டி20 உலகக்கோப்பையுடன் சர்வதேச கிரிக்கெட்டிலிருந்து ஓய்வு; வார்னர் ஓபன் டாக்!

ஆஸ்திரேலிய அணி தற்போது வெஸ்ட் இண்டீஸ் அணியுடன் 3 போட்டிகள் கொண்ட டி20 தொடரில் விளையாடி வருகிறது. இதில் இன்று நடைபெற்ற முதலாவது டி20 போட்டியில் ஆஸ்திரேலிய அணி 11 ரன்கள் வித்தியாசத்தில் வெஸ்ட் இண்டீஸ் அணியை வீழ்த்தி வெற்றிபெற்றது. ஹாபர்ட்டில் நடைபெற்ற இப்போட்டியில் முதலில் பேட்டிங் செய்த ஆஸ்திரேலிய அணி டேவிட் வார்னரின் அதிரடியான ஆட்டத்தின் மூலம் 20 ஓவர்கள் முடிவில் 213 ரன்களைக் குவித்தது.

இதில் அபார ஆட்டத்தை வெளிப்படுத்திய டேவிட் வார்னர் 36 பந்துகளில் 12 பவுண்டரி, ஒரு சிக்சர் என 70 ரன்களைச் சேர்த்தார். இதனைத்தொடர்ந்து  விளையாடிய வெஸ்ட் இண்டீஸ் அணியில் பிராண்டன் கிங், ஜான்சன் சார்ல்ஸ், ஜேசன் ஹோல்டர் ஆகியோரைத் தவிர மற்ற வீரர்கள் சோபிக்க தவறியதால் அந்த அணி 20 ஓவர்களில் 202 ரன்களை மட்டுமே எடுத்து தோல்வியைத் தழுவியது. இப்போட்டியில் அபார ஆட்டத்தை வெளிப்படுத்தி டேவிட் வார்னர் ஆட்டநாயகன் விருதை வென்றார்.

முன்னதாக இந்தியாவில் நடைபெற்று முடிந்த ஒருநாள் உலகக்கோப்பை கிரிக்கெட் தொடருடன் ஒருநாள் கிரிக்கெட் போட்டிகளிலிருந்து ஓய்வை அறிவித்திருந்த டேவிட் வார்னர், பாகிஸ்தான் அணிக்கெதிரான டெஸ்ட் தொடருடன் டெஸ்ட் கிரிக்கெட்டிலிருந்தும் ஓய்வை அறிவித்தார். இதனையடுத்து அவர் வரவுள்ள டி20 தொடருடன் சர்வதேச கிரிக்கெட்டிலிருந்து முழுவதுமாக ஓய்வு பெறவுள்ளதாக இன்றைய போட்டிக்கு பின் டேவிட் வார்னர் தெரிவித்துள்ளார். 

இதுகுறித்து பேசிய அவர், “ஒரு அணியாக இணைந்து வெற்றிபெறுவது மகிழ்ச்சி அளிக்கிறது. இது பேட்டிங் செய்ய ஒரு நல்ல விக்கெட்டாக இருந்தது. அதனை நாங்கள் பயன்படுத்து ரன்களைச் சேர்த்தோம். இப்போட்ட்டில் சிறப்பாக செயல்பட்டதின் மூலம் புத்துணர்ச்சியாக உணர்கிரேன். மேலும் இந்தாண்டு டி20 உலகக்கோப்பை தொடரில் விளையாட ஆர்வமாக இருப்பதுடன், எனது டி20 கிரிக்கெட்டையும் அத்துடன் முடிக்க விரும்புகிறேன்.

அடுத்த ஆறு மாதங்கள் சிறப்பானதாக அமையும் என நினைக்கிறேன். மேலும் இப்போதுள்ள இதே அணிதான் நியூசிலாந்துக்கு எதிரான தொடரிலும் விளையாடும் என நினைக்கிறேன். அத்தொடரிலும் நாங்கள் வெற்றி பெறுவது முக்கியம்” என்று தெரிவித்துள்ளார். இப்போட்டியில் அரைசதம் அடித்ததன் மூலம் டேவிட் வார்னர் தனித்துவமான சாதனை ஒன்றையும் படைத்துள்ளார். 

அதாது தன்னுடைய 100ஆவது டெஸ்ட் போட்டியில் தென் ஆப்பிரிக்காவிற்கு எதிராக விளையாடிய டேவிட் வார்னர் இரட்டை சதமடித்து அசத்தினார். அதேபோல இந்திய அணிக்கு எதிராக தன்னுடைய 100ஆவது ஒருநாள் போட்டியில் விளையாடிய அவர், அந்த போட்டியிலும் சதமடித்து அசத்தியிருந்தார். இந்நிலயில் தற்போது 100ஆவது டி20 போட்டியில் விளையாடியிருக்கும் டேவிட் வார்னர் 70 ரன்களை பதிவு செய்துள்ளார். இதன்மூலம் அனைத்து வடிவிலான 100ஆவது போட்டியிலும் குறைந்தபட்சம் அரைசதமடித்த முதல் வீரர் என்ற சாதனையை டேவிட் வார்னர் படைத்துள்ளது குறிப்பிடத்தக்கது.