அயர்லாந்தில் சுற்றுப்பயணம் மேற்கொள்ளும் பாகிஸ்தான் அணி!

ஐசிசி டி20 உலகக்கோப்பை கிரிக்கெட் தொடர் இந்தாண்டு ஜூன் மாதம் அமெரிக்கா மற்றும் வெஸ்ட் இண்டீஸில் நடைபெறவுள்ளது. மொத்தம் 20 அணிகள் பங்கேற்கும் இத்தொடரில் எந்த அணி கோப்பையை வெல்லும் என்ற எதிர்பார்ப்புகள் அதிகரித்துள்ளன. மேலும் இத்தொடருக்கான போட்டி அட்டவணை மற்றும் குழுக்களை ஐசிசி சமீபத்தில் அறிவித்தது. அதன்படி இத்தொடரானது ஜூன் 01ஆம் தேதி முதல் கோலாகலமாக தொடங்கவுள்ளது.

இத்தொடருக்கான அனைத்து அணிகளும் மற்ற நாடுகளுக்கு சுற்றுப்பயணம் மேற்கொண்டு டி20 தொடர்களில் விளையாடி உலகக்கோப்பை தொடருக்காக தங்களைத் தயார்ப்படுத்தி வருகிறது. அந்தவகையில், நியூசிலாந்து அணி பாகிஸ்தானில் சுற்றுப்பயணம் மேற்கொண்டு 5 போட்டிகாள் கொண்ட டி20 தொடரில் விளையாடவுள்ளது. அதன்படி இவ்விரு அணிகளுக்கும் இடையேயான இந்த டி20 தொடரானது வரும் ஏப்ரல் 18ஆம் தேதி முதல் தொடங்கும் என அறிவிக்கப்பட்டுள்ளது. 

இதனையடுத்து பாகிஸ்தான் அணி வரும் மே மாதம் அயர்லாந்தில் சுற்றுப்பயணம் மேற்கொண்டு மூன்று போட்டிகள் கொண்ட டி20 தொடரில் விளையாடவுள்ளது. இதன்மூலம் 2018ஆம் ஆண்டுக்கு பின் பாகிஸ்தான் அணி அயர்லாந்தில் சுற்றுப்பயணம் மேற்கொள்ளவுள்ளது. அதன்படி இவ்விரு அணிகளுக்கும் இடையேயான இத்தொடரானது மே 10ஆம் தேதி தொடங்கி, மே 14ஆம் தேதி முடிவடையவுள்ளது. இத்தொடரின் அனைத்து போட்டிகளும் டப்ளினில் நடைபெறவுள்ளது. 

அயர்லாந்து - பாகிஸ்தான் தொடர்

• மே 10: முதல் டி20, டப்ளின்
• மே 12 இரண்டாவது டி20, டப்ளின்
• மே 14: மூன்றாவது டி20, டப்ளின்