ஐசிசி டெஸ்ட் தரவரிசை: விராட் கோலியை பின்னுக்கு தள்ளிய ரிஷப் பந்த்!

இந்தியாவில் சுற்றுப்பயணம் செய்துவரும் நியூசிலாந்து அணியானது மூன்று போட்டிகள் கொண்ட டெஸ்ட் தொடரில் விளையாடி வருகிறது. இத்தொடரின் முதல் டெஸ்ட் போட்டியானது பெங்களூருவில் உள்ள எம் சின்னசாமி கிரிக்கெட் மைதானத்தில் நடந்து முடிந்துள்ளது. இப்போட்டியில் நியூசிலாந்து அணி 8 விக்கெட் வித்தியாசத்தில் வெற்றிபெற்று அசத்தியதுடன், 1-0 என்ற கணக்கில் தொடரிலும் முன்னிலைப் பெற்றுள்ளது.

இதனைத்தொடர்ந்து இந்தியா - நியூசிலாந்து அணிகளுக்கு இடையேயான இரண்டாவது டெஸ்ட் போட்டி இன்று (அக்டோபர் 24) புனேவில் உள்ள மகாராஷ்டிரா கிரிக்கெட் சங்க மைதானத்தில் நடைபெறவுள்ளது. இந்நிலையில் சர்வதேச கிரிக்கெட் கவுன்சிலானது டெஸ்ட் வீரர்களுக்கான புதுபிக்கப்பட்ட தரவரிசைப் பட்டியலை வெளியிட்டுள்ளது. அதன்படி பேட்டர்களுக்கான தரவரிசைப் பட்டியலில் இங்கிலாந்தின் ஜோ ரூட் முதலிடத்தை தக்கவைத்துள்ளார். அவரைத்தொடர்ந்து நியூசிலாந்தின் கேன் வில்லியம்சன் இரண்டாம் இடத்தில் உள்ள நிலையில், இங்கிலாந்தின் ஹாரி புரூக் ஒரு இடம் பின் தங்கி மூன்றாம் இடத்திற்கு தள்ளப்பட்டுள்ளார்.

மேற்கொண்டு இந்திய வீரர் யஷஸ்வி ஜெய்ஸ்வால் நான்காம் இடத்திலும், ஆஸ்திரேலியாவின் ஸ்டீவ் ஸ்மித் 5ஆம் இடத்திலும் நீடிக்கும் நிலையில், நியூசிலாந்துக்கு எதிரான டெஸ்ட் போட்டியில் சிறப்பாக செயல்பட்ட ரிஷப் பந்த் 3 இடங்கள் முன்னேறி 6ஆம் இடத்தைப் பிடித்துள்ளார். மறுபக்கம் இந்திய அணியின் நட்சத்திர வீரர் விராட் கோலி ஒரு இடம் பின் தங்கி 8ஆம் இடத்திற்கு தள்ளப்பட்டுள்ளார். மேலும் ரோஹித் சர்மா 2 இடங்கள் பின் தங்கி 15ஆம் இடத்திற்கு தள்ளப்பட்டுள்ள நிலையில், நியூசிலாந்தின் ரச்சின் ரவீந்திர 36 இடங்கள் முன்னேறி 18ஆம் இடத்தைப் பிடித்து அசத்தியுள்ளார். 

இதுதவிர்த்து பந்துவீச்சாளர்களுக்கான தரவரிசைப் பட்டியலில் பெரிதளில் எந்த மாற்றமும் இன்றி இந்திய வீரர்கள் ஜஸ்பிரித் பும்ரா முதலிடத்திலும், ரவிச்சந்திரன் அஸ்வின் இரண்டாம் இடத்திலும் தொடர்கின்றனர்.மேற்கொண்டு இந்த தரவரிசை பட்டியலில் ரவீந்திர ஜடேஜா 6ஆம் இடத்தில் தொடர்கிறார். அதேசமயம் ஆஸ்திரேலியாவின் நதன் லையன் ஒரு இடம் முன்னேறி 6ஆம் இடத்தையும், இலங்கையின் பிரபாத் ஜெயசூர்யா ஆகியோரும் 6ஆம் இடத்தை பகிர்ந்துள்ளனர். இந்த பட்டியலில் குல்தீப் யாதவ் ஒரு இடம் முன்னேறி 15ஆம் இடத்தைப் பிடித்துள்ளார் என்பது குறிப்பிடத்தக்கது. 

Also Read: Funding To Save Test Cricket

இதுதவிர்த்து ஆல் ரவுண்டர்களுக்கான தரவரிசைப் பட்டியலில் இந்திய அணியின் ரவீந்திர ஜடேஜா முதலிடத்திலும், ரவிச்சந்திரன் அஸ்வின் இரண்டாம் இடத்திலும் நீடிக்கும் நிலையில், வங்கதேச அணியின் ஆல் ரவுண்டர் ஷாகிப் அல் ஹசனும் ஒரு இடம் முன்னேறி மூன்றாம் இடத்தைப் பிடித்துள்ளார். மறுபக்கம் இங்கிலாந்து அணியின் ஜோ ரூட் ஒரு இடம் பின் தங்கி நான்காம் இடத்திற்கு தள்ளப்பட்டுள்ளார். மேற்கொண்டு இந்திய அணியின் அக்ஸர் படேல் 7ஆம் இடத்தைப் பிடித்துள்ள நிலையில் வேறெந்த இந்திய வீரர்களும் டாப் 10 இடங்களில் இல்லை என்பது குறிப்பிடத்தக்கது.