகமாக இருந்தது. ஆனால், கௌகாத்தி பிட்ச் அப்படியல்ல. பேட்டர்களால் ரன்களை குவிக்க முடியும் என்பதால் தென் ஆப்பிரிக்க பேட்டர்கள் முதல் போட்டியில் விளையாடியதுபோல் அல்லாமல் ரன்களை குவிப்பார்கள் என எதிர்பார்க்கப்படுகிறது.
டெம்பா பவுமா தொடர்ந்து டி20 பார்மெட்டில் சொதப்பி வருகிறார். டி காக் கடந்த போட்டியில் எதிர்பாராத விதமாகத்தான் அவுட் ஆனார். அதனால் இப்போட்டியில் ரன்களை குவிக்க வாய்ப்புள்ளது. மற்ற பேட்டர்களும் அதிரடி காட்ட பிட்ச் ஒத்துழைப்பு கொடுக்கும். தென் ஆப்பிரிக்க பௌலர்கள் பேட்டர்களுக்கு சாதகமான பிட்ச்களிலும் அபாரமாக பந்துவீசக் கூடியவர்கள். இதனால் இன்றும் பர்னல், ரபாடா, நோர்ட்ஜே ஆகியோர் அபாரமாக செயல்படுவார்கள் எனக் கருதப்படுகிறது.
உத்தேச அணி
இந்தியா - ரோஹித் சர்மா (கே), கேஎல் ராகுல், விராட் கோலி, சூர்யகுமார் யாதவ், ரிஷப் பந்த் , தினேஷ் கார்த்திக், அக்சர் படேல், ரவிச்சந்திரன் அஷ்வின், ஹர்ஷல் படேல், தீபக் சாஹர், அர்ஷ்தீப் சிங்
தென் ஆப்பிரிக்கா - குயின்டன் டி காக் , டெம்பா பவுமா (கே), ரிலீ ரோசோவ் / ரீசா ஹென்ட்ரிக்ஸ், ஐடன் மார்க்ரம், டேவிட் மில்லர், டிரிஸ்டன் ஸ்டப்ஸ், வெய்ன் பார்னெல், ககிசோ ரபாடா, கேசவ் மகாராஜ், அன்ரிச் நோர்ட்ஜே, தப்ரைஸ் ஷம்சி.