டி20 கிரிக்கெட்டில் தோனியின் சாதனையை முறியடிக்கவுள்ள ரோஹித் சர்மா!

தென் ஆப்பிரிக்க சுற்றுப்பயணத்தை நிறைவு செய்து தாயகம் திரும்பியுள்ள இந்தியா அடுத்ததாக ஆஃப்கானிஸ்தானுக்கு எதிராக 3 போட்டிகள் கொண்ட டி20 கிரிக்கெட் தொடரில் விளையாட உள்ளது. வெஸ்ட் இண்டீஸ் மற்றும் அமெரிக்காவில் வரும் ஜூன் மாதம் நடைபெற உள்ள 2024 டி20 உலகக் கோப்பைக்கு தயாராவதற்காக நடைபெறும் இந்த தொடரில் ரோஹித் சர்மா தலைமையில் அனுபவம் கலந்த இளம் இந்திய அணி விளையாட உள்ளது.

கடைசியாக 2022 டி20 உலகக் கோப்பையில் விளையாடிய ரோஹித் சர்மா அதன் பின் ஒன்றரை வருடங்களாக ஒருநாள் மற்றும் டெஸ்ட் போட்டிகளில் மட்டுமே விளையாடி வந்தார். மேலும் அந்த உலகக் கோப்பையில் ரோஹித் சர்மா போன்ற சீனியர்கள் சுமாராக விளையாடி தோல்விக்கு காரணமாக அமைந்ததால் அவர்களை கழற்றி விட்டு இம்முறை ஹர்திக் பாண்டியா தலைமையில் புதிய அணி விளையாடும் என்ற செய்திகள் வெளி வந்தன.

ஆனால் தற்போது பாண்டியா காயத்தை சந்தித்துள்ளதால் மீண்டும் கேப்டனாக தேர்வாகியுள்ள ரோஹித் சர்மா கிட்டத்தட்ட 2024 டி20 உலகக் கோப்பையிலும் கேப்டனாக செயல்படுவது உறுதியாகியுள்ளது. அந்த வகையில் மீண்டும் கிடைத்த இந்த வாய்ப்பில் ரோஹித் சர்மா கேப்டனாக படைக்க உள்ள சில சாதனைகளைப் பற்றி பார்ப்போம்.

இதுவரை டி20 கிரிக்கெட்டில் 51 போட்டிகளில் 39 வெற்றிகளை 76.74% என்ற அபாரமான விகிதத்தில் ரோஹித் சர்மா பதிவு செய்துள்ளார். அந்த வரிசையில் இந்த தொடரில் 3 போட்டிகளிலும் வெற்றியை பதிவு செய்யும் பட்சத்தில் சர்வதேச டி20 கிரிக்கெட்டில் அதிக வெற்றிகளை பதிவு செய்த கேப்டன் என்ற தோனியின் உலக சாதனையை ரோஹித் சர்மா சமன் செய்வதற்கு பிரகாச வாய்ப்புள்ளது. 

முன்னதாக இந்திய்வின் எம்எஸ் தோனி, பாகிஸ்தானின் பாபர் ஆசாம், ஆஃப்கானிஸ்தானின் அஸ்கர் ஆஃப்கன், இங்கிலாந்தின் ஈயன் மோர்கன் ஆகியோர் தலா 42 வெற்றிகளைப் பதிவுசெய்து முதலிடத்தை பகிர்ந்துகொண்டுள்ளனர். இவர்களைத் தொடர்ந்து ஆஸ்திரேலிய அணியின் கேப்டன் ஆரோன் ஃபிஞ்ச் 40 வெற்றிகளுடன் இரண்டாம் இடத்திலும், 39 வெற்றிகளுடன் ரோஹித் சர்மா மூன்றாம் இடத்திலும் உள்ளனர். 

மேலும் இத்தொடரில் 44 ரன்கள் எடுக்கும் பட்சத்தில் சர்வதேச டி20 கிரிக்கெட்டில் அதிக ரன்கள் எடுத்த இந்திய கேப்டன் என்ற விராட் கோலியின் வாழ்நாள் சாதனையை உடைத்து ரோகித் சர்மா புதிய சாதனை உடைப்பதற்கான வாய்ப்புகளும் பிரகாசமாகி உள்ளது.

• விராட் கோலி : 1570
• ரோஹித் சர்மா : 1527*
• எம்எஸ் தோனி : 1112
• சூர்யகுமார் யாதவ் : 300
• ஹர்திக் பாண்டியா : 295