டி20 கிரிக்கெட்டிலில் இருந்து ஓய்வை அறிவித்தார் ஆரோன் ஃபிஞ்ச்!

சர்வதேச டி20 கிரிக்கெட்டில் இருந்து ஆஸ்திரேலிய அணியின் முன்னாள் கேப்டன் ஆரோன் ஃபிஞ்ச் ஓய்வு பெறுவதாக அறிவித்துள்ளார்.

Australia's White-ball Expert Aron Finch Retires From International Cricket (Image Source: Google)

ஆஸ்திரேலிய அணியின் கேப்டன் ஒருநாள் மற்றும் டி20 அணிகளின் கேப்டனாக செயல்பட்டுவந்தவர் ஆரோன் ஃபிஞ்ச். அமீரகத்தில் நடைபெற்ற டி20 உலகக் கோப்பை 2021 தொடரில், டாஸ் வென்று பந்துவீச்சை தேர்வு செய்யும் அணிக்குத்தான் வெற்றி வாய்ப்பு பிரகாசமாக இருந்த நிலையில், அனைத்து போட்டிகளிலும் டாஸ் வென்று, இறுதியில் ஆஸ்திரேலிய அணிக்கு கோப்பையையும் ஆரோன் பிஞ்ச் வென்று கொடுத்தார்.

இதனைத் தொடர்ந்து 2022ஆம் ஆண்டு டி20 உலகக் கோப்பை தொடரில், ஆஸ்திரேலிய அணி சிறப்பாக செயல்படவில்லை. அரையிறுதிக்கு கூட முன்னேற முடியவில்லை. குறிப்பாக, கடைசி லீக் போட்டியில் ஜிம்பாப்வேக்கு எதிராக பிஞ்ச் காயம் காரணமாக விலகினார். மேத்யூ வேட்தான் அணியை வழிநடத்தினார். அடுத்து, ஆஸ்திரேலிய அணி ஒருநாள், டெஸ்ட் போட்டிகளில்தான் அதிகம் விளையடி வருகிறது.

ஆஸ்திரேலிய அணிக்கு அடுத்த டி20 தொடர், ஆகஸ்ட் மாதத்தில்தான் தென் ஆப்பிரிக்காவுக்கு எதிராக இருக்கிறது. இதன் காரணமாகவும், அடுத்த டி20 உலகக் கோப்பை தொடர் 2024ஆம் ஆண்டில்தான் நடைபெறும் என்பதாலும், கேப்டன் ஆரோன் ஃபிஞ்ச் ஓய்வு அறிவித்துள்ளார்.

இதுகுறித்து அவர் வெளியிட்டுள்ள அறிக்கையில், “ஆஸ்திரேலிய அணிக்கு அடுத்த டி20 தொடர் ஆகஸ்ட் மாதத்தில்தான் இருக்கிறது. மேலும், 2024ஆம் ஆண்டு டி20 உலகக் கோப்பை தொடரில் நான் பங்கேற்க வாய்ப்பு மிகமிக குறைவு என்பதால், டி20 கிரிக்கெட்டில் இருந்து ஓய்வு பெறுகிறேன். பிக்பாஷ் போன்ற உள்ளூர் டி20 லீக் தொடர்களில் நிச்சயம் விளையாடுவேன்’’ எனக் கூறியுள்ளார்.

ஆரோன் பிஞ்ச் ஆஸ்திரேலிய அணிக்காக டி20 கிரிக்கெட்டில் 34.28 சராசரி, 142.53 ஸ்ட்ரைக் ரேட்டுடன் 3,120 ரன்களை அடித்திருக்கிறார். 2018ஆம் ஆண்டில், ஜிம்பாப்வேக்கு எதிரான ஒரு டி20 போட்டியில் 172 ரன்களை குவித்து அசத்தினார். அதுமட்டுமல்ல, 2013ஆம் ஆண்டில் இங்கிலாந்து அணிக்கு எதிராக 156 ரன்களை குவித்தார். இன்றுவரை டி20 கிரிக்கெட்டில் எந்த வீரரும் இரண்டு முறை 150+ ரன்களை அடிக்கவில்லை. இனியும் அடிப்பது கடினம் எனக் கருதப்படுகிறது.

பிஞ்ச் கேப்டன் பதவியில் இருந்து விலகினாலும், உடனே புதுக் கேப்டனை நியமிக்க வேண்டிய அவசியம் ஆஸ்திரேலிய கிரிக்கெட் வாரியத்திற்கு இல்லை. அடுத்த டி20 தொடர் ஆகஸ்டில்தான் நடைபெறவுள்ளது. புதுக் கேப்டனுக்கான ரேசில் பாட் கம்மின்ஸ், ஸ்டீவன் ஸ்மித், மேத்யூ வேட் ஆகியோர் இருப்பதாக தெரிகிறது. இதில், மேத்யூ வேட்தான் புதுக் கேப்டனாக செயல்பட வாய்ப்பிருப்பதாக கணிக்கப்பட்டுள்ளது.

பிஞ்ச் ஏற்கனவே ஒருநாள், டெஸ்ட் அணிகளில் இருந்து ஓய்வு அறிவித்துவிட்டார். இவர் ஆஸ்திரேலிய அணிக்காக கிட்டதட்ட 12 வருடங்கள் விளையாடி வந்தார் என்பது குறிப்பிடத்தக்கது.