சர்வதேச டெஸ்ட் கிரிக்கெட்டில் தொடார் வெற்றிகள்; தென் ஆப்பிரிக்க அணி சாதனை!

சர்வதேச டெஸ்ட் கிரிக்கெட்டில் தொடர்ச்சியாக 10 வெற்றிகளை பதிவுசெய்த மூன்றாவது அணி எனும் சாதனையை தென் ஆப்பிரிக்கா படைத்துள்ளது.

Zimbabwe vs South Africa 2nd Test Record: ஜிம்பாப்வே அணிக்கு எதிரான இரண்டாவது டெஸ்ட் போட்டியில் தென் ஆப்பிரிக்க அணி இன்னிங்ஸ் மற்றும் 236 ரன்கள் வித்தியாசத்தில் வெற்றிபெற்றதன் மூலம் சில சாதனைகளை படைத்துள்ளது. 

ஜிம்பாப்வேவில் சுற்றுப்பயணம் மேற்கொண்டிருந்த தென் ஆப்பிரிக்க அணி இரண்டு போட்டிகள் கொண்ட டெஸ்ட் தொடரில் விளையாடியது. இதில் நடந்து முடிந்த முதல் டெஸ்ட் போட்டியில் தென் ஆப்பிரிக்க அணி 328 ரன்கள் வித்தியாசத்தில் வெற்றி பெற்ற நிலையில், இரண்டாவது போட்டியிலும் தென் ஆப்பிரிக்க அணி அபார ஆட்டத்தை வெளிப்படுத்தி இன்னிங்ஸ் மற்றும் 236 ரன்கள் வித்தியாசத்தில் வெற்றி பெற்றதுடன் 2-0 என்ற கணக்கில் தொடரையும் கைப்பற்றியுள்ளது. 

இதில் தென் ஆப்பிரிக்க அணி கேப்டன் வியான் முல்டர் முதல் டெஸ்டின் இரண்டாவது இன்னிங்ஸில் சதமும், இரண்டாவது டெஸ்ட் போட்டியின் முதல் இன்னிங்ஸில் முற்சதமும் விளாசியதுடன் மொத்தமாக மூன்று இன்னிங்ஸிலும் சேர்த்து 265 என்ற சராசரியில் 531 ரன்களையும் குவித்து அசத்தினார். இதன்காரணமாக இரண்டாவது டெஸ்ட் போட்டியில் ஆட்டநாயகன் விருதையும், இந்த டெஸ்ட் தொடருக்கான தொடர் நாயகன் விருதையும் வென்றுள்ளார். 

இந்நிலையில் ஜிம்பாப்வே அணிக்கு எதிரான இரண்டாவது டெஸ்டில் வெற்றி பெற்றதன் மூலம், தென் ஆப்பிரிக்கா அணி சிறப்பு சாதனையை படைத்துள்ளது. அந்தவகையில் சர்வதேச டெஸ்ட் கிரிக்கெட்டில் தொடர்ச்சியாக 10 வெற்றிகளைப் பதிவுசெய்து மூன்றாவது அணி எனும் பெருமையை தென் ஆப்பிரிக்கா பெற்றுள்ளார். இதற்கு முன் ஆஸ்திரேலியா மற்றும் வெஸ்ட் இண்டீஸ் அணிகள் மட்டுமே இந்த சதனையை படைத்திருந்தது. 

இதில் ஆஸ்திரேலிய அணி 1999 முதல் 2001 வரையிலும், 2005 முதல் 2008ஆம் ஆண்டு வரையும் என இரண்டு முறை தொடர்ச்சியாக 16 டெஸ்ட் போட்டிகளில் வென்றுள்ளது. அதே நேரத்தில் வெஸ்ட் இண்டீஸ் அணியாஅனது 1984 இல் தொடர்ச்சியாக 11 டெஸ்ட் போட்டிகளில் வென்று இந்த சாதனையைப் படைத்துள்ளது. இந்நிலையில் தற்சமயம் தென் ஆப்பிரிக்க அணி கடந்த 2024ஆம் ஆண்டு முதல் தொடர்ச்சியாக 10 டெஸ்ட் போட்டிகளில் வென்று இந்த சாதனை பட்டியலில் இடம்பிடித்துள்ளது.

தொடர்ச்சியாக அதிக டெஸ்ட் வெற்றிகள்:

• 16 – ஆஸ்திரேலியா (1999–2001)
• 16 – ஆஸ்திரேலியா (2005–2008)
• 11 – மேற்கிந்திய தீவுகள் (1984)
• 10* – தென் ஆப்பிரிக்கா (2024–2025)
• 9 – தென் ஆப்பிரிக்கா (2002–2003)
• 9 – இலங்கை (2001–2002)

இந்தப் போட்டி  குறித்து பேசினால், டாஸ் வென்று முதலில் பேட்டிங் செய்த தென் ஆப்பிரிக்கா அணி கேப்டன் வியான் முல்டரின் வரலாற்றுச் சிறப்புமிக்க 367 ரன்களின் காரணமாக முதல் இன்னிங்ஸை 5 விக்கெட் இழப்புக்கு 626 ரன்கள் எடுத்து டிக்ளேர் செய்தது. அதன்பின் விளையாடிய ஜிம்பாப்வே அணி முதல் இன்னிங்ஸில் 170 ரன்களையும், இரண்டாவது இன்னிங்ஸில் 220 ரன்களை மட்டுமே எடுத்து ஆல் அவுட்டானதுடன் இன்னிங்ஸ் வித்தியாசத்தில் தோல்வியைத் தழுவியது.