சர்வதேச கிரிக்கெட்டில் புதிய மைல் கல்லை எட்டகாத்திருக்கும் மிட்செல் ஸ்டார்க்!

ஆஸ்திரேலிய - இந்திய அணிகளுக்கு இடையேயான பார்டர் - கவாஸ்கர் டெஸ்ட் தொடர் ஆஸ்திரேலியாவில் நடைபெற்று வருகிறது. மொத்தம் 5 போட்டிகள் கொண்ட இந்த தொடரில் இதுவரை நடந்து முடிந்துள்ள இரண்டு போட்டிகளின் முடிவில் இரு அணிகளும் தலா ஒரு வெற்றியைப் பதிவுசெய்து 1-1 என்ற கணக்கில் தொடரை சமன்செய்துள்ளன.

இதையடுத்து இரு அணிகளுக்கும் இடையேயான மூன்றாவது டெஸ்ட் போட்டி டிசம்பர் 14ஆம் தேதி பிரிஸ்பேனில் உள்ள காபா கிரிக்கெட் மைதானத்தில் நடைபெறவுள்ளது. இப்போட்டியில் வெற்றிபெறும் அணி தொடரில் முன்னிலைப் பெறும் என்பதால், இரு அணி வீரர்களும் தீவிரமாக தயாராகி வருகின்றனர். இந்நிலையில் இந்தப் போட்டியில் ஆஸ்திரேலிய அணி வேகப்பந்து வீச்சாளர் மிட்செல் ஸ்டார்க் சிறப்பு மைல் கல் ஒன்றை எட்டும் வாய்ப்பினைப் பெற்றுள்ளார். 

அதன்படி, இந்தப் போட்டியில் மிட்செல் ஸ்டார்க் 8 விக்கெட்டுகளை வீழ்த்தினால், சர்வதேச கிரிக்கெட்டில் ஆஸ்திரேலியாவுக்காக 700 விக்கெட்டுகளை அவர் பூர்த்தி செய்வார். இதன்மூலம் சர்வதேச கிரிக்கெட்டில் ஆஸ்திரேலிய அணிக்காக இந்த சாதனையை படைக்கும் நான்காவது வீரர் என்ற பெருமையையும் அவர் பெறுவார். மிட்செல் ஸ்டார்க் இதுவரை 283 போட்டிகளில் விளையாடி 366 இன்னிங்ஸ்களில் 692 விக்கெட்டுகளை வீழ்த்தியுள்ளார்.

ஆஸ்திரேலியாவுக்காக சர்வதேச கிரிக்கெட்டில் 700 அல்லது அதற்கு மேற்பட்ட விக்கெட்டுகளை வீழ்த்திய சாதனையை இதுவரை மூன்று பந்துவீச்சாளர்கள் மட்டுமே அடைந்துள்ளனர். அதன்படி முன்னாள் ஜாம்ப்வான்கள் ஷேன் வார்னே 338 போட்டிகளில் 999 விக்கெட்டுகளை வீழ்த்தி முதலிடத்திலும், கிளென் மெக்ராத் 375 போட்டிகளில் 948 விக்கெட்டுகளை வீழ்த்தி இரண்டாம் இடத்திலும் பிரெட் லீ 322 போட்டிகளில் 718 விக்கெட்டுகளை வீழ்த்தி மூன்றாம் இடத்தையும் பிடித்துள்ளனர். 

ஆஸ்திரேலிய அணி: பாட் கம்மின்ஸ் (கேப்டன்), ஸ்காட் போலண்ட், அலெக்ஸ் கேரி, ஜோஷ் ஹேசில்வுட், டிராவிஸ் ஹெட், ஜோஷ் இங்கிலிஸ், உஸ்மான் கவாஜா, மார்னஸ் லாபுஷாக்னே, நாதன் லையன், மிட்ச் மார்ஷ், நாதன் மெக்ஸ்வீனி, ஸ்டீவ் ஸ்மித், மிட்செல் ஸ்டார்க், பியூ வெப்ஸ்டர். 

Also Read: Funding To Save Test Cricket

இந்திய டெஸ்ட் அணி: ரோஹித் சர்மா (கே), ஜஸ்பிரித் பும்ரா, யஷஸ்வி ஜெய்ஸ்வால், அபிமன்யு ஈஸ்வரன், ஷுப்மான் கில், விராட் கோலி, கேஎல் ராகுல், ரிஷப் பந்த், சர்ஃப்ராஸ் கான், துருவ் ஜூரல், ரவிச்சந்திரன் அஸ்வின், ரவீந்திர ஜடேஜா, முகமது சிராஜ், ஆகாஷ் தீப், பிரசித் கிருஷ்ணா, ஹர்ஷித் ராணா, நிதிஷ் குமார் ரெட்டி, வாஷிங்டன் சுந்தர்.