இங்கிலாந்து - ஆஸ்திரேலிய அணிகளுக்கு இடையேயான பாரம்பரியமிக்க ஆஷஸ் டெஸ்ட் தொடர் சமீபத்தில் நடைபெற்று முடிந்தது. ஐந்து போட்டிகள் கொண்ட இத்தொடரில் இரு அணிகளும் தலா 2 வெற்றிகளைப் பெற்று தொடரை சமன்செய்தன. இருப்பினும் கடந்த முறை ஆஸ்திரேலிய அணி ஆஷஸ் தொடரை வென்றதால், தற்போது ஆஷஸ் கோப்பையானது ஆஸ்திரேலிய அணியிடம் வழங்கப்பட்டுள்ளது.
இதையடுத்து ஆஸ்திரேலிய அணியானது தற்போது இந்தியாவில் நடைபெறவுள்ள ஒருநாள் உலகக்கோப்பை கிரிக்கெட் தொடருக்கு தயாராகும் வேலைகளில் ஈடுபட்டுவருகிறது. அதன் ஒரு பகுதியாக ஆஸ்திரேலிய அணி தென் ஆப்பிரிக்கா மற்றும் இந்திய அணிகளுடன் விளையாடவுள்ளது. இதில் தென் ஆப்பிரிக்காவுக்கு எதிராக 3 டி20 மற்றும் 5 ஒருநாள் போட்டிகளிலும், இந்தியாவுக்கு எதிராக 3 ஒருநாள் போட்டிகளிலும் ஆஸ்திரேலிய அணி விளையாடவுள்ளது.
இந்நிலையில் தென் ஆப்பிரிக்கா மற்றும் இந்திய அணிக்கு எதிராக விளையாட இருக்கும் ஆஸ்திரேலியா ஒரு நாள் மற்றும் டி20 அணிகளை அதன் கிரிக்கெட் வாரியம் இன்னும் ஓரிரு நாட்களில் அறிவிக்க உள்ளது . இதில் ஆஸ்திரேலிய அணிக்கு மிகப்பெரிய பின்னடைவை ஏற்படுத்தும் விதமாக அந்த அணியின் கேப்டன் பாட் கம்மின்ஸ் தென் ஆப்பிரிக்கா மற்றும் இந்தியாவிற்கு எதிராக விளையாட உள்ள போட்டிகளில் பங்கேற்பதில் சந்தேகம் உள்ளதாக ஆஸ்திரேலியா அணி வட்டாரங்கள் தெரிவிக்கின்றன .
சமீபத்தில் நடந்து முடிந்த ஆஷஸ் டெஸ்ட் தொடரின் இறுதி டெஸ்ட் போட்டியின் முதல் நாளின் போது அவருக்கு மணிக்கட்டில் காயம் ஏற்பட்டது. அந்த காயத்து உடனே டெஸ்ட் போட்டி முழுவதையும் விளையாடினார். இந்த காயம் காரணமாக அவருக்கு பந்து வீசுவதில் எந்தவித சிரமமும் இல்லை என்றாலும் பேட்டிங்கின் போது அவருக்கு வலி இருந்ததை நாம் காண முடிந்தது. மேலும் அவருக்கு சிறிய அளவிலான முறிவு ஏற்பட்டிருக்கலாம் என ஆஸ்திரேலியா அணியின் மருத்துவர்கள் சந்தேகிக்கின்றனர்.
இது தொடர்பான மருத்துவ அறிக்கை வந்த பிறகு அவர் உலகக்கோப்பை போட்டியில் பங்கேற்பாரா என்பது குறித்து தெளிவான தகவல்கள் தெரியவரும் . இந்த மாத இறுதியில் தென் ஆப்பிரிக்கா சுற்றுப்பயணம் மேற்கொள்ள இருக்கும் ஆஸ்திரேலியா அங்கு மூன்று டி20 போட்டிகள் மற்றும் ஐந்து ஒருநாள் போட்டிகளை கொண்ட தொடரில் விளையாட இருக்கிறது. இந்தத் தொடரிலும் இதனைத் தொடர்ந்து இந்தியாவில் நடைபெற இருக்கும் மூன்று ஒரு நாள் போட்டிகளை கொண்ட தொடரிலும் பாட் கம்மின்ஸ் இடம்பெற மாட்டார் என்று தகவல்கள் தெரிவிக்கின்றன.
இந்த இரண்டு சுற்று பயணங்களின் போதும் ஆஸ்திரேலியா அணியின் ஆல்ரவுண்டரான மிட்சல் மார்ஷ் கேப்டனாக செயல்படுவார் என்றும் தகவல்கள் தெரிவிக்கின்றன. எனினும் ஆஸ்திரேலியா அணி அறிவிக்கப்பட்ட பின்னரே இது குறித்து உறுதியான தகவல்கள் தெரியவரும்.