மார்னஸ் லபுஷாக்னே முன்பு நடனமாடிய விராட் கோலி; வைரலாகும் காணொளி!

இந்தியா - ஆஸ்திரேலிய அணிகள் மோதி வரும் 3 போட்டிகள் கொண்ட ஒருநாள் கிரிக்கெட் தொடரின் 3ஆவது போட்டி இன்று நடைபெற்றது. இப்போட்டியில் டாஸ் வென்ற ஆஸ்திரேலிய அணி முதலில் பேட்டிங் செய்வதாக அறிவித்தது. இதைத்தொடர்ந்து களமிறங்கிய ஆஸ்திரேலியா 50 ஓவர்களில் சிறப்பான பேட்டிங்கை வெளிப்படுத்தி 352/7 ரன்கள் குவித்து அசத்தியது.

அந்த அணிக்கு டேவிட் வார்னர் 56, மிட்சேல் மார்ஷ் 96, ஸ்டீவ் ஸ்மித் 74, மார்னஸ் லபுஷாக்ன 72 என டாப் 4 பேட்ஸ்மேன்கள் பெரிய ரன்களை குவித்து நல்ல தொடக்கத்தை கொடுத்தனர். இருப்பினும் மிடில் ஆர்டரில் அலெக்ஸ் கேரி 11, மேக்ஸ்வெல் 5, கேமரூன் கிரீன் 9 ரன்களில் அவுட்டாக்கி 400 ரன்களை ரன்களை தொடவிடாமல் செய்த இந்திய அணி சார்பில் அதிகபட்சமாக பும்ரா 3 விக்கெட்களும் குல்தீப் யாதவ் 2 விக்கெட்டுகளும் சாய்த்தனர்.

முன்னதாக இந்த போட்டி நடைபெற்ற ராஜ்கோட் மைதானத்தில் மதிய நேரத்தில் அதிகப்படியான வெப்பம் இருந்ததால் 28 ஓவர்களிலேயே வீரர்களுக்கு தண்ணீர் இடைவெளி விடப்பட்டது. அப்போது அதிகப்படியான வெப்பத்தை தாங்க முடியாத நட்சத்திர வீரர் ஸ்டீவ் ஸ்மித் தன்னுடைய அணி வீரர்களை நாற்காலி எடுத்து வரச் சொல்லி அதில் உட்கார்ந்து சில நிமிடங்கள் ஓய்வெடுத்தார்.

அந்த சமயத்தில் ஆஸ்திரேலிய வீரர்கள் அவருக்கு தலையில் ஐஸ் பேக் வைத்து வெப்பத்தைத் தணித்து கொண்டிருந்தனர். அதே நேரத்தில் களத்தில் இருந்து மற்றொரு வீரர் லபுஷாக்னேவும் தண்ணீர் குடிப்பதற்காக வந்தார். ஆனால் அப்போது அங்கே சென்ற விராட் கோலி லபுஷாக்னேவிடம் ஏதோ சொல்லிக்கொண்டே திடீரென ஒரு சில நொடிகள் உல்லாசமான நடனத்தை ஆடினார்.

அனேகமாக வெயிலின் தாக்கத்தை ஆஸ்திரேலிய வீரர்கள் தாங்க முடியாமல் போவது குறித்து கோலி கிண்டல் செய்திருக்கலாம். அதைக் கண்ட ரசிகர்கள் ஸ்டீவ் ஸ்மித்தை தான் கோலி கிண்டல் செய்கிறார் என இணையத்தில் கூறத் தொடங்கினர். விராட் கோலி போட்டிகளின் இடையே இது போன்ற செயல்களை செய்வது ஒன்றும் புதிதல்ல. ஆனால், இது ஸ்டீவ் ஸ்மித்தை கொஞ்சம் சீண்டிப் பார்த்தது போல இருந்தது குறிப்பிடத்தக்கது.