SL vs AUS: பிக் பேஷ் தொடரில் காயமடைந்த ஸ்டீவ் ஸ்மித்; பின்னடைவை சந்திக்கும் ஆஸ்திரேலியா!

ஆஸ்திரேலிய அணி இலங்கையில் சுற்றுப்பயணம் செய்து இரண்டு போட்டிகள் கொண்ட டெஸ்ட் தொடரில் விளையாட இருக்கிறது. அதன்படி இவ்விரு அணிகளுக்கும் இடையேயான இந்த டெஸ்ட் தொடர் ஜனவரி 29ஆம் தேதி தொடங்கவுள்ளது. இந்நிலையில் இத்தொடருக்கான ஆஸ்திரேலிய அணியை அந்நாட்டு கிரிக்கெட் வாரியம் இன்றைய தினம் அறிவித்துள்ளது. இதில் வழக்கமான கேப்டன் பாட் கம்மின்ஸுக்கு ஓய்வளிக்கப்பட்டுள்ளது. 

இதன் காரணமாக இத்தொடரில் ஆஸ்திரேலிய அணியின் தற்காலிக கேப்டனாக ஸ்டீவ் ஸ்மித் செயல்படவுள்ளார். மேற்கொண்டு இந்திய டெஸ்ட் தொடரின் போது காயமடைந்த வேகப்பந்து வீச்சாளர் ஜோஷ் ஹேசில்வுட்டிற்கும் இந்த தொடரில் இடம்பிடிக்கவில்லை. அதேசமயம் இந்திய தொடரில் சோபிக்க தவறிய ஆல் ரவுண்டர் மிட்செல் மார்ஷுக்கும் இந்த தொடருக்கான ஆஸ்திரேலிய அணியில் இடம் கிடைக்கவில்லை.

இருப்பினும் இந்த அணியில் ஆஸ்திரேலிய அணியின் இளம் வீரர் நாதன் மெக்ஸ்வீனி மீண்டும் இடம்பிடித்துள்ளார். அவருடன் அறிமுக வீரர் கூப்பர் கன்னொலி, மேத்யூ குஹ்னேமன் மற்றும் டாட் மர்பிக்கும் வாய்ப்பு வழங்கப்பட்டுள்ளது. இதுதவிர்த்து பார்டர் கவாஸ்கர் கோப்பை டெஸ்ட் தொடரில் சிறப்பான ஆட்டத்தை வெளிப்படுத்திய சாம் கொன்ஸ்டாஸ், பியூ வெப்ஸ்டர் ஆகியோருடன் சேர்த்து ஜோஷ் இங்லிஷும் தனது இடத்தை தக்கவைத்துள்ளார். 

இந்நிலையில் இத்தொடருக்கு முன்னரே ஆஸ்திரேலிய அணிக்கு பெரும் அதிர்ச்சி செய்தி ஒன்று வெளியாகியுள்ளது. அதன்படி, அணியின் கேப்டன் ஸ்டீவ் ஸ்மித் நடைபெற்று வரும் பிக் பேஷ் லீக் தொடரின் போது முழங்கையில் கயமடைந்ததார். இதனால் எதிர்வரும் இலங்கை அணிக்கு எதிரான டெஸ்ட் தொடரில் ஸ்டீவ் ஸ்மித் பங்கேற்பாரா என்ற கேள்வி எழுந்துள்ளது. ஏற்கெனவே அந்த அணியின் கேப்டன் பாட் கம்மின்ஸ் காயம் காரணமாக இத்தொடரில் இருந்து விலகினார். 

இந்நிலையில் ஸ்டீவ் ஸ்மித்தும் காயமடைந்துள்ள செய்தி அந்த அணிக்கு பெரும் பின்னடவை ஏற்படுத்தியுள்ளது. இருப்பினும், ஸ்டீவ் ஸ்மித் ஆஸ்திரேலிய அணியின் பயிற்சி முகமில் இணைவார் என்று ஆஸ்திரேலிய கிரிக்கெட் வாரியம் அறிவித்துள்ளது. அதேபோல் காயத்தில் இருந்து மீண்டுள்ள மெத்யூ குஹ்னெமனும் இந்த வாரம் முதல் பந்துவீச்சு பயிற்சியில் ஈடுபடுவார் என்ற அறிவிப்பையும் ஆஸ்திரேலிய கிரிக்கெட் வாரியம் வெளியிட்டுள்ளது குறிப்பிடத்தக்கது. 

Also Read: Funding To Save Test Cricket

ஆஸ்திரேலிய டெஸ்ட் அணி: ஸ்டீவ் ஸ்மித் (கேப்டன்), டிராவிஸ் ஹெட், சீன் அபோட், ஸ்காட் போலண்ட், அலெக்ஸ் கேரி, கூப்பர் கன்னொலி, ஜோஷ் இங்கிலிஸ், உஸ்மான் கவாஜா, சாம் கொன்ஸ்டாஸ், மேத்யூ குஹ்னெமன், மார்னஸ் லபுஷாக்னே, நாதன் லையன், நாதன் மெக்ஸ்வீனி, டாட் மர்ஃபி, மிட்செல் ஸ்டார்க், பியூ வெப்ஸ்டர்.