இந்தியா - இங்கிலாந்து அணிகளுக்கு இடையேயான மூன்று போட்டிகள் கொண்ட ஒருநாள் தொடரானது நடைபெற்று வருகிறது. இத்தொடரில் இதுவரை நடந்து முடிந்த முதலிரண்டு ஒருநாள் போட்டிகளின் முடிவில் இந்திய அணி இரண்டு போட்டியிலும் வெற்றிபெற்று அசத்தியதுடன், 2-0 என்ற கணக்கில் இங்கிலாந்தை வீழ்த்தி ஒருநாள் தொடரையும் கைப்பற்றி அசத்தியுள்ளது.
இதனையடுத்து இரு அணிகளுக்கும் இடையேயான மூன்றாவது ஒருநாள் போட்டி நாளை அஹ்மதாபாத்தில் உள்ள நரேந்திர மோடி கிரிக்கெட் மைதானத்தில் நடைபெறவுள்ளது. இதில் ஏற்கெனவே இந்திய அணியானது முதலிரண்டு போட்டிகளில் வெற்றிபெற்று தொடரை வென்றுள்ள நிலையில் இப்போட்டியிலும் ஆதிக்கம் செலுத்தும் என்ற எதிர்பார்ப்பு உள்ளது. அதேசமயம் இங்கிலாந்து அணியானது இப்போட்டியிலாவது வெற்றிபெற்று ஆறுதலை தேடும் முனைப்பில் உள்ளது.
இதற்காக இரு அணி வீரர்களும் தீவிரமான பயிற்சியில் ஈடுபட்டு வருகின்றனர். இத்தொடரின் முதல் போட்டியில் காயம் காரண்மாக விளையாடாத இந்திய அணியின் நட்சத்திர வீரர் விராட் கோலி, இரண்டாவது போட்டியில் விளையாடிய நிலையில் அதில் வெறும் 5 ரன்களில் ஆட்டமிழந்து ஏமாற்றமளித்தார். இந்நிலையில் இங்கிலாந்து அணிக்கு எதிரான மூன்றாவது போட்டியில் அவர் சிறப்பாக செயல்படும் பட்சத்தில் சில சாதனைகளை படைக்கும் வாய்ப்பை பெற்றுள்ளார்.
ஒருநாள் போட்டிகளில் 14000 ரன்கள்
அதன்படி இப்போட்டியில் விராட் கோலி மேற்கொண்டு 89 ரன்களைச் சேர்க்கும் பட்சத்தில் சர்வதேச ஒருநாள் கிரிக்கெட்டில் 14000 ரன்களை பூர்த்தி செய்வதுடன், கிரிக்கெட் வரலாற்றில் இந்த மைல் கல்லை அதிவேகமாக எட்டிய வீரர் எனும் சச்சின் டெண்டுல்கரின் சாதனையை முறியடிக்கவுள்ளார். முன்னதாக இந்திய அணியின் முன்னாள் ஜாம்பவான் சச்சின் டெண்டுல்கர் தனது 350ஆவது இன்னிங்ஸில் 14000 ரன்களை எடுத்ததே இதுநாள் வரை சாதனையாக உள்ளது.
அதேசமயம் விராட் கோலி இதுவரை 283 இன்னிங்களில் 58.18 என்ற சராசரிவுடன், 93.54 ஸ்ட்ரைக் ரேட்டுடனும் 13,906 ரன்கள் எடுத்துள்ளார். இதில் அவர் 50 சதங்கள் மற்றும் 72 அரைசதங்களை அடித்துள்ளார் என்பது குறிப்பிடத்தக்கது. இதற்கு முன் இந்திய அணியின் சச்சின் டெண்டுல்கர் மற்றும் இலங்கை அணியின் குமார் சங்கக்காரா ஆகியோர் மட்டும் சர்வதேச ஒருநாள் கிரிக்கெட்டில் 14ஆயிரம் ரன்களை அடித்துள்ளது குறிப்பிடத்தக்கது.
அதிக சதங்கள்
இது தவிர, இத்தொடரில் விராட் கோலி ஒரு சதம் அடித்தால், சர்வதேச கிரிக்கெட்டில் ஒரு வடிவத்தில் அதிக சதங்கள் அடித்த வீரர் என்ற சாதனையை சமன்செய்வார். முன்னதாக இந்திய அணியின் சச்சின் டெண்டுல்கர் சர்வதேச டெஸ்ட் கிரிக்கெட்டில் 51 சதங்களை அடித்துள்ள நிலையில், விராட் கோலி ஒருநாள் கிரிக்கெட்டில் 50 சதங்களை அடித்துள்ளார். ஆனால் தற்சமயம் விராட் கோலி மோசமான ஃபார்மில் இருப்பதால் இந்த சாதனையை அவர் படைப்பாரா என்ற கேள்வி எழுந்துள்ளது.
Also Read: Funding To Save Test Cricket
இந்திய அணி: ரோஹித் சர்மா, ஷுப்மன் கில், விராட் கோலி, ஸ்ரேயாஸ் ஐயர், கேஎல் ராகுல், ஹார்திக் பாண்டியா, அக்ஸர் படேல், வாஷிங்டன் சுந்தர், குல்தீப் யாதவ், ஹர்ஷித் ராணா, ஜஸ்பிரித் பும்ரா, முகமது ஷமி, அர்ஷ்தீப் சிங், யஷஸ்வி ஜெய்ஸ்வால், ரிஷப் பந்த், ரவீந்திர ஜடேஜா