பாகிஸ்தான் மற்றும் ஐக்கிய அரபு அமீரகத்தில் நடப்பு ஐசிசி சாம்பியன்ஸ் கோப்பை கிரிக்கெட் தொடரானது வரும் பிப்ரவரி 19ஆம் தேதி முதல் நடைபெறவுள்ளது. ஒருநாள் தரவரிசையில் முதல் 8 இடங்களை பிடித்துள்ள அணிகள் நேருக்கு நேர் மோதவுள்ளதால் இத்தொடரின் மீதான எதிர்பார்ப்புகள் அதிகரித்துள்ளன. இதில் எட்டு அணிகளும் இரு குழுக்களாக பிரிந்து இத்தொடரை எதிர்கொள்கின்றனர்.
இதில் குரூப் ஏ பிரிவில் இந்தியா, பாகிஸ்தான், நியூசிலாந்து மற்று வங்கதேச அணிகளும், குரூப் பி பிரிவில் ஆஸ்திரேலியா, இங்கிலாந்து, தென் ஆப்பிரிக்கா மற்றும் ஆஃப்கானிஸ்தான் அணிகளும் இடம்பிடித்துள்ளன. இதையடுத்து இத்தொடரில் பங்கேற்கும் அணிகள் அறிவிக்கப்பட்டுள்ள நிலையில், பாகிஸ்தான் அணி மட்டும் இதுவரை அறிவிக்கப்படாமல் உள்ளது. இதில் பாட் கம்மின்ஸ் தலைமையிலான ஆஸ்திரேலிய அணியும் அறிவிக்கப்பட்டிருந்தது.
இதில் காயம் காரணமாக இலங்கை தொடரில் இடம்பிடிக்காமல் இருந்த பாட் கம்மின்ஸ் தேர்வு செய்யப்பட்டுள்ளதுடன், அணியின் கேப்டனாகவும் நியமிக்கப்பட்டுள்ளார். அதேசமயம் பார்டர் கவாஸ்கர் தொடரின் போது காயத்தை சந்தித்த ஜோஷ் ஹேசில்வுட், மிட்செல் ஸ்டார்க் மற்றும் ஜோஷ் இங்கிலிஸ் ஆகியோருக்கும் இந்த அணியில் இடம்பிடித்த நிலையில், மேத்யூ ஷார்ட், ஆரோன் ஹார்டி ஆகியோருக்கும் வாய்ப்பு வழங்கப்பட்டுள்ளது.
இந்நிலையில் தற்சமயம் ஆஸ்திரேலிய அணி ரசிகர்களை அதிர்ச்சிகுள்ளாக்கும் செய்தி ஒன்று வெளியாகியுள்ளது. அதன்படி, ஆஸ்திரேலிய அணியின் நட்சத்திர ஆல் ரவுண்டர் மிட்செல் மார்ஷ் காயம் காரணமாக எதிர்வரும் சாம்பியன்ஸ் கோப்பை கிரிக்கெட் தொடரில் இருந்து விலகியதாக ஆஸ்திரேலிய கிரிக்கெட் வாரியம் அதிகாரப்பூர்வமாக அறிவித்துள்ளதுடன், அவருக்கான மாற்று வீரரை தேர்வுசெய்யும் முயற்சியிலும் இறங்கியுள்ளதாக கூறியுள்ளது.
இதுகுறித்து கிரிக்கெட் ஆஸ்திரேலியா வெளியிட்டுள்ள அறிக்கையில், “முதுகு வலி மற்றும் உடல்நிலை சரியில்லாத காரணங்களால் மிட்செல் மார்ஷ், வரவிருக்கும் ஐசிசி சாம்பியன்ஸ் கோப்பை தொடரில் இருந்து விலகியுள்ளார். காயத்திற்கு தேவையான சிகிச்சைகளை மிட்செல் மார்ஷ் மேற்கொண்ட நிலையிலும், அவரால் முழு உடற்தகுதியை எட்ட முடியாத காரணத்தால் தேசிய தேர்வுக் குழுவும் மற்றும் அணியின் மருத்துவக் குழு இணைந்து இந்த முடிவை எடுத்துள்ளனர்.
இதன் காரணமாக மிட்செல் மார்ஷ் தனது காயத்தில் இருந்து முழுமையாக குணமடையும் வரை ஓய்வில் இருக்க அறிவுறுத்தப்பட்டுள்ளார். இதனையடுத்து மிட்செல் மார்ஷுக்கு பதிலான மாற்று வீரரை தேர்வு செய்ய தேர்வுகுழு ஆர்வம் காட்டி வருகிறது. அதனடிப்படையில் சாம்பியன்ஸ் கோப்பை தொடருக்கான இறுதிசெய்யப்பட்ட அணியை கொடுக்கப்பட்டுள்ள காலகெடுக்குள் ஆஸ்திரேலிய கிரிக்கெட் வாரியம் அறிவிக்கும்” என்று அந்த அறிவிப்பில் தெரிவித்துள்ளது.
முன்னதாக இந்திய அணிக்கு எதிரான பார்டர் கவாஸ்கர் தொடரில் விளையாடிய மிட்செல் மார்ஷ், அதன்பின் மோசமான ஃபார்ம் காரணமாக டெஸ்ட் அணியில் இருந்து நீக்கப்பட்டார். அதன்பின் பிக் பேஷ் லீக் தொடரில் பெர்த் ஸ்கார்ச்சர்ஸ் அணியில் இணைந்து விளையாடி அவர், இலங்கை அணிக்கு எதிரான டெஸ்ட் தொடரிலிருந்தும் நீக்கப்பட்டிருந்தார் என்பது குறிப்பிடத்தக்கது.
ஆஸ்திரேலிய அணி: பாட் கம்மின்ஸ் (கேப்டன்), அலெக்ஸ் கேரி, நாதன் எல்லிஸ், ஆரோன் ஹார்டி, ஜோஷ் ஹேசில்வுட், டிராவிஸ் ஹெட், ஜோஷ் இங்கிலிஸ், மார்னஸ் லபுஷாக்னே, கிளென் மேக்ஸ்வெல், மேத்யூ ஷார்ட், ஸ்டீவ் ஸ்மித், மிட்செல் ஸ்டார்க், மார்கஸ் ஸ்டோய்னிஸ், ஆடம் ஜாம்பா.
Also Read: Funding To Save Test Cricket
ஆஸ்திரேலியா போட்டி அட்டவணை
- பிப்ரவரி 22 - ஆஸ்திரேலியா vs இங்கிலாந்து, லாகூர்
- பிப்ரவரி 25 - ஆஸ்திரேலியா vs தென் ஆப்பிரிக்கா, ராவல்பிண்டி
- பிப்ரவரி 28 - ஆஸ்திரேலியா vs ஆப்கானிஸ்தான், லாகூர்