ஆசிய கோப்பை 2025: இலங்கை அணியில் ஹசரங்காவுக்கு வாய்ப்பு!
Sri Lanka Squad Asia Cup 2025: ஆசிய கோப்பை தொடருகான இலங்கை அணி அறிவிக்கப்பட்டுள்ள நிலையில், காயம் காரணமாக ஜிம்பாப்வே தொடரில் விளையாடாத வநிந்து ஹசரங்காவுக்கு இடம் கொடுக்கப்பட்டுள்ளது.
ஆசிய கோப்பை கிரிக்கெட் தொடரானது செப்டம்பர் 09ஆம் தேதி 09ஆம் தேதி முதல் ஐக்கிய அரபு அமீரகத்தில் நடைபெறவுள்ளது. இத்தொடரில் குரூப் ஏ பிரிவில் இந்தியா, பாகிஸ்தான், ஐக்கிய அரபு அமீரகம், நேபாள் ஆகிய அணிகள் இடம்பிடித்துள்ளன. அதேசமயம், குரூப் பி பிரிவில் இலங்கை, வங்கதேசம், ஆஃப்கானிஸ்தான் மற்றும் ஹாங்காங் அணிகளும் இடம்பிடித்துள்ளன. இதனையடுத்து இத்தொடருக்காக அனைத்து அணிகளும் தீவிரமாக தயாராகி வருகின்றன.
இந்த தொடரின் முதல் போட்டியில், ஆஃப்கானிஸ்தான் மற்றும் ஹாங்காங் அணிகள் பலப்பரீட்சை நடத்தவுள்ளன. இந்திய அணி செப்டம்பர் 10-ம் தேதி முதல் லீக் போட்டியில் ஐக்கிய அரபு அமீரக அணியை எதிர்கொள்கிறது. மேலும், ரசிகர்கள் பெரிதும் எதிர்பார்த்து காத்திருக்கும் இந்தியா மற்றும் பாகிஸ்தான் அணிகளுக்கு இடையேயான போட்டி செப்டம்பர் 14-ம் தேதி நடைபெறவுள்ளது. இதனையடுத்து இந்த தொடரில் பங்கேற்கும் அணிகளை அந்தந்த நாட்டு கிரிக்கெட் வாரியங்கள் அறிவித்து வருகின்றன.
இதில் இந்தியா, பாகிஸ்தான், வங்கதேசம் என அனைத்து அணிகளும் அறிவிக்கப்பட்டிருந்த நிலையில் இலங்கை அணி மட்டும் அறிவிக்கப்படாமல் இருந்தது. இந்நிலையில் இன்றைய தினம் 16பேர் அடங்கிய இலங்கை அணியை அந்நாட்டு கிரிக்கெட் வாரியம் அறிவித்தது. சரித் அசலங்கா தலைமையிலான இந்த அணியில், காயம் காரணமாக அவதிப்பட்டு வரும் வநிந்து ஹசரங்காவுக்கு வாய்ப்பு வழங்கப்பட்டுள்ளது.
இருப்பினும் அவது உடற்தகுதியைப் பொறுத்தே பிளேயிங் லெவனில் சேர்க்கப்படுவார் என்று கூறப்படுகிறது. அணியின் பேட்டிங்கில் குசல் மெண்டிஸ், பதும் நிஷங்க, குசல் பெரேரா ஆகியோரும், ஆல் ரவுண்டர்களாக தசுன் ஷனகா, கமிந்து மெண்டிஸ், துனித் வெல்லாலகேவும், பந்துவீச்சில், துஷ்மந்த சமீர, நுவான் துஷாரா, மதிஷா பத்திரான, மகேஷ் தீக்ஷனா ஆகியோருக்கும் இந்த அணியில் வாய்ப்பு வழங்கப்பட்டுள்ளது.
Also Read: LIVE Cricket Score
இலங்கை அணி: சரித் அசலங்கா (கேப்டன்), குசல் மெண்டிஸ், பதும் நிஷங்க, குசல் பெரேரா, கமில் மிஷார, தசுன் ஷனக, கமிந்து மெண்டிஸ், வனிந்து ஹசரங்க, நுவனிது ஃபெர்னாண்டோ, துனித் வெல்லாலகே, சமிக கருணாரத்ன, மகேஷ் தீக்ஷன, மதிஷ பத்திரன, நுவான் துஷார, துஷ்மந்த சமீர, பினுர ஃபெர்னாண்டோ.