AUSW vs SAW: ஆஸ்திரேலிய டெஸ்ட் அணி அறிவிப்பு; சோஃபி மோலினக்ஸ் அணியில் சேர்ப்பு!

ஆஸ்திரேலியாவில் சுற்றுப்பயணம் மேற்கொண்டுள்ள தென் ஆப்பிரிக்க மகளிர் அணி ஒரு டெஸ்ட், 3 ஒருநாள் மற்றும் 3 டி20 போட்டிகள் அடங்கிய தொடரில் விளையாடி வருகிறது. இதில் நடைபெற்று முடிந்த டி20 தொடரை ஆஸ்திரேலிய மகளிர் அணி 2-1 என்ற கணக்கில் கைப்பற்றி அசத்தியது. இதனைத்தொடர்ந்து நடைபெற்று வரும் ஒருநாள் தொடரில் இரு அணிகளும் தலா ஒரு வெற்றியைப் பதிவுசெய்து 1-1 என்ற கணக்கில் சமனில் உள்ளனர்.

இந்நிலையில் இரு அணிகளுக்கும் இடையேயான மூன்றாவது மற்றும் கடைசி ஒருநாள் போட்டி இன்ரு சிட்னியில் நடைபெற்று வருகிறது. இப்போட்டியில் வெற்றிபெறும் அணி தொடரை வெல்லும் என்பதால் இப்போட்டியின் மீதான எதிர்பார்ப்புகளும் அதிகரித்துள்ளன. இதனைத்தொடர்ந்து ஆஸ்திரேலியா - தென் ஆப்பிரிக்க அணிகளுக்கு இடையேயான டெஸ்ட் போட்டி பிப்ரவரி 15ஆம் தேதி நடைபெறவுள்ளது.

ஆஸ்திரேலிய அணிக்கெதிராக தென் ஆப்பிரிக்க அணி விளையாடும் முதல் டெஸ்ட் போட்டி இது என்பதால் பெரும் எதிர்பார்ப்பு உள்ளது.  இதையடுத்து இத்தொடருக்கான லாரா வோல்வார்ட் தலைமையிலான தென் ஆப்பிரிக்க அணி நேற்றைய தினம் அறிவிக்கப்பட்டது. இதில் 4 அறிமுக வீராங்கனைகள் தென் ஆப்பிரிக்க டெஸ்ட் அணியில் தேர்வுசெய்யப்பட்டிருந்தனர். 

இந்நிலையில் இந்த டெஸ்ட் போட்டிக்கான ஆஸ்திரேலிய மகளிர் அணியும் இன்றைய தினம் அறிவிக்கப்பட்டுள்ளது. அதன்படி அலிசா ஹீலி தலைமையிலான ஆஸ்திரேலிய அணியில், கடந்த 2 ஆண்டுகளாக காயம் காரணமாக விளையாடாமல் இருந்த பந்துவீச்சு ஆல் ரவுண்டர் சோஃபி மோலினக்ஸுக்கு மீண்டும் வாய்ப்பு கிடைத்துள்ளது. மேலும் இந்திய அணிக்கெதிரான டெஸ்ட் தொடரில் விளையாடிய லாரன் சீட்டில், ஹீதர் கிரஹாம் ஆகியோருக்கு இந்த அணியில் இடம் கிடைக்கவில்லை.

ஆஸ்திரேலிய அணி: அலிசா ஹீலி (கே), டார்சி பிரவுன், ஆஷ்லே கார்ட்னர், கிம் கார்த், ஜெஸ் ஜோனாசென், அலனா கிங், ஃபோப் லிட்ச்ஃபீல்ட், தஹ்லியா மெக்ராத், சோஃபி மோலினக்ஸ், பெத் மூனி, எல்லிஸ் பெர்ரி, மேகன் ஷட், அனாபெல் சதர்லேண்ட், ஜார்ஜியா வேர்ஹாம்.

தென் ஆப்பிரிக்க அணி: லாரா வோல்வார்ட் (கேப்டன்), அன்னேக் போஷ், டாஸ்மின் பிரிட்ஸ், நாடின் டி கிளார்க், மைக் டி ரிடர், அயன்டா ஹ்லுபி, சினாலோ ஜாஃப்டா, மரிசான் கேப், மசபடா கிளாஸ், சுனே லூஸ், எலிஸ்-மேரி மார்க்ஸ், நோன்குலுலெகோ மலாபா, சோலெ ட்ரையன், டெல்மி டக்கர்.