WTC 2025: தென் ஆப்பிரிக்க அணி ஆஸ்திரேலியாவை வீழ்த்தும்: ஏபி டிவில்லியர்ஸ் நம்பிக்கை!

WTC 2025: தென் ஆப்பிரிக்க அணி ஆஸ்திரேலியாவை வீழ்த்தும்: ஏபி டிவில்லியர்ஸ் நம்பிக்கை! (Image Source: Google)

ஆஸ்திரேலியா - தென் ஆப்பிரிக்க அணிகளுக்கு இடையேயான உலக டெஸ்ட் சாம்பியன்ஷிப் தொடரின் இறுதிப் போட்டியானது ரசிகர்களின் பெரும் எதிர்பார்ப்புகளுக்கு மத்தியில் ஜூன் 11ஆம் தேதி லண்டனில் உள்ள புகழ்பெற்ற லார்ட்ஸ் கிரிக்கெட் மைதானத்தில் நடைபெறவுள்ளது. 

இதில் பாட் காம்மின்ஸ் தலைமையிலான ஆஸ்திரேலிய அணி நடப்பு சாம்பியன் எனும் அந்தஸ்துடன் இத்தொடரை எதிர்கொள்ளவுள்ளதால் இப்போட்டியிலும் வெற்றிபெற்று மீண்டும் சாம்பியன் பட்டத்தை வெல்லும் முனைப்புடன் களமிறங்குகிறது. அதேசமயம் ஐசிசி தொடர்களில் இதுநாள் வரை கோப்பையை வெல்ல முடியாமல் தவித்து வரும் தென் ஆப்பிரிக்க அணி இம்முறை தங்களின் வரலாற்றை மாற்றி எழுதுமா என்ற எதிர்பார்ப்புகள் அதிகரித்துள்ளன. 

இந்நிலையில் இந்த உலக டெஸ்ட் சாம்பியன்ஷிப் இறுதிப்போட்டியில் தென் ஆப்பிரிக்க அணியானது ஆஸ்திரேலியவை வீழ்த்தி சாம்பியன் பட்டத்தை வெல்லும் என அந்த அணியின் முன்னாள் வீரர் ஏபி டி வில்லியர்ஸ் தெரிவித்துள்ளார். இதுகுறித்து பேசிய அவர், “லார்ட்ஸில் நடபெறும் உலக டெஸ்ட் சாம்பியன்ஷிப் தொடரின் இறுதிப்போட்டியில் விளையாடுவது தென் ஆப்பிரிக்க கிரிக்கெட்டுக்கு ஒரு மகத்தான தருணம். முழு தேசமும் எங்கள் அணிக்கு ஆதரவாக இருக்கும். 

மேலும் இந்த முறை நாங்கள் எல்லையைக் கடக்க முடியும் என்று நம்புகிறோம். இந்த சவாலுக்காக நான் உற்சாகமாக இருக்கிறேன். இது ஒரு நல்ல சமநிலையான அணி, மேலும் ஆஸ்திரேலியாவை வீழ்த்த முடியும் என்று நான் அமைதியாக நம்பிக்கையுடன் இருக்கிறேன். இந்த ஐசிசி உலக டெஸ்ட் சாம்பியன்ஷிப் இறுதிப் போட்டியில் ஆஸ்திரேலிய அணி கோப்பையை வெல்லும் என்று பலராலும் கணிக்கப்படும் நிலையில், தென் ஆப்பிரிக்க அணி நிச்சயம் வெற்றிபெறும் என்று நினைக்கிறேன்.

ஆஸ்திரேலியா மிகவும் அனுபவம் வாய்ந்த ஒரு அணி. அதனால் இந்த போட்டி தென் ஆப்பிரிக்க அணிக்கு அவ்வளவு எளிதாக இருக்காது. ஆனால் நான் முழு நம்பிக்கையுடன் இருக்கிறேன், ஏனென்றால் நாங்கள் நல்ல ஃபார்மில் உள்ள பல வீரர்களுடன் இப்போட்டியை எதிர்கொள்ள இருக்கிறோம். எல்லாவற்றிற்கும் மேலாக, இது ஒரு இறுதிப் போட்டி, மேலும் இரு அணிகளும் இங்கே தங்கள் இடத்தைப் பெற்றுள்ளன” என்று தெரிவித்துள்ளார்.