கொல்கத்த நைட் ரைடர்ஸ் மற்றும் சன்ரைசர்ஸ் ஹைதராபாத் அணிகளுக்கு இடையேயான ஐபிஎல் லீக் போட்டி நேற்று ஈடன் கார்டன்ஸ் மைதானத்தில் நடைபெற்றது. இப்போட்டியில் கொல்கத்தா நைட் ரைடர்ஸ் அணியானது 80 ரன்கள் வித்தியாசத்தில் சன்ரைசர்ஸ் ஹைதராபாத் அணியை வீழ்த்தி அபார வெற்றியைப் பதிவுசெய்தது.
இந்நிலையில் இப்போட்டியில் கேகேஆர் அணிக்காக விளையாடிய சுனில் நரைன் டி20 கிரிக்கெட் வரலாற்றில் புதிய சாதனை ஒன்றை படித்துள்ளார். அதன்படி நேற்றைய போட்டியில் சுனில் நரைன் ஒரு விக்கெட்டை வீழ்த்தியதன் மூலம் டி20 கிரிக்கெட் வரலாற்றில் ஒரு அணிக்காக 200 விக்கெட்டுகளை வீழ்த்திய இரண்டாவது வீரர் எனும் தனித்துவ சாதனை பட்டியலில் இடம்பிடித்துள்ளார்.
அந்தவகையில் ஐபிஎல் மற்றும் சாம்பியன்ஸ் லீக் டி20 உட்பட, சுனில் நரைன் கொல்கத்தா நைட் ரைடர்ஸ் அணிக்காக இதுவரை 187 இன்னிங்ஸ்களில் 200 விக்கெட்டுகளை வீழ்த்தியுள்ளார். இதில் ஐபிஎல் தொடரில் மட்டும் அவர் 182 விக்கெட்டுகளை வீழ்த்தியுள்ளார். முன்னதாக சமித் படேல் டி20 கிரிக்கெட்டில் ஒரு அணிக்காக 200 அல்லது அதற்கு மேற்பட்ட விக்கெட்டுகளை வீழ்த்திய சாதனையைப் படைத்திருந்தார் என்பது குறிப்பிடத்தக்கது.
டி20 போட்டிகளில் ஒரு அணிக்காக அதிக விக்கெட்டுகள்
- 208 விக்கெட்டுகள் - சமித் படேல் (நாட்டிங்ஹாம்ஷையர்)
- 200 விக்கெட்டுகள் - சுனில் நரைன் (கொல்கத்தா நைட் ரைடர்ஸ்)
- 199 விக்கெட்டுகள் - கிறிஸ் வுட் (ஹாம்ஷையர்)
- 195 விக்கெட்டுகள் - லசித் மலிங்கா (மும்பை இந்தியன்ஸ்)
- 193 விக்கெட்டுகள் - டேவிட் பெய்ன் (குளூசெஸ்டர்ஷையர்)
இப்போட்டி குறித்து பேசினால், டாஸை இழந்து முதலில் பேட்டிங் செய்த கேகேஆர் அணியில் கேப்டன் அஜிங்கியா ரஹானே 38 ரன்களையும், அங்கிரிஷ் ரகுவன்ஷி 50 ரன்களிலும் விக்கெட்டை இழக்க, இறுதியில் அபார ஆட்டத்தை வெளிப்படுத்திய வெங்கடேஷ் ஐயர் மற்றும் ரிங்கு சிங் இருவரும் அணியை சவாலான இலக்கை நோக்கி அழைத்துச் சென்றனர். இதில் வெங்கடேஷ் ஐயர் 60 ரன்களுடன் ஆட்டமிழந்தார். அதேசமயம் இறுதிவரை ஆட்டமிழக்காமல் இருந்த ரிங்கு சிங் 32 ரன்களைச் சேர்த்தார்.
Also Read: Funding To Save Test Cricket
இதன்மூலம் 20 ஓவர்கள் முடிவில் கொல்கத்தா நைட் ரைடர்ஸ் அணி 6 விக்கெட் இழப்பிற்கு 200 ரன்களைச் சேர்த்தது. பின்னர் இலக்கை நோக்கி விளையாடிய சன்ரைசர்ஸ் ஹைதரபாத் அணியில் ஹென்ரிச் கிளாசென் 33 ரன்களையும், கமிந்து மெண்டிஸ் 27 ரன்களையும் சேர்த்ததை தவிர்த்து மற்ற வீரர்கள் சோபிக்க தவற அந்த அணி 120 ரன்களில் ஆல் அவுட்டானது. இதன்மூலம் நைட் ரைடர்ஸ் அணி 80 ரன்கள் வித்தியாசத்தில் சன்ரைசர்ஸ் அணியை வீழ்த்தி அபார வெற்றியைப் பதிவுசெய்தது.