KL Rahul Records: இங்கிலந்துக்கு எதிரான நான்காவது டெஸ்ட் போட்டியில் இந்திய அணியின் தொடக்க வீரர் கேஎல் ராகுல் 46 ரன்களைச் சேர்த்த கையோடு விக்கெட்டை இழந்ததுடன் அரைசதம் அடிக்கும் வாய்ப்பை தவறவிட்டார்.
இங்கிலாந்து - இந்தியா அணிகளுக்கு இடையேயான நான்காவது டெஸ்ட் போட்டி மான்செஸ்டரில் நடைபெற்று வருகிறது. இப்போட்டியில் டாஸை இழந்து முதலில் பேட்டிங் செய்த இந்திய அணிக்கு கேஎல் ராகுல் - யஷஸ்வி ஜெய்ஸ்வால் இணை தொடக்கம் கொடுத்தர். இதில் இருவரும் இணைந்து 94 ரன்கள் பார்ட்னர்ஷிப் அமைத்திருந்த நிலையில் கேஎல் ராகுல் 46 ரன்களில் ஆட்டமிழந்தார். அதேசமயம் மற்றொரு தொடக்க வீரர் யஷஸ்வி ஜெய்ஸ்வால் தனது அரைசதத்தைப் பதிவுசெய்தார்.
பின் 58 ரன்களில் யஷஸ்வி ஜெய்ஸ்வாலும், அடுத்து களமிறங்கிய கேப்டன் ஷுப்மன் கில் 12 ரன்னிலும் என விக்கெட்டுகளை இழந்தனர். இதனால் இந்திய அணி முதல்நாள் தேநீர் இடைவேளையின் போது 3 விக்கெட்டுகள் இழப்பிற்கு 149 ரன்களைச் சேர்த்துள்ளது. இதில் சாய் சுதர்ஷன் 26 ரன்களுடனும், ரிஷப் பந்த் 3 ரன்களுடனும் களத்தில் உள்ளனர். இங்கிலாந்து தரப்பில் வோக்ஸ், டௌசன் மற்றும் ஸ்டோக்ஸ் தலா ஒரு விக்கெட்டை கைப்பற்றியுள்ளனர்.
இந்நிலையில் இப்போட்டியில் கேஎல் ராகுல் அரைசதத்தைத் தவறவிட்டாலும் சில சாதனைகளைப் படைத்துள்ளார். அதன்படி இப்போட்டியில் அவர் 46 ரன்களைச் சேர்த்ததன் மூலம் இங்கிலாந்தில் தனது 1000 டெஸ்ட் ரன்களைப் பதிவுசெய்தார். இதன்மூலம் இங்கிலாந்தில் 1000 டெஸ்ட் ரன்களை அடித்த இரண்டாவது இந்திய தொடக்க வீரர் மற்றும் 5ஆவது வீரர் எனும் பெருமையைப் பெற்றுள்ளார். இதற்கு முன் சுனில் கவாஸ்கர் மட்டுமே இந்த சாதனையைப் படைத்தார் என்பது குறிப்பிடத்தக்கது.
இங்கிலாந்தில் அதிக டெஸ்ட் ரன்களை எடுத்த இந்திய வீரர்கள்
- சச்சின் டெண்டுல்கர் - 1575 ரன்கள்
- ராகுல் டிராவிட் - 1376 ரன்கள்
- சுனில் சகாவாஸ்கர் - 1152 ரன்கள்
- விராட் கோலி - 1096 ரன்கள்
- கே.எல். ராகுல் - 1035 ரன்கள்
தற்போது நடைபெற்று வரும் இங்கிலாந்து டெஸ்ட் தொடரில் கேஎல் ராகுல் சிறப்பான ஆட்டத்தை வெளிப்படுத்தி வருகிறார். அவர் இத்தொடரில் தற்போது வரை 7 இன்னிங்ஸ்களில் மட்டுமே விளையாடியுள்ள நிலையில் இரண்டு சதங்கள், ஒரு அரைசதம் என உள்பட 60.14 என்ற சராசரியில் 421 ரன்களைச் சேர்த்துள்ளார். மேலும் இப்போட்டியிலும் சிறப்பான தொடக்கத்தைப் பெற்ற அவர் அதனை பயன்படுத்த தவறிவிட்டார் என்பது குறிப்பிடத்தக்கது.
இங்கிலாந்து பிளேயிங் லெவன்: ஜாக் கிரௌலி, பென் டக்கெட், ஒல்லி போப், ஜோ ரூட், ஹாரி ப்ரூக், பென் ஸ்டோக்ஸ் (கேப்டன்), ஜேமி ஸ்மித், லியாம் டௌசன், கிறிஸ் வோக்ஸ், பிரைடன் கார்ஸ், ஜோஃப்ரா ஆர்ச்சர்.
Also Read: LIVE Cricket Score
இந்தியா பிளேயிங் லெவன்: கேஎல் ராகுல், யஷஸ்வி ஜெய்ஸ்வால், சாய் சுதர்ஷன், ஷுப்மன் கில்(கேப்டன்), ரிஷப் பந்த், ரவீந்திர ஜடேஜா, வாஷிங்டன் சுந்தர், ஷர்துல் தாக்கூர். ஜஸ்பிரித் பும்ரா, அன்ஷுல் கம்போஜ், முகமது சிராஜ்.