சர்வதேச கிரிக்கெட்டில் இருந்து ஓய்வை அறிவித்தார் மேத்யூ வேட்!
ஆஸ்திரேலிய அணியின் அதிரடி விக்கெட் கீப்பர் பேட்டராக அறியப்பட்டவர் மேத்யூ வேட். தற்போது 36 வயதாகும், இவர் ஆஸ்திரேலிய அணிக்காக கடந்த 2011ஆம் ஆண்டு அறிமுகமாக 36 டெஸ்ட், 97 ஒருநாள் மற்றும் 92 டி20 போட்டிகளில் விளையாடிவுள்ளார்.
அந்தவகையில் 36 டெஸ்ட் போட்டிகளில் 4 சதங்கள், 5 அரைசதங்கள் என 1613 ரன்களையும், 97 ஒருநாள் போட்டிகளில் விளையாடி ஒரு சதம், 11 அரைசதங்கள் என 1867 ரன்களையும், 92 டி20 போட்டிகளில் விளையாடி 3 அரைசதங்களுடன் 1202 ரன்களையும் சேர்த்துள்ளார். இதுதவிர்த்து ஐபிஎல் தொடரில் டெல்லி கேப்பிட்டல்ஸ், குஜராத் டைட்டைன்ஸ் அணி மொத்தமாக 15 போட்டிகளில் மட்டுமெ விளையாடியுள்ளார் என்பதும் குறிப்பிடத்தாக்கது.
அதேசமயம் கடந்த 2021ஆம் ஆண்டு நடைபெற்ற ஐசிசி ஆடவர் டி20 உலகக்கோப்பை கிரிக்கெட் தொடரில் ஆஸ்திரேலிய அணி சாம்பியன் பட்டத்தை வென்ற நிலையில் அந்த அணியிலும் மேத்யூ வேட் இடம்பிடித்திருந்தார். அதுமட்டுமின்றி அத்தொடரில் ஆஸ்திரேலிய அணி சாம்பியன் பட்டத்தை வெல்வதற்கும் மேத்யூ வேட் பேட்டிங்கில் மிக முக்கிய பங்காற்றினார் என்பதும் குறிப்பிடத்தக்கது. இந்நிலையில், மேத்யூ வேட் சர்வதேச கிரிக்கெட்டில் இருந்து ஓய்வு பெறுவதாக இன்று அறிவித்துள்ளார்.
இவரது முடிவை ஆஸ்திரேலிய கிரிக்கெட் வாரியம் உறுதி செய்துள்ளது. கடந்த சில ஆண்டுகளாக ஆஸ்திரேலிய ஒருநாள் அணி மற்றும் டி20 அணியில் அவருக்கு போதிய வாய்ப்புகள் வழங்கப்படுவதில்லை. மேலும் நடந்து முடிந்த ஐசிசி ஆடவர் டி20 உலகக் கோப்பை தொடருக்கான ஆஸ்திரேலிய அணியில் இடம் பெற அவர் ஆர்வமாக இருந்த நிலையிலும் அவருக்கு வாய்ப்பு அளிக்கப்படவில்லை.
சமீபத்தில் பாகிஸ்தான் அணிக்கு எதிரான ஒருநாள் மற்றும் டி20 தொடர்களுக்கான ஆஸ்திரேலிய அணிகளில் பல்வேறு நட்சத்திர வீரர்களுக்கு ஓய்வளிக்கப்பட்ட நிலையிலும், மேத்யூ வேடிற்கு அணியில் இடம் கிடைக்கவில்லை. இதனால் எதிர்வரும் சாம்பியன்ஸ் கோப்பை தொடருக்கான ஆஸ்திரேலிய அணியிலும் அவருக்கு இடம் கிடைக்காது என கூறப்பட்டது. இதையடுத்து தான் மேத்யூ வேட் சர்வதேச கிரிக்கெட்டில் இருந்து ஓய்வு பெறுவதாக இன்று அறிவித்துள்ளார்.
Also Read: Funding To Save Test Cricket
இந்நிலையில் சர்வதேச கிரிக்கெட்டில் ஓய்வை அறிவித்துள்ள மேத்யூ வேட், ஆஸ்திரேலிய அணியின் ஃபில்டிங் பயிற்சியாளராக நியமிக்கப்பட்டுள்ளார். இதன்மூலம் எதிர்வரும் பாகிஸ்தான் அணிக்கு எதிரான தொடர் முதல் மேத்யூ வேட் ஆஸ்திரேலிய அணியின் பயிற்சியாளராக செயல்படுவார் என்றும் தெரிவிக்கப்பட்டுள்ளது. சர்வதேச கிரிக்கெட்டில் இருந்து ஓய்வை அறிவித்த கையோடு அணியின் பயிற்சியாளர் குழுவில் மேத்யூ வேட் இணைந்துள்ளது ரசிகர்களை ஆச்சரியமடைய செய்துள்ளது.