Tilak Varma County Century: நாட்டிங்ஹாம்ஷையர் அணிக்கு எதிரான கவுண்டி சாம்பியன்ஷிப் தொடரில் ஹாம்ஷையர் அணிக்காக விளையாடி வரும் திலக் வர்மா தனது இரண்டாவது சதத்தைப் பதிவுசெய்து அசத்தியுள்ளார்.
இங்கிலாந்தில் நடைபெற்று வரும் உள்ளூர் கிரிக்கெட் தொடரான கவுண்டி சாம்பியன்ஷிப் தொடரின் 47ஆவது லீக் ஆட்டத்தில் நாட்டிங்ஹாம்ஷையர் மற்றும் ஹாம்ஷையர் அணிகள் பலப்பரீட்சை நடத்தி வருகின்றன. சௌத்தாம்ப்டனனில் நடைபெற்று வரும் இப்போட்டியில் டாஸை இழந்து முதலில் பேட்டிங் செய்த நாட்டிங்ஹாம்ஷையர் அணி முதல் இன்னிங்ஸில் 8 விக்கெட்டுகள் இழப்பிற்கு 578 ரன்களைக் குவித்து டிக்ளர் செய்வதாக அறிவித்தது.
இதில் அதிகபட்சமாக இறுதிவரை ஆட்டமிழக்காமல் இருந்த லிண்டன் ஜேம்ஸ் 203 ரன்களையும், ஜேக் ஹைய்ன்ஸ் 103 ரன்களையும் சேர்த்தனர். ஹாம்ஷையர் தரப்பில் கைல் அபோட் 3 விக்கெட்டுகளை கைப்பற்றினார். பின்னர் முதல் இன்னிங்ஸைத் தொடங்கியுள்ள ஹாம்ஷையர் அணியில் தொடக்க வீரர்கள் ஜோய் வெதர்லே மற்றும் ஃப்ளெட்சா மிடில்டன் ஆகியோர் தலா 52 ரன்களிலும், அடுத்து களமிறங்கிய நிக் கிப்பின்ஸ் 23 ரன்னிலும் என விக்கெட்டுகளை இழந்தனர்.
பின்னர் களமிறங்கிய திலக் வர்மா அபாரமான ஆட்டத்தை வெளிப்படுத்தி சதமடித்ததுடன் 13 பவுண்டரிகள், 2 சிக்ஸர்கள் என 112 ரன்களைச் சேர்த்து விக்கெட்டை இழந்தார். இதன் காரணமாக ஹாம்ஷையர் அணி மூன்றாம் நாள் ஆட்டநேர முடிவில் 6 விக்கெட்டுகள் இழப்பிற்கு 367 ரன்களைச் சேர்த்துள்ளது. இதையடுத்து 211 ரன்கள் பின் தங்கிய நிலையில் இன்று நான்காம் நாள் ஆட்டத்தை ஹாம்ஷையர் அணி தொடரவுள்ளது.
Also Read: LIVE Cricket Score
இந்நிலையில் நடப்பு கவுண்டி சாம்பியன்ஷிப் தொடரில் இந்திய விரர் திலக் வர்மா சிறப்பான ஃபார்மில் உள்ளார். முன்னதாக அவர் இத்தொடரில் எசெக்ஸ் அணிக்கு எதிரான தனது அறிமுக போட்டியில் சதமடித்து அசத்திய நிலையில், தற்சமயம் நாட்டிங்ஹாம்ஷையருக்கு எதிரான போட்டியிலும் சதம் விளாசியுள்ளார். இந்நிலையில் திலக் வர்மா இப்போட்டியில் சதமடித்த காணொளியானது இணையத்தில் வைரலாகி வருகிறது.