ஆஃப்கானிஸ்தான் அணியானது தற்சமயம் ஜிம்பாப்வேவில் சுற்றுப்பயணம் மேற்கொண்டு 3 போட்டிகளை கொண்ட ஒருநாள் மற்றும் டி20 தொடர்களிலும், 2 போட்டிகள் கொண்ட டெஸ்ட் தொடரிலும் விளையாடி வருகிறது. இதில் நடைபெற்று வரும் டி20 தொடரின் முதலிரண்டு போட்டிகளின் முடிவில் இரு அணிகளும் தலா ஒரு வெற்றியைப் பதிவுசெய்து 1-1 என்ற கணக்கில் தொடரை சமன்செய்துள்ளன.
இதையடுத்து ஜிம்பாப்வே மற்றும் ஆஃப்கானிஸ்தான் அணிகளுக்கு இடையேயான டி20 தொடரின் வெற்றியாளரைத் தீர்மானிக்கும் மூன்றாவது மற்றும் கடைசி டி20 போட்டி இன்று (டிசம்பர் 14) ஹராரேவில் உள்ள ஸ்போர்ட்ஸ் கிளப் கிரிக்கெட் மைதானத்தில் நடைபெற்றது. இப்போட்டியில் டாஸ் வென்ற் ஆஃப்கானிஸ்தான் அணி முதலில் பந்துவீசுவதாக அறிவித்தது. அதன்படி களமிறங்கிய ஜிம்பாப்வே அணிக்கு மருமணி - பிரையன் பென்னட் இணை தொடக்கம் கொடுத்தனர். இதில் மருமணி 6 ரன்னில் விக்கெட்டை இழந்து பெவிலியனுக்கு நடையைக் கட்டினார்.
அவரைத்தொடர்ந்து 13 ரன்னில் தியான் மேயர்ஸ் விக்கெட்டை இழக்க, மறுபக்கம் சிறப்பான ஆட்டத்தை வெளிப்படுத்தி வந்த பிரையன் பென்னட்டும் 31 ரன்னில் விக்கெட்டை இழந்து பெவிலியன் திரும்பினார். அதன்பின் களமிறங்கிய வெஸ்லி மதவெரே 21, சிக்கந்தர் ரஸா 6, ஃபராஸ் அக்ரம் 6 என விக்கெட்டை இழக்க, அடுத்து களமிறங்கிய வீரர்களில் வெலிங்டன் மஸகட்ஸா 17 ரன்களைச் சேர்த்ததை தவிர்த்து மற்ற வீரர்கள் சொற்ப ரன்களுக்கு விக்கெட்டை இழந்தனர். இதனால் ஜிம்பாப்வே அணி 19.5 ஓவர்களில் அனைத்து விக்கெட்டுகளையும் இழந்து 127 ரன்களுக்கு ஆல் அவுட்டானது. ஆஃப்கான் அணி தரப்பில் ரஷித் கான் 4 விக்கெட்டுகளை கைப்பற்றினார்.
இதையடுத்து எளிய இலக்கை நோக்கி களமிறங்கிய ஆஃப்கானிஸ்தான் அணிக்கு ரஹ்மனுல்லா குர்பாஸ் - செதிகுல்லா அடல் இணை தொடக்கம் கொடுத்தனர். இதில் செதிகுல்லா அடல் 3 ரன்னிலும், அடுத்து களமிறங்கிய ஸுபைத் அக்பாரி 2 ரன்னிலும் என விக்கெட்டை இழந்து ஏமாற்றமளித்தனர். அதன்பின் பெரிதும் எதிர்பார்க்கப்பட்ட தார்விஷ் ரஸூலி 9 ரன்னிலும், மற்றொரு தொடக்க வீரர் ரஹ்மனுல்லா குர்பாஸ் 15 ரன்னிலும் என விக்கெட்டை இழந்தனர். இதனல் ஆஃப்கானிஸ்தன் அணி 44 ரன்களில் 4 விக்கெட்டுகளை இழந்து தடுமாறி வந்தது. பின்னர் அஸ்மதுல்லா ஒமர்ஸாய் - குல்பதின் நைப் இணை ஜோடி சேர்ந்து ஸ்கோரை உயர்த்தும் முயற்சியில் இறங்கினர்.
Also Read: Funding To Save Test Cricket
இருவரும் இணைந்து பொறுப்புடன் விளையாடி 5ஆவது விக்கெட்டிற்கு 48 ரன்கள் பார்ட்னர்ஷிப் அமைத்து அசத்தினர். பின் 22 ரன்னில் குல்பதின் நைப் விக்கெட்டை இழக்க, 34 ரன்னில் அஸ்மதுல்லா ஒமர்ஸாயும் ஆட்டமிழந்தார். இறுதியில் முகமது நபி 23 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் ஆஃப்கானிஸ்தான் அணி 19.3 ஓவர்களில் இலக்கை எட்டியதுடன் 3 விக்கெட் வித்தியாசத்தில் வெற்றிபெற்று அசத்தியது. இந்த வெற்றியின் மூலம் மூன்று போட்டிகள் கொண்ட டி20 தொடரை ஆஃப்கானிஸ்தான் அணி 2-1 என்ற கணக்கில் கைப்பற்றி அசத்தியுள்ளது.