PAK vs NZ: முதலிரண்டு போட்டிகளை தவறவிடும் ஷாஹின் அஃப்ரிடி; காரணம் என்ன?

ஐசிசி டி20 உலகக்கோப்பை கிரிக்கெட் தொடர் இந்தாண்டு ஜூன் மாதம் அமெரிக்கா மற்றும் வெஸ்ட் இண்டீஸில் நடைபெறவுள்ளது. மொத்தம் 20 அணிகள் பங்கேற்கும் இத்தொடரில் எந்த அணி கோப்பையை வெல்லும் என்ற எதிர்பார்ப்புகள் அதிகரித்துள்ளன. இத்தொடருக்கான அனைத்து அணிகளும் மற்ற நாடுகளுக்கு சுற்றுப்பயணம் மேற்கொண்டு டி20 தொடர்களில் விளையாடி உலகக்கோப்பை தொடருக்காக தங்களைத் தயார்ப்படுத்தி வருகிறது.

அந்தவகையில், நியூசிலாந்து அணி பாகிஸ்தானில் சுற்றுப்பயணம் மேற்கொண்டு 5 போட்டிகாள் கொண்ட டி20 தொடரில் விளையாடவுள்ளது. அதன்படி இவ்விரு அணிகளுக்கும் இடையேயான இந்த டி20 தொடரானது வரும் ஏப்ரல் 18ஆம் தேதி முதல் தொடங்கவுள்ளது. மேலும் இத்தொடருக்கான மைக்கேல் பிரேஸ்வெல் தலைமையிலான நியூசிலாந்து டி20 அணியும் சமீபத்தில் அறிவிக்கப்பட்டுள்ளது. 

இதைத்தொடர்ந்து பாபர் ஆசாம் தலைமையில் இத்தொடரை எதிர்கொள்ளும் அணியும் அறிவிக்கப்பட்டது. இதில் சர்வதேச கிரிக்கெட்டிலிருந்து ஓய்வு முடிவை திரும்பப்பெற்ற முகமது அமீர் மற்றும் இமாத் வசிம் ஆகியோருக்கும் இந்த அணியில் இடம் கிடைத்துள்ளது. அதேபோல் காயத்திலிருந்து மீண்ட நஷீம் ஷாவும் இத்தொடருக்கான பாகிஸ்தான் அணியில் சேர்க்கப்பட்டுள்ளார். 

இந்நிலையில் இத்தொடரின் முதலிரண்டு போட்டிக்கான பாகிஸ்தான் அணியில் நட்சத்திர வேகப்பந்து வீச்சாளர் ஷாஹின் அஃப்ரிடி பணிச்சுமை காரணமாக இடம்பெறமாட்டார் என்ற தகவல் வெளியாகியுள்ளது. ஏனெனில் பாகிஸ்தான் அணி அடுத்தடுத்த தொடர்களில் விளையாடவுள்ளதால், வீரர்கள் தங்களது பணிச்சுமையை குறைக்கும் வகையில் இந்த முடிவு எடுக்கப்பட்டுள்ளதாக பாகிஸ்தான் கிரிக்கெட் வாரியம் தரப்பில் தெரிவிக்கப்பட்டுள்ளது. 

முன்னதாக ஒருநாள் உலகக்கோப்பை தொடருக்கு பிறகு தனது கேப்டன்சியிலிருந்து பாபர் ஆசாம் விலகியதையடுத்து, ஷாஹின் அஃப்ரிடி அணியின் புதிய கேப்டனாக நியமிக்கப்பட்டார். ஆனால் அவரது தலைமையில் கீழ் பாகிஸ்தான் அணி படு தோல்வியைச் சந்தித்ததால், மீண்டும் பாகிஸ்தான் டி20 அணியின் கேப்டனாக பாபர் ஆசாம் நியமிக்கப்பட்டது குறிப்பிடத்தக்கது. 

பாகிஸ்தான் டி20 அணி: பாபர் ஆசாம் (கேப்டன்), அப்ரார் அகமது, அசாம் கான், ஃபகார் ஸமான், இஃப்திகார் அகமது, இமாத் வாசிம், அப்பாஸ் அஃப்ரிடி, முகமது ரிஸ்வான், முகமது அமீர், இர்ஃபான் கான் நியாசி, நசீம் ஷா, சைம் அயூப், ஷதாப் கான், ஷஹீன் அஃப்ரிடி, உசாமா மிர், உஸ்மான் கான், ஸமான் கான்.