முத்தரப்பு ஒருநாள் தொடர்: முகமது நவாஸ் அபார பந்துவீச்சு; சாம்பியன் பட்டத்தை வென்றது பாகிஸ்தான்!

T20I Tri Series: ஆஃப்கானிஸ்தானுக்கு எதிரான போட்டியில் பாகிஸ்தானின் முகமது நவாஸ் 5 விக்கெட்டுகளை கைப்பற்றியதுடன், முத்தரப்பு தொடரின் தொடர் நாயகன் விருதையும் வென்று அசத்தியுள்ளார்.

பாகிஸ்தான், ஆஃப்கானிஸ்தான் அணிகள் யுஏஇ அணியுடன் முத்தரப்பு டி20 தொடரில் விளையாடி வருகின்றன. இந்த முத்தரப்பு டி20 தொடரின் இறுதிப்போட்டிக்கு ஆஃப்கானிஸ்தான் மற்றும் பாகிஸ்தான் அணிகள் முன்னேறியுள்ளன. நேற்று ஷார்ஜாவில் நடைபெற்ற இறுதிப்போட்டியில் டாஸ் வென்று முதலில் பேட்டிங் செய்த பாகிஸ்தான் அணிக்கு தொடக்கம் சரியாக அமையவில்லை. அணியின் தொடக்க வீரர் சாகிப்சதா ஃபர்ஹான் ரன்கள் ஏதுமின்றியும், சைம் அயுப் 19 ரன்னிலும் என விக்கெட்டுகளை இழந்து ஏமாற்றமளித்தனர்.

பின்னர் களமிறங்கிய ஃபகர் ஸமான்-கேப்டன் சல்மான் ஆகா இணை ஓரளவு தாக்குப்பிடித்து அணியின் ஸ்கோரை உயர்த்தும் முயற்சியில் இறங்கினர். இதில் ஸமான் 27 ரன்னிலும், சல்மான் ஆகா 24 ரன்னிலும் விக்கெட்டை இழக்க, அடுத்து களமிறங்கிய ஹசன் நவாஸ் 15 ரன்னிலும், முகமது ஹாரிஸ் 2 ரன்னிலும், முகமது நவாஸ் 25 ரன்னிலும் என ஆட்டமிழந்தனர். இதன் காரணமாக பாகிஸ்தான் அணி 20 ஓவர்கள் முடிவில் 8 விக்கெட்டுகள் இழப்பிற்கு 141 ரன்களை மட்டுமே எடுத்தது. ஆஃப்கானிஸ்தான் தரப்பில் கேப்டன் ரஷித் கான் 3 விக்கெட்டுகளை கைப்பற்றினார். 

இதனையடுத்து இலக்கை நோக்கி விளையாடிய ஆஃப்கானிஸ்தான் அணி எதிரணியின் பந்துவீச்சை சமாளிக்க முடியாமல் விக்கெட்டுகளை இழந்தது. அணியின் டாப் ஆர்டர் வீரர்கள் ரஹ்மனுல்லா குர்பாஸ் 5 ரன்னிலும், செதிகுல்லா அடல் 15 ரன்னிலும், இப்ராஹிம் ஸத்ரான் 9 ரன்னிலும், ரசூலி, ஒமர்சாய், கரிம் ஜானத் ஆகியோர் ரன்கள் ஏதுமின்றியும் என அடுத்தடுத்து விக்கெட்டுகளை இழந்து பெவிலியனுக்கு திரும்பினர். பின்னர் களமிறங்கிய வீரர்களில் கேப்டன் ரஷித் கான் 17 ரன்களைச் சேர்த்ததை தவிர்த்து மற்ற அனைவரும் சொற்ப ரன்களில் நடையைக் கட்டினர். 

Also Read: LIVE Cricket Score

இதனால் ஆஃப்கானிஸ்தான் அணி 15.5 ஓவர்களில் அனைத்து விக்கெட்டுகளையும் இழந்து 66 ரன்களுக்கு ஆல் அவுட்டானது. பாகிஸ்தான் தரப்பில் அபாரமான பந்துவீச்சை வெளிப்படுத்திய முகமது நவாஸ் 5 விக்கெட்டுகளை கைப்பற்றினார். இதன் மூலம் பாகிஸ்தான் அணி 75 ரன்கள் வித்தியாசத்தில் ஆஃப்கானிஸ்தானை வீழ்த்தி வெற்றி பெற்றதுடன், முத்தரப்பு டி20 தொடரில் சாம்பியன் பட்டத்தையும் வென்றது. மேலும் இப்போட்டியின் ஆட்டநாயகன் மற்றும் தொடர் நாயகன் விருதை பாகிஸ்தான் அணியின் முகமது நவாஸ் கைப்பற்றினார்.