முன்னணி வீரர்கள் காயம்; வாய்ப்பை தக்கவைப்பாரா நாதன் எல்லிஸ்!

ஆஸ்திரேலிய அணியானது ஸ்காட்லாந்தில் சுற்றுப்பயணம் செய்து 3 போட்டிகள் கொண்ட டி20 தொடரில் விளையாடவுள்ளது. இதில் இரு அணிகளுக்கும் இடையேயான முதலாவது டி20 போட்டியானது நாளை எடின்பர்க்கில் நடைபெறவுள்ளது. மேலும் இவ்விரு அணிகளும் இதற்கு முன் நடந்து முடிந்த டி20 உலகக்கோப்பை தொடரில் நேருக்கு நேர் மோதின. இதில் ஸ்காட்லாந்தை வீழ்த்தி ஆஸ்திரேலிய அணி வெற்றியைப் பதிவுசெய்திருந்தது.

இதனையடுத்து ஆஸ்திரேலிய அணியானது முதல் முறையாக ஸ்காட்லாந்தில் சுற்றுப்பயணம் மேற்கொண்டு டி20 தொடரில் விளையாடுகிறது. இதனால் இப்போட்டியின் மீதான எதிர்பார்ப்புகள் ரசிகர்கள் மத்தியில் அதிகரித்துள்ளன. மேலும் இத்தொடர்களுக்கான இரு அணி வீரர்களும் சமீபத்தில் அறிவிக்கப்பட்டு, முதல் போட்டிககக தீவிரமாக தயாராகி வருகின்றன. அதேசமயம் ஆஸ்திரேலிய அணியானது தொடர் தொடங்கு வதற்கு முன்னரே சில பின்னடைவையும் சந்தித்தது. 

அதன்படி அணியின் அனுபவ வேகப்பந்து வீச்சாளர் ஜோஷ் ஹசில்வுட் காயம் காரணமாக இத்தொடரில் இருந்து விலகினார். இதன் காரணமாக ஸ்காட்லாந்து அணிக்கு எதிரான இந்த டி20 தொடரில் ஆஸ்திரேலிய அணியின் முன்னணி வேகப்பந்து வீச்சாளராக அணியின் அனுபவம் வாய்ந்த வேகப்பந்து வீச்சாளராக எல்லிஸ் செயல்படவுள்ளார். ஏனெனில் பாட் கம்மின்ஸ், மிட்செல் ஸ்டார்க் மற்றும் ஜோஷ் ஹேசில்வுட் ஆகியோர் பணிச்சுமை மற்றும் காயம் காரணமாக இத்தொடரில் இடம்பிடிக்கவில்லை. 

எனவே, 17 டி20 போட்டிகளில் விளையாடியுள்ள நாதன் எல்லிஸ் தான் தற்போது ஆஸ்திரேலிய வேகப்பந்து வீச்சில் அனுபவம் வாய்ந்த வீரராக உள்ளார். இந்நிலையில் இதுகுறித்து பேசிய நாதன் எல்லிஸ், "உண்மையைச் சொல்வதென்றால், நான் என்னை அப்படிப் பார்க்கவில்லை. அதனால் கேட்பதற்கு விசித்திரமாக இருக்கிறது. நான் நீண்ட நாட்களாக திட்டமிட்டிருந்த தொடர்களில் இதுவும் ஒன்று. ஏனெனில் இத்தொடரில் எனக்கு வாய்ப்பு கிடைக்கும் என்பது எனக்குத் தெரியும்.

Also Read: Funding To Save Test Cricket

ஒவ்வொரு முறையும் நான் ஆஸ்திரேலிய ஜெர்சியை அணியும்போது நான் உற்சாகமாக விளையாடுவேன், அதனால் எவ்வளவு நேரம் அதை அணியமுடிகிறதோ அவ்வளவு நல்லது” என்று தெரிவித்துள்ளார். சமீபத்தில் நடந்த டி20 உலகக் கோப்பை தொடரின் போது ஆஸ்திரேலிய அணியின் ஒரு பகுதியாக எல்லிஸ் இருந்தார். ஆனால் கம்மின்ஸ், ஸ்டார்க், ஹேசில்வுட் ஆகியோர் இருந்ததால், அவருக்கு அணியின் பிளேயிங் லெவனில் வாய்ப்பு கிடைக்கவில்லை என்பது குறிப்பிடத்தக்கது.