நியூசிலாந்து அணி ஜிம்பாப்வேவில் சுற்றுப்பயணம் செய்து இரண்டு போட்டிகள் கொண்ட டெஸ்ட் தொடரில் விளைடாடி வருகிறது. இதில் நடந்து முடிந்த முதல் டெஸ்ட் போட்டியில் நியூசிலாந்து அணி வெற்றி பெற்றதுடன் 1-0 என்ற கணக்கில் தொடரிலும் முன்னிலைப் பெற்றுள்ளது.
இதனையாடுத்து இரு அணிகளுக்கும் இடையேயான இரண்டாவது டெஸ்ட் போட்டி இன்று புலவாயோவில் உள்ள குயின்ஸ் போட்ர்ட்ஸ் கிளப் மைதானத்தில் நடைபெற்றது. இப்போட்டியில் டாஸ் வென்ற நியூசிலாந்து அணி முதலில் பந்துவீசுவதாக அறிவித்தது. அதன்படி களமிறங்கிய ஜிம்பாப்வே அணிக்கு பிரையன் பென்னட் - பிராண்டான் டெய்லர் இணை தொடக்கம் கொடுத்தனர். இதில் பென்னட் ரன்கள் ஏதுமின்றி ஆட்டமிழக்க, அடுத்து வந்த நிக் வெல்ச் 11 ரன்னிலும், சீன் வில்லியம்ஸ் 11 ரன்னிலும், கேப்டன் கிரேய்க் எர்வின், சிக்கந்தர் ரஸா உள்ளிட்டோரும் சொற்ப ரன்களுக்கு விக்கெட்டுகளை இழந்தனர்.
அதேசமயம் 4 ஆண்டுகளுக்கு பிறகு சர்வதேச கிரிக்கெட்டில் கம்பேக் கொடுத்த பிராண்டன் டெய்லர் 44 ரன்களில் அவுட்டாகி அரைசதம் அடிக்கும் வாய்ப்பை தவறவிட்டார். பின்னர் களமிறங்கிய வீரர்களில் தஃபத்ஸ்வா சிகா 33 ரன்களைச் சேர்த்ததை தவிர்த்து மற்ற வீரர்கள் சோபிக்க தவறியதால் அந்த அணி 125 ரன்களிலேயே அனைத்து விக்கெட்டுகளையும் இழந்தது. நியூசிலாந்து அணி தரப்பில் அபாரமான பந்துவீச்சை வெளிப்படுத்திய மேட் ஹென்றி 5 விக்கெட்டுகளையும், ஸகாரி ஃபால்க்ஸ் 4 விக்கெட்டுகளையும், மேத்யூ ஃபிஷர் ஒரு விக்கெட்டையும் கைப்பற்றினார்.
அதன்பின் முதல் இன்னிங்ஸைத் தொடங்கிய நியூசிலாந்து அணிக்கு வில் யங் - டெவான் கான்வே இணை தொடக்கம் தந்தனர். இந்த இன்னிங்ஸில் இருவரும் அபாரமாக விளையாடியதுடன் அணியின் ஸ்கோரையும் மளமளவென உயர்த்தினர். மேற்கொண்டு இருவரும் தங்களின் அரைசதங்களையும் பூர்த்தி செய்து அசத்தினர். இதன்மூலம் நியூசிலாந்து அணி முன்னிலைப் பெற்றது. அதன்பின் இருவரது பார்ட்னர்ஷிப்பும் 162 ரன்களை எட்டிய நிலையில் வில் யங் 11 பவுண்டரிகளுடன் 74 ரன்களைச் சேர்த்த கையோடு தனது விக்கெட்டை இழந்தார்.
Also Read: LIVE Cricket Score
அடுத்து வந்த ஜேக்கப் டஃபி நிதானமாக விளையாடி விக்கெட் இழப்பை தடுத்தார். இதன் காரணமாக நியூசிலாந்து அணி முதல்நாள் ஆட்டநேர முடிவில் ஒரு விக்கெட்டை மட்டுமே இழந்து 174 ரன்களை அடித்துள்ளது. இதில் டெவான் கான்வே 79 ரன்களையும், ஜேக்கப் டஃபி 8 ரன்களையும் எடுத்துள்ளனர். ஜிம்பாப்வே தரப்பில் ட்ரெவர் குவாண்டு ஒரு விக்கெட்டை வீழ்த்தினார். இதனையடுத்து 49 ரன்கள் முன்னிலையுடன் நியூசிலாந்து அணி நாளை இரண்டாம் நாள் ஆட்டத்தை தொடரவுள்ளது.