இந்த நாளை எங்கள் வாழ்நாளில் மறக்க மாட்டோம் - நிதீஷ் ரெட்டி தந்தை பெருமிதம்!

மெல்போர்னில் நடைபெற்று வரும் ஆஸ்திரேலியா - இந்திய அணிகளுக்கு இடையேயான நான்காவது டெஸ்ட் போட்டி விறுவிறுப்பாக நடைபெற்று வருகிறது. இப்போட்டியில் டாஸ் வென்று முதலில் பேட்டிங் செய்த ஆஸ்திரேலிய அணி ஸ்டீவ் ஸ்மித்தின் சதத்தின் மூலம் முதல் இன்னிங்ஸில் 474 ரன்களைக் குவித்து ஆல் அவுட்டானது. இதில் அதிகபட்சமாக ஸ்டீவ் ஸ்மித் 140 ரன்களைச் சேர்த்தார். 

இதைத்தொடர்ந்து முதல் இன்னிங்ஸைத் தொடர்ந்த இந்திய அணியில் யஷஸ்வி ஜெய்ஸ்வால் 82 ரன்களையும், விராட் கோலி 36 ரன்களையும் சேர்த்ததை தவிர்த்து மற்ற வீரர்கள் பெரிதளவில் சோபிக்க தவறியதால் இரண்டாம் நாள் ஆட்டநேர முடிவில்  5 விக்கெட்டுகளை இழந்து 164 ரன்களைச் சேர்த்தது. இதையடுத்து இன்று தொடங்கிய மூன்றாம் நாள் ஆட்டத்தில் ரிஷப் பந்த் 28 ரன்களிலும், ரவீந்திர ஜடேஜா 17 ரன்களிலும் என விக்கெட்டை இழந்தனர். 

அதன்பின் ஜோடி சேர்ந்துள்ள நிதீஷ் ரெட்டி மற்றும் வாஷிங்டன் சுந்தர் இணை அபார ஆட்டத்தை வெளிப்படுத்தி அணியை சரிவிலிருந்து மீட்டெடுத்தனர். இதில் இருவரும் இணைந்து 100 ரன்களுக்கு மேல் பார்ட்னர்ஷிப் அமைத்தும் அசத்தினர். இதில் அரைசதம் கடந்து அசத்திய வாஷிங்டன் சுந்தர் 50 ரன்களுடன் விக்கெட்டை இழக்க, மறுமுனையில் அபாரமாக விளையாடி வந்த நிதீஷ் ரெட்டி சர்வதேச டெஸ்ட் கிரிக்கெட்டில் தனது முதல் சதத்தைப் பதிவுசெய்து அசத்தினார். 

இதன்மூலம் இந்திய அணி மூன்றாம் நாள் ஆட்டநேர முடிவில்  9 விக்கெட்டுகள் இழப்பிற்கு 358 ரன்களைச் சேர்த்துள்ளது. இதில் இந்திய அணி தரப்பில் நிதீஷ் ரெட்டி 105 ரன்களுடனும், முகமது சிராஜ் 2 ரன்களுடனும் களத்தில் உள்ளனர். ஆஸ்திரேலிய அணி தரப்பில் ஸ்காட் போலண்ட், பாட் கம்மின்ஸ் தலா 3 விக்கெட்டுகளையும், நாதன் லையன் 2 விக்கெட்டுகளையும் கைப்பற்றியுள்ளனர். இதையடுத்து 116 ரன்கள் பின் தங்கிய நிலையில் நாளை நான்காம் நாள் ஆட்டத்தை இந்திய அணி தொடரவுள்ளது. 

இந்நிலையில் இப்போட்டியில் நிதீஷ் ரெட்டி சதமடித்தது குறித்து பேசிய அவரது தந்தை முத்யாலா ரெட்டி, “எங்கள் குடும்பத்திற்கு, இது ஒரு சிறப்பு நாள், இந்த நாளை எங்கள்வாழ்நாளில் மறக்க மாட்டோம். நிதீஷ் ரெட்டி 14-15 வயதிலிருந்து சிறப்பாக செயல்படுகிறார், இப்போது சர்வதேச கிரிக்கெட்டில் அவ்வாறு செயல்பட்டிருப்பது மிகவும் சிறப்பு வாய்ந்த உணர்வு. அதேசமயம் ஒரு விக்கெட் மீதமுள்ள நிலையில் நிதிஷ் 99 ரன்களில் இருந்தபோது நான் மிகவும் பதற்றமாக இருந்தேன்.

Also Read: Funding To Save Test Cricket

ஏனெனில் இந்த இன்னிங்ஸில் கடைசி விக்கெட் மட்டுமே கைவசம் உள்ள நிலையில் நிதீஷ் தனது சதத்தைப் பதிவுசெய்வாரா என்ற எதிர்பார்ப்பும் பதற்றமும் இருந்தது. ஆனால் மறுபக்கம் அதிர்ஷ்டவசமாக முகமது சிராஜ் தடுத்து விளையாடியதுடன், நிதீஷ் சதமடிப்பதற்கும் உதவியாக இருந்துள்ளார்” என்று கூறியுள்ளார். இந்நிலையில் இப்போட்டியில் சதமடித்ததுடன் இந்திய அணியை சரிவிலிருந்து மீட்டெடுத்த நிதீஷ் ரெட்டிக்கு பல்வேறு தரப்பில் இருந்தும் வாழ்த்துகள் குவிந்து வருகின்றன.