அதிக டெஸ்ட் சராசரி; இரண்டாம் இடத்திற்கு முன்னேறிய சௌத் ஷகீல்!

பாகிஸ்தான் - வங்கதேச அணிகளுக்கு இடையேயான முதல் டெஸ்ட் போட்டியானது ராவல்பிண்டியில் நடைபெற்றுவருகிறது. இப்போட்டியில் டாஸை இழந்து முதலில்  பேட்டிங் செய்த பாகிஸ்தான் அணியானது முகமது ரிஸ்வான் மற்றும் சௌத் ஷகீல் ஆகியோரது அபாரமான சதத்தின் மூலம் முதல் இன்னிங்ஸில் 6 விக்கெட்டுகள் இழப்பிற்கு 446 ரன்களைச் சேர்த்த நிலையில் டிக்ளர் செய்வதாக அறிவித்து இன்னிங்ஸை முடித்தது. 

இதில் அதிகபட்சமாக இறுதிவரை ஆட்டமிழக்காமல் இருந்த முகமது ரிஸ்வன் 171 ரன்களையும், பாகிஸ்தான் அணியின் துணைக்கேப்டன் சௌத் ஷகீல் 141 ரன்களையும் சேர்த்தனர். வங்கதேச அணி தரப்பில் ஷொரிஃபுல் இஸ்லாம், ஹசன் மஹ்மூத் ஆகியோர் தலா 2 விக்கெட்டுகளை கைப்பற்றினர். இதையடுத்து முதல் இன்னிங்ஸைத் தொடங்கிய வங்கதேச அனியானது இரண்டாம் நாள் ஆட்டநேர முடிவில் விக்கெட் இழப்பின்றி 27 ரன்களைச் சேர்த்திருந்தது.

இதையடுத்து இன்று தொடங்கிய மூன்றாம் நாள் ஆட்டத்தை தொடங்கிய வங்கதேச அணியில் ஷத்மான் இஸ்லாம் 12 ரன்களையும், ஜாகிர் ஹசன் 11 ரன்களுடனும் இன்னிங்ஸைத் தொடர்ந்தனர். இதில் ஜாகிர் ஹசன் 12 ரன்களிலும், அடுத்து களமிறங்கிய கேப்டன் நஜ்முல் ஹொசைன் சாண்டோ 16 ரன்களிலும் என விக்கெட்டை இழக்க, பின்னர் இணைந்த ஷாத்மன் இஸ்லாம் - மொமினுல் ஹக் இணை பொறுப்பான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினார்.

இதில் 50 ரன்களில் மொமினுல் ஹக் விக்கெட்டை இழக்க, மறுபக்கம் சதத்தை நெருங்கிய ஷாத்மன் இஸ்லாம் 93 ரன்களில் ஆட்டமிழந்தார். பின்னர் களமிறங்கிய முஷ்ஃபிக்கூர் ரஹ்மீம் 55 ரன்களையும், லிட்டன் தாஸ் 52 ரன்களையும் சேர்க்க, வங்கதேச அணியானது மூன்றாம் நாள் ஆட்டநேர முடிவில் 316 ரன்களை எடுத்துள்ளது. இதனையடுத்து 132 ரன்கள் பின் தங்கிய நிலையில் வங்கதேச அணி நாளை நான்காம் நாள் ஆட்டத்தை தொடரவுள்ளது.

இந்நிலையில் இப்போட்டியில் பாகிஸ்தான் அணியின் சௌத் ஷகீல் சதமடித்து அசத்தியதன் மூலம், சர்வதேச டெஸ்ட் கிரிக்கெட்டில் குறைந்தது 10 இன்னிங்ஸ்களில் விளையாடிய வீரர்களில் அதிக சராசரியுடைய இரண்டாவது வீரர் எனும் சாதனையைப் படைத்துள்ளார். இந்த பட்டியளில் இந்திய அணியின் இளம் அதிரடி தொடக்க வீரர் யஷஸ்வி ஜெய்ஸ்வால் 68.53 என்ற சராசரியுடன் முதலிடத்தில் உள்ள நிலையில், சௌத் ஷகீல் 65.17 என்ற சராசரியுடன் இரண்டாம் இடத்தை பிடித்துள்ளார். 

Also Read: Akram ‘hopes’ Indian Team Will Travel To Pakistan For 2025 Champions Trophy

சர்வதேச டெஸ்டில் அதிக சராசரி கொண்ட வீரர்கள்: 

• யஷஸ்வி ஜெய்ஸ்வால் (இந்தியா)- 68.53 சராசரி
• சௌத் ஷகீல் (பாகிஸ்தான்) - 65.17 சராசரி
• ஹாரி புரூக் (இங்கிலாந்து) - 59.75 சராசரி
• ஸ்டீவ் ஸ்மித் (ஆஸ்திரேலியா) - 56.97 சராசரி
• கேன் வில்லியம்சன் (நியூசிலாந்து) - 54.98 சராசரி