ஐபிஎல் தொடரின் 16ஆவது சீசன் கடந்த மார்ச் மாதம் 31ஆம் தேதி தொடங்கிய நிலையில், தற்போது இறுதிக்கட்டத்தை நெருங்கியுள்ளது. குஜராத் அணிக்கு பிளே ஆஃப் சுற்றுக்கு செல்வது பெரும்பாலும் உறுதியாகிவிட்ட நிலையில், மற்ற 3 அணிகள் எது என்பது இன்னும் இழுபறியாகவே உள்ளது. அந்த இடங்களுக்காக மீதமுள்ள 9 அணிகளுமே கடுமையாக போராடி வருகின்றன. முன்பு எப்போது இல்லாத அளவிற்கு அணிகளின் ரன்-ரேட்டும் நடப்பு டொடரில் பிளே-ஆஃப் வாய்ப்பை உறுதி செய்வதில் முக்கிய பங்கு வகிக்கும் என எதிர்பார்க்கப்படுகிறது.
இந்த சூழலில் தான் இன்று நடைபெறும் லீக் போட்டியில் டூப்ளெசிஸ் தலைமையிலான ராயல் சேலஞ்சர்ஸ் பெங்களூரு மற்றும் ரோஹித் சர்மா தலைமையிலான மும்பை இந்தியன்ஸ் அணிகள் இன்று பலப்பரீட்சை நடத்துகின்றன. மும்பையில் உள்ள வான்கடே மைதானத்தில், மாலை 7.30 மணிக்கு இந்த போட்டி தொடங்க உள்ளது.
நடப்பு தொடரில் ஏற்கனவே இரு அணிகளும் மோதிய போட்டியில், ராயல் சேலஞ்சர்ஸ் பெங்களூரு அணி அபார வெற்றி பெற்றது. அதற்கு பழிவாங்கும் நோக்கில் மும்பை இந்தியன்ஸ் அணி இன்று களமிறங்குகிறது. அதேநேரம், இன்றைய போட்டியில் வெற்றி பெறும் அணி நேரடியாக புள்ளிப்பட்டியலில் மூன்றாவது இடத்திற்கு முன்னேறும் என்பதால், இந்த போட்டியின் மீதான எதிர்பார்ப்பு அதிகரித்துள்ளது.
போட்டி தகவல்கள்
- மோதும் அணிகள் - மும்பை இந்தியன்ஸ் vs ராயல் சேலஞ்சர்ஸ் பெங்களூரு
- இடம் - வான்கடே மைதானம், மும்பை
- நேரம் - இரவு 7.30 மணி
போட்டி முன்னோட்டம்
நடப்பு தொடரில் பெங்களூரு அணி இதுவரை 10 போட்டிகளில் விளையாடி, 5 வெற்றிகளுடன் புள்ளிப்பட்டியலில் 6வது இடத்தில் உள்ளது. கோலி, டூப்ளெசிஸ் மற்றும் மேக்ஸ்வெல் ஆகியோர் அந்த அணியின் பேட்டிங் தூண்களாக உள்ளனர். அவர்களை தவிர அந்த அணியை சேர்ந்த வேறு எந்தவொரு பேட்ஸ்மேனும் நடப்பு தொடரில் பெரிதாக சோபிக்கவில்லை.
அதேநேரம், பந்துவீச்சிலும் முகமது சிராஜை தவிர மற்ற வீரர்கள் மோசமான செயல்பாட்டையே வெளிப்படுத்தி வருகின்றனர். இம்பேக்ட் பிளேயராக களமிறங்கும் ஹர்ஷல் படேல் கூட ரன்களை வாரி வழங்கி வருகிறார். கடைசியாக விளையாடிய லீக் போட்டியில் டெல்லி அணிக்கு எதிராக தோல்வியுற்றதால், இந்த போட்டியின் மூலம் மீண்டும் வெற்றிப்பாதைக்கு திரும்ப பெங்களூரு முனைப்பு காட்டி வருகிறது.
மும்பை அணியும் இதுவரை 10 போட்டிகளில் விளையாடி 6ல் வெற்றி பெற்று இருந்தாலும், ரன் ரேட் அடிப்படையில் புள்ளிப்பட்டியலில் 8வது இடத்தில் உள்ளது. பேட்டிங்கை பொறுத்தவரை எல்லா போட்டியிலும் யாரேனும் ஒருவர் அதிரடியாக விளையாடி கொடுத்து விடுகின்றனர். ஆனால், பந்துவீச்சு தான் அந்த அணியின் பெரும் பிரச்னையாக உள்ளது.
ஆர்ச்சர் போன்றோர் ரன்களை வாரிக்கொடுத்து வருகின்றனர். பியுஷ் சாவ்லா மட்டுமே ரோகித்தின் நம்பிக்கை அஸ்திரமாக உள்ளார். இன்றைய போட்டியில் வெல்ல மும்பை அணி பந்துவீச்சில் சிறப்பாக செயல்படுவது மிகவும் முக்கியம். கடைசியாக விளையாடிய லீக் போட்டியில் சென்னை அணிக்கு எதிராக தோல்வியுற்றதை அடுத்து, இன்றைய போட்டியில் வெல்ல மும்பை அணியும் தீவிரம் காட்டி வருகிறது.
நேருக்கு நேர்
- மோதிய போட்டிகள் - 31
- மும்பை இந்தியன்ஸ் - 17
- ஆர்சிபி - 14
உத்தேச லெவன்
மும்பை இந்தியன்ஸ்: கேமரூன் கிரீன், இஷான் கிஷன், ரோஹித் சர்மா (கே), நேஹல் வதேரா, சூர்யகுமார் யாதவ், திலக் வர்மா, டிம் டேவிட், அர்ஷத் கான், ஜோஃப்ரா ஆர்ச்சர், பியூஷ் சாவ்லா, ஆகாஷ் மத்வால்.
ஆர்சிபி: விராட் கோலி, ஃபாஃப் டு பிளெசிஸ் (கே), கிளென் மேக்ஸ்வெல், மஹிபால் லோம்ரோர், தினேஷ் கார்த்திக், அனுஜ் ராவத், வனிந்து ஹசரங்கா, கரண் சர்மா, முகமது சிராஜ், ஜோஷ் ஹெஜ்லுவாட், ஹர்ஷல் படேல்.
ஃபேண்டஸி லெவன் டிப்ஸ்
- விக்கெட் கீப்பர் - இஷான் கிஷன்
- பேட்ஸ்மேன்கள் - விராட் கோலி, ஃபாஃப் டு பிளெசிஸ் (கே), சூர்யகுமார் யாதவ் (துணை கேப்டன்), மஹிபால் லோம்ரோர், திலக் வர்மா
- ஆல்ரவுண்டர்கள் - கிளென் மேக்ஸ்வெல், கேமரூன் கிரீன்
- பந்துவீச்சாளர்கள் - பியூஷ் சாவ்லா, ஜோஷ் ஹேசில்வுட், முகமது சிராஜ்