மகளிர் ஒருநாள் உலகக்கோப்பை தொடருக்கான தகுதிச்சுற்று போட்டிகள் பாகிஸ்தானில் நடைபெற்று வருகின்றன. இதில் இன்று லாகூரில் நடைபெற்ற இரண்டாவது லீக் போட்டியில் வெஸ்ட் இண்டீஸ் மற்றும் ஸ்காட்லாந்து அணிகள் பலப்பரீட்சை நடத்தின. இதில் டாஸ் வென்ற விண்டீஸ் அணி முதலில் பந்துவீசுவதாக அறிவித்தது.
அதன்படி களமிறங்கிய ஸ்காட்லாந்து மகளிர் அணிக்கு அப்பி ஐட்கென் மற்றும் டார்சி கார்ட்டர் இணை தொடக்கம் கொடுத்தனர். இதில் ஐட்கென் 21 ரன்களில் விக்கெட்டை இழக்க, அவரைத்தொடர்ந்து களமிறங்கிய கேப்டன் கேத்ரின் பிரைஸ் 6 ரன்னிலும் என விக்கெட்டை இழந்தனர். அவர்களைத் தொடர்ந்து அணியின் மற்றொரு தொடக்க வீராங்கனை டார்சி கார்ட்டரும் 25 ரன்களில் விக்கெட்டை இழந்து பெவிலியனுக்கு திரும்பினார்.
பின்னர் இணைந்த சாரா பிரைஸ் மற்றும் லிஸ்டர் இணை பொறுப்பாக விளையாடி ஸ்கோரை உயர்த்தினர். லிஸ்டர் 19 ரன்களில் விக்கெட்டை இழக்க, அரைசதம் கடந்து அசத்திய சாரா பிரைஸும் 55 ரன்களில் ஆட்டமிழந்தார். பின்னர் களமிறங்கிய வீராங்கனைகளில் மேகன் மெக்கால் 45 ரன்களையும், கேத்ரின் ஃபிராசர் 25 ரன்களையும் சேர்த்ததன் மூலம் ஸ்காட்லாந்து மகளிர் அணி 50 ஓவர்கள் முடிவில் அனைத்து விக்கெட்டுகளையும் இழந்து 244 ரன்களைச் சேர்த்தது.
வெஸ்ட் இண்டீஸ் தரப்பில் கேப்டன் ஹீலி மேத்யூஸ் 4 விக்கெட்டுகளையும், அலியா அலைன், கரிஷ்மா ரம்ஹாரக் ஆகியோர் தலா 2 விக்கெட்டுகளை கைப்பற்றினர். பின்னர் களமிறங்கிய வெஸ்ட் இண்டீஸ் அணியில் கியானா ஜோசப் ரன்கள் ஏதுமின்றி விக்கெட்டை இழந்தார். பின்னர் ஜோடி சேர்ந்த கேப்டன் ஹீலி மெத்யூஸ் மற்றும் ஸைதா ஜேம்ஸ் ஆகியோர் பொறுப்பான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர்.
இதில் அபார ஆட்டத்தை வெளிப்படுத்திய ஹீல் மேத்யூஸ் தனது அரைசதத்தைப் பூர்த்தி செய்ய, இருவரும் இணைந்து இரண்டாவது விக்கெட்டிற்கு 113 ரன்கள் பார்ட்னர்ஷிப் அமைத்தும் அசத்தினார். அதன்பின் அரைசதத்தை நெருங்கிய ஸைதா ஜேம்ஸ் 45 ரன்களில் விக்கெட்டை இழக்க, பின்னர் களமிறங்கிய ஷமைன் காம்பெல், ஸ்டேஃபானி டெய்லர், சினென்லே ஹென்றி, ஷபிகா கஜ்னபி, ஆலியா அலைன் உள்ளிட்டோர் அடுத்தடுத்து விக்கெட்டுகளை இழந்தனர்.
ஒருபக்கம் விக்கெட்டுகள் சரிந்தாலும் மறுமுனையில் அபார ஆட்டத்தை வெளிப்படுத்திய ஹீலி மேத்யூஸ் சதமடித்து அசத்தியதுடன் இறுதிவரை ஆட்டமிழக்காமல் 14 பவுண்டரிகளுடன் 114 ரன்களைச் சேர்த்திருந்தார். ஆனால் மற்ற வீராங்கனைகள் விக்கெட்டுகளை இழந்ததன் காரணமாக வெஸ்ட் இண்டீஸ் அணி 46.2 ஓவர்களில் அனைத்து விக்கெட்டுகளையும் இழந்தது 233 ரன்களில் ஆல அவுட்டாகியது.
Also Read: Funding To Save Test Cricket
ஸ்காட்லாந்து மகளிர் அணி தரப்பில் கேத்ரின் ஃபிரேசர் 3 விக்கெட்டுகளையும், சோலே அபெல், மக்சூத் தலா 2 விக்கெட்டுகளையும் கைப்பற்றி அசத்தினர். இதன்மூலம் ஸ்காட்லாந்து மகளிர் அணி 11 ரன்கள் வித்தியாசத்தில் வெஸ்ட் இண்டீஸ் மகளிர் அணியை வீழ்த்தி த்ரில் வெற்றியைப் பதிவுசெய்து அசத்தியது. இப்போட்டியில் சதமடித்து அசத்திய ஹீலி மேத்யூஸ் ஆட்டநாயகன் விருதை வென்றார்.