ஆஃப்கானிஸ்தான் அணியானது ஜிம்பாப்வேவில் சுற்றுப்பயணம் மேற்கொண்டு 3 போட்டிகளை கொண்ட ஒருநாள் மற்றும் டி20 தொடர்களிலும், 2 போட்டிகள் கொண்ட டெஸ்ட் தொடரிலும் விளையாடவுள்ளது. அதன்படி இவ்விரு அணிகளுக்கும் இடையேயான டி20 தொடரின் முதல் போட்டியானது இன்று (டிசம்பர் 11) ஹராரே ஸ்போர்ட்ஸ் கிளப் மைதானத்தில் நடைபெற்றது.
இப்போட்டியில் டாஸ் வென்ற ஆஃப்கானிஸ்தான் அணி முதலில் பேட்டிங் செய்வதாக அறிவித்தது. அதன்படி களமிறங்கிய அந்த அணிக்கு ரஹ்மனுல்லா குர்பாஸ் மற்றும் செதிகுல்ல அடால் இணை தொடக்கம் கொடுத்தனர். இதில் ரஹ்மனுல்லா குர்பாஸ் ரன்கள் ஏதுமின்றியும், செதிலுகுல்லா அடால் ஒரு ரன்னிலும் என விக்கெட்டை இழக்க, அடுத்து களமிறங்கிய முகமது இஷாக்கும் ஒரு ரன்னுடன் பெவிலியன் திரும்பினார். அதேசயம் அதிரடியாக விளையாட முயன்ற ஹஸ்ரதுல்லா ஸஸாய் 20 ரன்களிலும், அஸ்மதுல்லா ஒமர்ஸாய் 13 ரன்களில் விக்கெட்டை இழந்தனர்.
அதன்பின் ஜோடி சேர்ந்த கரிம் ஜானத் - முகமது நபி இணை பொறுப்புடன் விளையாடி அணியின் விக்கெட் இழப்பை தடுத்து நிறுத்தினர். இதில் கரிம் ஜானத் அரைசதம் கடந்தார். அதேசமயம் மறுபக்கம் அரைசதத்தை நெருங்கிய முகமது நபி 44 ரன்களில் ஆட்டமிழந்தார். இருப்பினும் இறுதிவரை களத்தில் இருந்த கரிம் ஜானத் 54 ரன்களைச் சேர்க்க, ஆஃப்கானிஸ்தான் அணி 20 ஓவர்கள் முடிவில் 6 விக்கெட்டுகள் இழப்பிற்கு 144 ரன்களை மட்டுமே சேர்த்தது. ஜிம்பாப்வே அணி தரப்பில் ரிச்சர்ட் ந்ங்கரவா 3 விக்கெட்டுகளை கைப்பற்றி அசத்தினார்.
பின்னர் இலக்கை நோக்கி களமிறங்கிய ஜிம்பாப்வே அணிக்கு பிரையன் பென்னட் - மருமணி இணை தொடக்கம் கொடுத்தனர். இதில் மருமணி 9 ரன்களை மட்டுமே எடுத்திருந்த நிலையில் விக்கெட்டை இழந்து ஏமாற்றமளித்தார். அதன்பின் பென்னட்டுடன் இணைந்து தியான் மேயர்ஸும் பொறுப்பான ஆட்டத்தை வெளிப்படுத்த அணியின் ஸ்கோரும் மளமளவென உயர்த்தினர். இருவரும் இணைந்து இரண்டாவது விக்கெட்டிற்கு 75 ரன்கள் பார்ட்னர்ஷிப்பும் அமைத்து அசத்தினர். அதன்பின் தியான் மெயர்ஸ் 32 ரன்களில் விக்கெட்டை இழக்க, அடுத்து களமிறங்கிய கேப்டன் சிக்கந்தர் ரஸா 9 ரனகளில் ஆட்டமிழந்தார்.
Also Read: Funding To Save Test Cricket
அதேசமயம் மறுபக்கம் அரைசதம் அடிப்பார் என எதிர்பார்க்கப்பட்ட பிரையன் பென்னட் 49 ரன்னில் விக்கெட்டை இழந்து அரைசதம் அடிக்கும் வய்ப்பை தவறவிட்டார். பின்னர் களமிறங்கிய ரியான் பார்ப் 10, வெஸ்லி மதவெரே 4 ரன்னிலும் என விக்கெட்டை இழந்தார். இறுதியில் தஷிங்கா முசெகிவா 16 ரன்களையும், வெலிங்டன் மஸகட்ஸா 6 ரன்களையும் சேர்த்து அணிக்கு வெற்றியைத் தேடிக்கொடுத்தார். இதன்மூலம் ஜிம்பாப்வே அணி 20 ஓவர்களில் இலக்கை எட்டியதுடன் 4 விக்கெட் வித்தியாசத்தில் ஆஃப்கானிஸ்தான் அணியை வீழ்த்தி வெற்றிபெற்றது.