வெஸ்ட் இண்டீஸ் - வங்கதேச அணிகளுக்கு இடையேயான முதல் டெஸ்ட் போட்டி ஆன்டிகுவாவில் நடந்தது. இப்போட்டியில் டாஸை இழந்து முதலில் பேட்டிங் செய்த வெஸ்ட் இண்டீஸ் அணி முதல் இன்னிங்ஸில் 9 விக்கெட்டுக்கு 450 ரன்கள் எடுத்து டிக்ளேர் செய்தது. ஜஸ்டின் கிரீவ்ஸ் 115 ரன்னும், மைக்கேல் லூயிஸ் 97 ரன்னும், அலிக் அதான்ஸ் 90 ரன்னும் எடுத்தனர். வங்கதேசம் சார்பில் ஹசன் மகமுது 3 விக்கெட்டும், தஸ்கின் அகமது, மெஹிதி ஹசன் தலா 2 விக்கெட்டும் வீழ்த்தினர்.
இதைதொடர்ந்து முதல் இன்னிங்ஸைத் தொடங்கிய வங்கதேச முதல் இன்னிங்சில் 9 விக்கெட்டுக்கு 269 ரன்கள் எடுத்து டிக்ளேர் செய்தது. அதில் அதிகபட்சமாக ஜகர் அலி 53 ரன்னும், மொமினுல் ஹக் 50 ரன்னும் எடுத்தனர். விண்டீஸ் தரப்பில் அல்ஜாரி ஜோசப் 3 விக்கெட்டுகளை வீழ்த்தினர். பின்னர் 181 ரன்கள் முன்னிலையுடன் இரண்டாவது இன்னிங்ஸை தொடங்கிய வெஸ்ட் இண்டீஸ் அணி இரண்டாவது இன்னிங்சில் 152 ரன்களுக்கு ஆல் அவுட்டானது.
இதில் அதிகபட்சமாக அலிக் அதான்ஸ் 42 ரன்கள் எடுத்தார். வங்கதேசம் சார்பில் தஸ்கின் அகமது 6 விக்கெட்டுகளை வீழ்த்தினார். அதன்பின் 334 ரன்கள் என்ற இலக்கை நோக்கி விளையாடிய வங்கதேச அணி இரண்டாவது இன்னிங்ஸில் 132 ரன்கலில் ஆல் அவுட்டானது. இதன் மூலம் வெஸ்ட் இண்டீஸ் அணி 201 ரன்கள் வித்தியாசத்தில் வங்கதேச அணியை வீழ்த்தியதுடன, 1-0 என்ற கணக்கில் டெஸ்ட் தொடரிலும் முன்னிலைப் பெற்று அசத்தியுள்ளது.
இந்நிலையில் சர்வதேச கிரிக்கெட் கவுன்சில் உலக டெஸ்ட் சாம்பியன்ஷிப் தொடரின் புதுபிக்கப்பட்ட புள்ளிப்பட்டியலை வெளியிட்டுள்ளது. அதன்படி, உந்த பட்டியலில் இந்திய அணி 61.11 புள்ளிகளுடன் முதலிடத்திலும், ஆஸ்திரேலிய அணி 57.69 புள்ளிகளுடன் இரண்டாம் இடத்திலும் தொடர்கின்றனர். மேற்கொண்டு இலங்கை அணி 55.56 புள்ளிகளுடன் மூன்றாம் இடத்திலும், நியூசிலாந்து அணி 54.55 புள்ளிகளுடன் நான்காம் இடத்திற்கு முன்னேறி அசத்தியுள்ளது.
மேலும் தென் ஆப்பிரிக்க அணியானது தற்போது 54.17 புள்ளிகளுடன் 5ஆம் இடத்திற்கு பின் தங்கியுள்ளது. இதற்கடுத்த இடத்தில் இங்கிலாந்து அணி 40.79 புள்ளிகளுடன் 6ஆம் இடத்தில் உள்ளது. மேலும் பாகிஸ்தான் அணியானது 33.33 புள்ளிகளைப் பெற்று தற்போது 7ஆம் இடத்தில் உள்ள நிலையில் வங்கதேச அணிக்கு எதிரான முதல் டெஸ்ட் போட்டியில் வெற்றிபெற்றதன் மூலம் வெஸ்ட் இண்டீஸ் அணி 26.67 புள்ளிகளைப் பெற்று 8ஆம் இடத்திற்கு முன்னேறியுள்ளது.
Also Read: Funding To Save Test Cricket
அதேசமயம் இப்போட்டியில் தோல்வியைத் தழுவிய வங்கதேச அணி 25 புள்ளிகளுடன் கடைசி இடத்திற்கு தள்ளப்பட்டுள்ளது. தற்போது இந்த பட்டியலில் முதல் 5 இடங்களில் உள்ள அணிகளுக்கு இடையே கடும் போட்டி நிலவி வருவதால் இதில் எந்த இரண்டு அணிகள் இறுதிப்போட்டிக்கு முன்னேறும் என்ற எதிர்பார்ப்புகள் அதிகரித்துள்ளன.