CT2025: பாகிஸ்தான் அணி அறிவிப்பு; கம்பேக் கொடுக்கும் ஃபகர் ஸமான்!
ஐசிசியின் சாம்பியன்ஸ் கோப்பை கிரிக்கெட் தொடரின் நடப்பு சீசன் எதிர்வரும் பிப்ரவரி 19 ஆம் தேதி பாகிஸ்தான் மற்றும் ஐக்கிய அரபு அமீரகத்தில் தொடங்க உள்ளது. மொத்தம் 8 அணிகள் பங்கேற்கும் இத்தொடரில் எந்த அணி சாம்பியன் பட்டத்தை வெல்லும் என்ற எதிர்பார்ப்புகள் நாளுக்கு நாள் அதிகரித்துள்ளன. மேலும் இத்தொடரில் பங்கேற்கும் அணிகள் இரு குழுக்களாக பிரிக்கப்பட்டுள்ளன.
இதில் குரூப் ஏ பிரிவில் இந்தியா, பாகிஸ்தான், நியூசிலாந்து மற்று வங்கதேச அணிகளும், குரூப் பி பிரிவில் ஆஸ்திரேலியா, இங்கிலாந்து, தென் ஆப்பிரிக்கா மற்றும் ஆஃப்கானிஸ்தான் அணிகளும் இடம்பிடித்துள்ளன. மேற்கொண்டு இத்தொடருக்கான அணிகள் அடுத்தடுத்து அறிவிக்கப்பட்ட நிலையில், பாகிஸ்தானை தவிர்த்து மற்ற அனைத்து கிரிக்கெட் வாரியங்களும் தங்கள் அணிகளை அறிவிக்கப்பட்டிருந்தது.
இந்நிலையில் நடப்பு சாம்பியன்ஸ் கோப்பை கிரிக்கெட் தொடரை நடத்தும் பாகிஸ்தான் கிரிக்கெட் வாரியம் இத்தொடரில் பங்கேற்கும் முகமது ரிஸ்வான் தலைமையிலான 15 பேர் அடங்கிய அணியை இன்று அறிவித்துள்ளது. இதில் சமீப காலங்களாக பாகிஸ்தான் அணியில் இடம்பிடிக்க முடியாமல் தடுமாறி வந்த ஃபகர் ஸமான், ஃபஹீம் அஷ்ரஃப், குஷ்தில் ஷா மற்றும் சௌத் ஷகீல் ஆகியோர் இத்தொடருக்கான அணியில் இடம்பிடித்துள்ளனர்.
முன்னதாக பாகிஸ்தான் அணியின் இளம் நட்சத்திர வீரர் சைம் அயூப் தென் ஆப்பிரிக்க தொடரின் போது காயமடைந்து அதற்கான சிகிச்சையில் உள்ள காரணத்தால், இத்தொடரில் இருந்தும் அவர் விலகியுள்ளார். மேற்கொண்டு சமீப காலங்களில் பாகிஸ்தான் ஒருநாள் அணியில் விளையாடி வந்த அப்துல்லா ஷஃபிக், இர்ஃபான் கான் மற்றும் சுஃபியான் முகீம் உள்ளிட்டோருக்கு இந்த அணியில் இடம் கிடைக்கவில்லை.
இதுதவிர்த்து நட்சத்திர வீரர்கள் பாபர் ஆசாம், ஷாஹீன் அஃப்ரிடி, நசீம் ஷா, ஹாரிஸ் ராவுஃப் உள்ளிட்டோரும் இந்த அணியில் இடம்பிடித்துள்ளனர். இதுதவிர்த்து எதிர்வரும் சாம்பியன்ஸ் கோப்பை தொடரில் சூழ்நிலைகள், எதிர்ப்பு மற்றும் போட்டி உத்தி போன்ற பல்வேறு காரணிகளைப் பொறுத்து, ஃபகர் ஸமானுடன் மற்றொரு தொடக்க வீரராக பாபர் அசாம் அல்லது சவுத் ஷகீல் களமிறங்குவார்கள் என்று பாகிஸ்தான் கிரிக்கெட் வாரியம் அறிவித்துள்ளது.
Also Read: Funding To Save Test Cricket
பாகிஸ்தான் அணி: முகமது ரிஸ்வான் (கேப்டன்), பாபர் அசாம், ஃபகார் ஜமான், கம்ரான் குலாம், சவுத் ஷகீல், தையாப் தாஹிர், ஃபஹீம் அஷ்ரஃப், குஷ்தில் ஷா, சல்மான் அலி ஆகா, உஸ்மான் கான், அப்ரார் அகமது, ஹாரிஸ் ரவூஃப், முகமது ஹஸ்னைன், நசீம் ஷா, ஷாஹீன் ஷா அஃப்ரிடி.