உண்மையான மேட்ச் வின்னர் ‘பூம்பால்’ தான் - ரவிச்சந்திரன் அஸ்வின்!

இந்திய அணியின் வேகப்பந்து வீச்சாளர்களில் முக்கிய இடத்தை பிடித்துள்ளவர் ஜஸ்ப்ரித் பும்ரா. இவர் தற்போது நடைபெற்று இங்கிலாந்து அணிக்கெதிரான டெஸ்ட் தொடரில், முதல் போட்டியில் 6 விக்கெட்டுகளையும், இரண்டாவது போட்டியில் 9 விக்கெட்டுகளையும் என மொத்தமாக 15 விக்கெட்டுகளை வீழ்த்தியதுடன், அணியின் வெற்றிக்கும் முக்கிய காரணமாக அமைந்தார். இதன்மூலம் ஐசிசி டெஸ்ட் பந்துவீச்சாளர்கள் தரவரிசையிலும் முதலிடத்தைப் பிடித்து சாதனைப் படைத்துள்ளார்.

பும்ராவின் அபார பந்துவீச்சின் மூலம் இரண்டாவது டெஸ்ட் போட்டியில் வெற்றி பெற்ற இந்திய அணி, 5 போட்டிகள் கொண்ட இத்தொடரை 1-1 என்ற கணக்கில் சமன்செய்துள்ளது. இதையடுத்து இரு அணிகளுக்கும் இடையேயான மூன்றாவது டெஸ்ட் போட்டி வரும் பிப்ரவரி 15ஆம் தேதி ராஜ்கோட்டில் நடைபெறவுள்ளது. இப்போட்டிக்கான இந்திய அணியும் நேற்றைய தினம் அறிவிக்கப்பட்டது. 

இந்நிலையில், விசாகப்பட்டினத்தில் நடைபெற்ற இரண்டாவது டெஸ்ட் போட்டியில் இங்கிலாந்தின் பாஸ்பாலுக்கு எதிராக ஜஸ்ப்ரித் பும்ரா பூம்பாலை காட்டி இந்தியாவை வெற்றி பெற வைத்ததாக இந்திய அணியின் அனுபவ சுழற்பந்து வீச்சாளர் ரவிச்சந்திரன் அஸ்வின் பாராட்டியுள்ளார். இதுகுறித்து பேசிய அஸ்வின்,“இரண்டாவது டெஸ்ட் போட்டியின் உண்மையான மேட்ச் வின்னர் பூம்பால் தான்.

அதேபோல் அப்போட்டியில் நாம் யாஷ்பாலின் தாக்கத்தையும் பார்த்தோம். அப்போட்டியில் ஜஸ்ப்ரித் பும்ரா தனது அபாரமான பந்துவீச்சை வெளிப்படுத்தினார். இத்தொடரில் அவர் அதிக விக்கெட்டுகளை வீழ்த்தியவராக மட்டுமின்றி, உலகின் நம்பர் ஒன் டெஸ்ட் பந்துவீச்சாளர் எனும் அந்தஸ்தையும் பெற்றுள்ளார். அவருக்கும் அவருடைய இந்த இமாலய சாதனைக்கும் நான் மிகப்பெரிய ரசிகன்.

மேலும், இந்த தொடரில் யஷஸ்வி ஜெய்ஸ்வால் இரட்டை சதமடித்து தனது அபார வளர்ச்சியை வெளிப்படுத்தியுள்ளார். உண்மையில், அவர் ஜேம்ஸ் ஆண்டர்சன் பந்துவீச்சை இறங்கி வந்து விளையாடியதுடன் இரட்டை சதத்திற்குப் பிறகே தனது விக்கெட்டை இழந்தார். அதேபோல ஷுப்மன் கில் நல்ல திறமையை கொண்டுள்ளார் என்பதில் எந்த சந்தேகமும் இல்லை. இரண்டாவது இன்னிங்ஸில் அடித்த சதம் பேட்ஸ்மேனாக தம்மிடம் உள்ள திறமையை அவர் நியாயப்படுத்தியுள்ளார்” என்று தெரிவித்துள்ளார்.