ஐசிசி ஆடவர் சாம்பியன்ஸ் கோப்பை கிரிக்கெட் தொடரின் 2025ஆம் ஆண்டு சீசன் இறுதிக்கட்டத்தை எட்டியுள்ளது. இதில் குரூப் ஏ பிரிவில் இருந்து இந்தியா மற்றும் நியூசிலாந்து அணிகள் அரையிறுதிச்சுற்றுக்கு முன்னேறியுள்ளன.
அதேசமயம் குரூப் பி பிரிவில் இருந்து எந்த இரு அணிகள் அரையிறுதிக்கு முன்னேறும் என்ற எதிர்பார்ப்புகள் அதிகரித்துள்ளன. இந்நிலையில் நாளை நடைபெறும் 10ஆவது லீக் போட்டியில் ஆஃப்கானிஸ்தான் மற்றும் ஆஸ்திரேலிய அணிகள் தங்களின் கடைசி லீக் போட்டியில் விளையாடவுள்ளனர். இவ்விரு அணிகளுக்கும் இடையேயான இப்போட்டியானது லாகூரில் உள்ள கடாஃபி கிரிக்கெட் மைதானத்தில் நடைபெறவுள்ளது.
இப்போட்டியில் வெற்றிபெறும் அணி அரையிறுதிக்கு முன்னேறும் என்பதால், இந்த வாழ்வா சாவா ஆட்டத்தில் எந்த அணி வெற்றிபெறும் என்ற எதிர்பார்ப்புகள் அதிகரித்துள்ளன. இந்நிலையில் ஆஸ்திரேலியாவுக்கு எதிரான சாம்பியன்ஸ் கோப்பை லீக் போட்டியில் ஆஃப்கானிஸ்தான் கிரிக்கெட் அணியின் நட்சத்திர சுழற்பந்து வீச்சாளர் ரஷித் கான் புதிய வரலாறு படைக்கும் வாய்ப்பைப் பெற்றுள்ளார்.
ஒருநாள் போட்டியில் 200 விக்கெட்டுகள்
இந்தப் போட்டியில் ரஷித் கான் ஒரு விக்கெட்டை கைப்பற்றினால் சர்வதேச ஒருநாள் போட்டிகளில் தனது 200 விக்கெட்டுகளை நிறைவு செய்வதுடன், இந்த எண்ணிக்கையை எட்டிய முதல் ஆஃப்கானிஸ்தானின் வீரர் என்ற பெருமையைப் பெறுவார். ஆஃப்கானிஸ்தான் அணிக்காக 2015ஆம் ஆண்டு முதல் ஒருநாள் கிரிக்கெட்டில் விளையாடி வரும்ம் ரஷித் கான் இதுவரை 113 ஒருநாள் போட்டிகளில் விளையாடி 106 இன்னிங்ஸ்களில் 199 விக்கெட்டுகளை வீழ்த்தியுள்ளார்.
இதுதவிர்த்து இப்போட்டியில் ரஷித் கான் இதனை செய்யும் பட்சத்தில், சர்வதேச ஒருநாள் கிரிக்கெட்டில் அதிவேகமாக 200 விகெட்டுகளை வீழ்த்திய வீரர்கள் பட்டியலில் ஆஸ்திரேலிய அணியின் முன்னாள் வீரர் ஆலன் டொனால்டை பின் தள்ளுவார். இதற்கு முன் ஆலன் டொனால்ட் 117 போட்டிகளில் இந்த மைல் கல்லை எட்டியுள்ளார். இப்பட்டியலில் ஆஸ்திரேலிய அணியின் மிட்செல் ஸ்டார்க் 102 போட்டிகளில் இந்த மைல் கல்லை எட்டி முதலிடத்தில் உள்ளார்.
ஒருநாள் போட்டியில் அதிவேகமாக 200 விக்கெட்டுகள்
- மிட்செல் ஸ்டார்க்- 102 போட்டிகள்
- சக்லைன் முஷ்டாக் - 104 போட்டிகள்
- முகமது ஷமி- 104 போட்டிகள்
- டிரென்ட் போல்ட் - 107 போட்டிகள்
- பிரட் லீ- 112 போட்டிகள்
- ஆலன் டொனால்ட் - 117 போட்டிகள்
2000 ரன்கள் மற்றும் 400 விக்கெட்டுகள்
Also Read: Funding To Save Test Cricket
மேற்கொண்டு ரஷித் கான் இப்போட்டியில் 23 ரன்களைச் சேர்க்கும் பட்சத்தில் சர்வதேச கிரிக்கெட்டில் 2000 ரன்களைப் பூர்த்தி செய்வார். இதனை அவர் செய்யும் பட்சத்தில் சர்வதேச கிரிக்கெடில் 400+ விக்கெட்டுகள் மற்றும் 2000+ ரன்களை குவித்த முதல் ஆஃப்கானிஸ்தான் வீரர் எனும் சாதனையையும் படைப்பார். ரஷித் கான் இதுவரை 153 போட்டிகளில் 214 இன்னிங்ஸ்களில் விளையாடி 1977 ரன்களையும், 405 விக்கெட்டுகளையும் வீழ்த்தியுள்ளார்.