அயர்லாந்து அணி தற்போது ஜிம்பாப்வேவில் சுற்றுப்பயணம் மேற்கொண்டு மூன்று வடிவிலான கிரிக்கெட் தொடரிலும் விளையாடி வருகிறது. இதில் தற்போது இரு அணிகளுக்கும் இடையேயான மூன்று போட்டிகள் கொண்ட டி20 தொடரானது நேற்று தொடங்கியது.
இதில் இரு அணிகளுக்கும் இடையேயான முதல் டி20 போட்டியானது மழை காரணமாக கைவிடப்பட்டது. இதனையடுத்து இரு அணிகளுக்கும் இடையேயான இரண்டாவது டி20 போட்டி இன்று ஹராரேவில் உள்ள ஹராரே ஸ்போர்ட்ஸ் கிளப் மைதானத்தில் நடைபெற்றது. இப்போட்டியில் டாஸ் வென்ற ஜிம்பாப்வே அணி முதலில் பந்துவீசுவதாக அறிவித்தது. அதன்படி களமிறங்கிய அயர்லாந்து அணிக்கு கேப்டன் பால் ஸ்டிர்லிங் - லோர்கன் டக்கர் இணை தொடக்கம் கொடுத்தனர். இதில் பெரிதும் எதிர்பார்க்கப்பட்ட பால் ஸ்டிர்லிங் ஒரு ரன்னுடன் நடையைக் கட்டினார்.
அதன்பின் டக்கருடன் இணைந்த டெக்டரும் பொறுப்பான ஆட்டத்தை வெளிப்படுத்த அணியின் ஸ்கோரு மளமளவென உயரத்தொடங்கியது. இருவரும் இணைந்து 50 ரன்களுக்கு பார்ட்னர்ஷிப் அமைத்த நிலையில் ஹாரி டெக்டர் 28 ரன்களில் விக்கெட்டை இழக்க, அவரைத்தொடர்ந்து அரைசதத்தை நெருங்கிய லோர்கன் டக்கரும் 3 பவுண்டரி, ஒரு சிக்ஸர் என 46 ரன்களில் விக்கெட்டை இழந்தார். அதன்பின் களமிறங்கிய வீரர்களில் கர்டிஸ் காம்பேர் 26 ரன்களைச் சேர்த்த நிலையில் மற்ற வீரர்கள் அனைவரும் அடுத்தடுத்து சொற்ப ரன்களில் விக்கெட்டுகளை இழந்தனர்.
இதனால் அயர்லாந்து அணி 20 ஓவர்கள் முடிவில் 8 விக்கெட்டுகள் இழப்பிற்கு 137 ரன்களை மட்டுமே சேர்த்தது. ஜிம்பாப்வே அணி தரப்பில் டிரெவர் குவாண்டு 3 விக்கெட்டுகளையும், ரிச்சர்ட் ந்ங்க்ரவா, சிக்கந்தர் ரஸா தலா 2 விக்கெட்டுகளை கைப்பற்றினர். அதன்பின் இலக்கை நோக்கி விளையாடிய ஜிம்பாப்வே அணிக்கு தொடக்கம் சிறப்பானதாக அமையவில்லை. அணியின் டாப் ஆர்டர் வீரர்கள் பிரையன் பென்னட் 8, மருமணி 1, வெஸ்லி மதெவரே 1 ரன்னிலும் என விக்கெட்டுகளை இழந்து ஏமாற்றமளித்தனர். இதனால் அந்த அணி 14 ரன்களிலேயே 3 விக்கெட்டுகளை இழந்தது.
பின்னர் ஜோடி சேர்ந்த சிகந்தர் ரஸா - ரியான் பார்ல் இணை பொறுப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இருவரும் இணைந்து 50 ரன்களுக்கு மேல் பார்ட்னர்ஷிப் அமைத்திருந்த நிலையில், ரியான் பார்ல் 27 ரன்களிலும், சிகந்தர் ரஸா 22 ரன்களிலும் என விக்கெட்டுகளை இழந்தனர். அதன்பின் களமிறங்கிய டோனி முனியோகா ஒருபக்கம் நிதானமாக விளையாட, மறுபக்கம் களமிறங்கிய தஷிங்கா முசேகிவா 14 ரன்னிலும், வெலிங்டன் மஸகட்ஸா 6 ரன்னிலும் என விக்கெட்டுகளையும் இழந்து ஏமாற்றமளித்தனர்.
Also Read: Funding To Save Test Cricket
இருப்பினும் இறுதிவரை ஆட்டமிழக்காமல் இருந்த டோனி முனியோகா 5 பவுண்டரிகளுடன் 43 ரன்களையும், அவருடன் இணைந்து விளையாட ரிச்சர்ட் ந்ங்கரவா 12 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் ஜிம்பாப்வே அணி 19.2 ஓவர்களில் இலக்கை எட்டியதுடன் 3 விக்கெட் வித்தியாசத்தில் அயர்லாந்து அணியை வீழ்த்தி வெற்றிபெற்றது. இந்த வெற்றியின் மூலம் மூன்று போட்டிகள் கொண்ட டி20 தொடரில் ஜிம்பாப்வே அணி 1-0 என்ற கணக்கில் முன்னிலைப் பெற்றுள்ளது குறிப்பிடத்தக்கது.