ரஞ்சி கோப்பை 2024-25: ரயில்வேஸுக்கு எதிரான போட்டியில் விளையாடும் விராட் கோலி!

ரஞ்சி கோப்பை கிரிக்கெட் தொடரின் 2024-25 சீசனின் முதல் கட்ட போட்டிகள் நிறைவடைந்துள்ள நிலையில், இரண்டாம் கட்டம் எதிர்வரும் ஜனவரி 23ஆம் தேதி முதல் நடைபெறவுள்ளது. இத்தொடரின் முதல் கட்டத்தை விட இரண்டாம் கட்ட போட்டிகளுக்கான எதிர்பார்ப்புகள் அதிகரிக்க தொடங்கியுள்ளன. ஏனெனில் இத்தொடரில் இந்திய அணியின் முன்னணி வீரர்கள் பலரும் விளையாடவுள்ளனர்.

இதற்கு காரணம் இந்திய அணி சமீபத்தில் ஆஸ்திரேலியாவில் சுற்றுப்பயணம் மேற்கொண்டு 5 போட்டிகள் கொண்ட பார்டர் கவாஸ்கர் கோப்பை டெஸ்ட் தொடரில் 3-1 என்ற கணக்கில் இந்திய அணி இத்தொடரை இழந்துள்ளதுடன், உலக டெஸ்ட் சாம்பியன்ஷிப் தொடரின் இறுதிப்போட்டிக்கான வாய்ப்பையும் தவறவிட்டது. இந்த படுமோசமான தோல்வியின் காரணமாக இந்திய அணி மீது கடுமையான விமர்சனங்கள் எழுந்தன.

அதுமட்டுமில்லாமல் இந்த தொடரில் பேட்டர்கள் சொதப்பியதற்கு காரணம் அவர்கள் உள்ளூர் போட்டிகளை தவிர்த்து வருவது தான் என்றும் குற்றச்சாட்டுகள் எழுந்தன. இதையடுத்து சமீபத்தில் நடைபெற்று முடிந்த பிசிசிஐ பொதுக்குழு கூட்டத்தில் வீரர்களுக்கு பல்வேறு கட்டுப்பாடுகளும் விதிக்கப்பட்டிருந்தன. அதில் மிக முக்கியானது அனைத்து வீரர்களும் இந்தியாவில் நடைபெறும் உள்ளூர் போட்டிகளில் பங்கேற்க வேண்டும் என்பது கட்டாயமாக்கப்பட்டுள்ளது. 

இதனைத்தொடர்ந்து கேப்டன் ரோஹித் சர்மா, விராட் கோலி உள்ளிட்ட இந்திய வீரர்கள் ரஞ்சி கோப்பை கிரிக்கெட் தொடரில் பங்கேற்பதற்காக தயாராகி வருகின்றனர். இந்நிலையில் ரஞ்சி கோப்பை கிரிக்கெட் தொடரின் கடைசி இரண்டு போட்டிகளுக்கான டெல்லி அணியில் விராட் கோலி மற்றும் ரிஷப் பந்த் ஆகியோர் சேர்க்கப்பட்டிருந்தார். ஆனால் விராட் கோலிக்கு கழுத்து பகுதியில் ஏற்பட்டுள்ள வலி காரணமாக இந்த போட்டியில் அவர் விளையாட மாட்டார் என்று அறிவிக்கப்பட்டிருந்தது. 

இந்நிலையில் ஜனவரி 30ஆம் தேதி நடைபெற இருக்கும் ரயில்வேஸ் அணிக்கு எதிரான ரஞ்சி கோப்பை போட்டியில் விராட் கோலி விளையாடவுள்ளதாக தகவல் வெளியாகியுள்ளது. மேற்கொண்டு ரயில்வேஸ் அணிக்கு எதிரான் போட்டியில் விளையாட ஆயத்தமாக உள்ளேன் என்று டெல்லி கிரிக்கெட் சங்க தலைவர் மற்றும் நிர்வாகத்திடம் விராட் கோலி கூறியதாகவும் தகவல்கள் வெளிவந்துள்ளன. இதன்மூலம் 14 ஆண்டுகளுக்கு பிறகு விராட் கோலி ரஞ்சி கோப்பை போட்டிகளில் விளையாடவுள்ளது குறிப்பிடத்தக்கது.

முன்னதாக டெல்லி அணி வரும் ஜனவரி 23ஆம் தேதி சௌராஷ்டிரா அணிக்கு எதிரான போட்டியில் விளையாடவுள்ளது. இந்நிலையில் இப்போட்டிக்கான 21 பேர் அடங்கிய டெல்லி அணியை அம்மாநில கிரிக்கெட் வாரியம் சமீபத்தில் அறிவித்தது. இந்த அணியின் கேப்டனாக ஆயூஷ் பதோனி தொடர்வார் என அறிவிக்கப்பட்டுள்ளது. அதேசமயம் இந்திய விக்கெட் கீப்பர் ரிஷப் பந்தும் இந்த அணியில் இடம்பிடித்துள்ள நிலையில், விராட் கோலியின் பெயர் இந்த பட்டியலில் இடம்பெறவில்லை என்பது குறிப்பிடத்தக்கது. 

Also Read: Funding To Save Test Cricket

டெல்லி ரஞ்சி அணி: ஆயுஷ் பதோனி (கே), சனத் சங்வான், அர்பித் ராணா, யாஷ் துல், ரிஷப் பந்த், ஜான்டி சித்து, ஹிம்மத் சிங், நவ்தீப் சைனி, மனி கிரேவால், ஹர்ஷ் தியாகி, சித்தாந்த் சர்மா, ஷிவம் சர்மா, பிரணவ் ராஜ்வன்ஷி, வைபவ் கண்ட்பால், மயங்க் குசைன், ககன் வாட்ஸ், ஆயுஷ் தொசேஜா, ரவுனக் வகேலா, சுமித் மாத்தூர், ராகுல் கஹ்லோட், ஜிதேஷ் சிங்.