ஆஸ்திரேலியா - இந்தியா தொடர்; அதிகரிக்கும் ரசிகர்களின் ஆர்வம் - நான்கு மாதங்களுக்கு முன்பே விற்றுத்தீர்ந்த டிக்கெட்டுகள் !

India tour of Australia, 2025: ஆஸ்திரேலியா - இந்தியா அணிகளுக்கு இடையே நவம்பர் 8ஆம் தேதி பிரிஸ்பேனில் நடைபெறவுள்ள 5ஆவது டி20 போட்டியைக் காண ஆஸ்திரேலியாவில் உள்ள அமித் கோயல் எனும் நபர் 880 டிக்கெட்டுகளை வாங்கியுள்ளதாக தகவல் வெளியாகியுள்ளது.

இந்திய அணி இந்தண்டு அக்டோபர் மாதம் ஆஸ்திரேலியாவில் சுற்றுப்பயணம் செய்து 3 போட்டிகள் கொண்ட ஒருநாள் தொடரிலும், 5 போட்டிகள் கொண்ட டி20 தொடரிலும் விளையாடவுள்ளது. இதில் இரு அணிகளுக்கும் இடையேயான ஒருநாள் தொடர் அக்டோபர் 09ஆம் தேதி முதலும், 5 போட்டிகள் கொண்ட டி20 தொடரானது அக்டோபர் 29ஆம் தேதி முதலும் நடைபெறவுள்ளது. மேலும் டி20 உலகக்கோப்பைக்கு தயாராகும் வகையில் இரு அணிகளும் இந்த தொடரை எதிர்கொள்ளவுள்ளன. 

இந்நிலையில் இத்தொடரில் சிட்னியில் நடைபெறும் இந்தியா-ஆஸ்திரேலியா அணிகளுக்கு ஒருநாள் போட்டி மற்றும் நவம்பரில் கான்பெராவில் நடைபெறும் இரு அணிகளுக்கும் இடையேயான டி20 போட்டிக்கான டிக்கெட்டுகள் இத்தொடர் தொடங்குவதற்கு நான்கு மாதங்களுக்கு முன்பே விற்றுத் தீர்ந்துவிட்டதாக ஆஸ்திரேலிய கிரிக்கெட் வாரியம் அதிகாரப்பூர்வமாக அறிவித்துள்ளது. இது ஆஷஸ் டெஸ்ட் தொடரின் டிக்கெட் விற்பனையைக் கட்டிலும் அதிகம் என்றும் கூறப்படுகிறது. 

இதுகுறித்து ஆஸ்திரேலிய கிரிக்கெட் வாரியம் வெளியிட்டுள்ள அறிக்கையில், “சிட்னி ஒருநாள் போட்டி மற்றும் கான்பெர்ராவில் நடைபெறும் டி20 போட்டிக்கான டிக்கெட் ஒதுக்கீடு தொடருக்கு நான்கு மாதங்களுக்கு முன்பே விற்றுள்ளது கிரிக்கெட் ரசிகர்கள் மத்தியில் வரவிருக்கும் ஆஸ்திரேலியா - இந்தியா தொடர் மீதான ஆர்வத்திற்கு கிடைத்த ஒரு சான்றாகும். கடந்த பார்டர் கவாஸ்கர் கோப்பை தொடருக்கு பிறகு இத்தொடரின் மீது ரசிகர்களின் வலுவான ஈடுபாட்டைக் காண்பதில் நாங்கள் மகிழ்ச்சியடைகிறோம்.

மேலும் இத்தொடரானது எங்கள் கிரிக்கெட்டின் மிகப்பெரிய கோடைக்காலமாக இருக்கும் என்பதில் எங்களுக்கு எந்த சந்தேகமும் இல்லை. எனவே ரசிகர்களை இந்த ஆட்டத்தைத் தவறவிடாமல் இருக்க முன்கூட்டியே டிக்கெட்டுகளை வாங்குமாறு நாங்கள் ஊக்குவிக்கிறோம்” என்று கூறியுள்ளது. அதுமட்டுமில்லாமல் இதுவரை விற்கப்பட்ட டிக்கெட்டுகளில் 16 சதவீதத்திற்கும் அதிகமானவை இந்திய ரசிகர் மன்றங்களால் வாங்கப்பட்டுள்ளதாகவும் ஆஸ்திரேலிய கிரிக்கெட் வாரியம் தெரிவித்துள்ளது.

குறிப்பாக  ‘பாரத் ஆர்மி’ என்றழைக்கப்படும் இந்திய அணி ரசிகர் மன்றம் 2,400 க்கும் மேற்பட்ட டிக்கெட்டுகளை வாங்கியுள்ளதாகவும், இந்தியாவை தாயகமாக கொண்ட ரசிகர்கள் 1,400 க்கும் மேற்பட்ட டிக்கெட்டுகளை வாங்கியுள்ளதாகவும் கூறப்படுகிறது. மேலும், ஆஸ்திரேலியாவில் உள்ள அகர்வால் சமூகத்தைச் சேர்ந்த அமித் கோயல், காபா டி20 போட்டிக்காக 880 டிக்கெட்டுகளை வாங்கியுள்ளார். இதன் மூலம் ஒருபோட்டிக்கு அதிக டிக்கெட்டுகளை வாங்கிய வீரர் எனும் சாதனையையும் படைத்துள்ளார். 

Also Read: LIVE Cricket Score

ஆஸ்திரேலியா - இந்தியா தொடர் அட்டவணை

• முதல் ஒருநாள் போட்டி - அக்டோபர் 19: பெர்த் ஸ்டேடியம், பெர்த்,
• இரண்டாவது ஒருநாள் போட்டி - அக்டோபர் 23: அடிலெய்டு ஓவல், அடிலெய்டு,
• மூன்றாவது ஒருநாள் போட்டி - அக்டோபர் 25: சிட்னி கிரிக்கெட் மைதானம், சிட்னி
• முதல் டி20 போட்டி- அக்டோபர் 29: மனுகா ஓவல், கான்பெரா,
• இரண்டாவது டி20 போட்டி- அக்டோபர் 31: மெல்போர்ன் கிரிக்கெட் மைதானம், மெல்போர்ன்,
• மூன்றாவது டி20 போட்டி - நவம்பர் 2: பெல்லரிவ் ஓவல், ஹோபார்ட்,
• நான்காவது டி20 போட்டி - நவம்பர் 6: கோல்ட் கோஸ்ட் மைதானம், கோல்ட் கோஸ்ட்
• ஐந்தாவது டி20 போட்டி - நவம்பர் 8 - காபா மைதானம், பிரிஸ்பேன்