எல்பிஎல் 2022: அசலங்கா அதிரடியில் இறுதிப்போட்டிக்குள் நுழைந்தது கொழும்பு ஸ்டார்ஸ்!

கண்டி ஃபால்கன்ஸுக்கு எதிரான எல்பிஎல் குவாலிஃபையர் ஆட்டத்தில் கொழும்பு ஸ்டார்ஸ் அணி 6 விக்கெட் வித்தியாசத்தில் வெற்றிபெற்று, இறுதிப்போட்டிக்குள் நுழைந்தது.

Colombo Stars Beat Kandy Falcons By 6 Wickets To Reach Final Of LPL 2022 (Image Source: Google)

இலங்கையின் உள்ளூர் கிரிக்கெட் தொடரான லங்கா பிரீமியர் லீக்கின் நடப்பாண்டு சீசன் இறுதிக்கட்டத்தை எட்டியுள்ளது. இதில் நேற்று நடைபெற்ற குவாலிஃபையர் ஆட்டத்தில் கண்டி ஃபால்கன்ஸ் - கொழும்பு ஸ்டார்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற கொழும்பு ஸ்டார்ஸ் அணி முதலில் பந்துவீச தீர்மானித்தது.

அதன்படி களமிறங்கிய கண்டி அணியின் தொடக்க வீரர்கள் பதும் நிஷங்கா 2 ரன்னிலும், ஆண்ட்ரே ஃபிளட்சர் ரன் ஏதுமின்றியும் விக்கெட்டை இழக்க, அடுத்து வந்த கமிந்து மெண்டிஸும் 23 ரன்களோடு நடையைக் கட்டினார். இதன்பின் ஜோடி சேர்ந்த ஆஷென் பண்டாரா - வநிந்து ஹசரங்கா இணை அதிரடியான ஆட்டத்தை வெளிப்படுத்தி மளமளவென ஸ்கோரை உயர்த்தினர்.

இதில் பண்டாரா 40 ரன்களில் ஆட்டமிழந்து அரைசதத்தை தவறவிட, மறுமுனையில் வநிந்து ஹசரங்கா அபாரமான ஆட்டத்தை வெளிப்படுத்தி அரைசதம் கடந்தார். தொடர்ந்து இறுதிவரை ஆட்டமிழக்காமல் இருந்த ஹசரங்கா 8 பவுண்டரி, 3 சிக்சர்கள் என 77 ரன்களை விளாசினார்.

இதன்மூலம் 20 ஓவர்கள் முடிவில் கண்டி ஃபால்கன்ஸ் அணி 6 விக்கெட்டுகளை இழந்து 168 ரன்களைச் சேர்த்தது. கொழும்பு அணி தரப்பில் அபாரமாக பந்துவீசிய ரஜிதா 4 விக்கெட்டுகளை வீழ்த்தினார்.

இதையடுத்து இலக்கை துரத்திய கொழும்பு அணியில் நிஷன் மதுசங்கா 11 ரன்களில் ஆட்டமிழந்து ஏமாற்றமளித்தார். இதையடுத்து ஜோடி சேர்ந்த தினேஷ் சண்டிமல் - சரித் அசலங்கா இணை சிறப்பான ஆட்டத்தை வெளிப்படுத்தி ஸ்கோரை உயர்த்தினர். இதில் சண்டிமல் 38  ரன்களில் ஆட்டமிழந்தார்.

ஆனால் தொடர்ந்து சிறப்பாக விளையாடி வந்த சரித் அசலங்கா அரைசதம் கடந்ததுடன், 64 ரன்களைச் சேர்த்து ஆட்டமிழந்தார். அடுத்து களமிறங்கிய ரவி போபாரா - ஏஞ்சலோ மேத்யூஸ் இணை கடைசி வரை களத்தில் இருந்து அணியை வெற்றிக்கு அழைத்துச் சென்றனர். 

இதன்மூலம் கொழும்பு ஸ்டார்ஸ் அணி 18.5 ஓவர்களில் இலக்கை எட்டியதுடன், 6 விக்கெட் வித்தியாசத்தில் கண்டி ஃபால்கன்ஸை வீழ்த்தில் இறுதிப்போட்டிக்குள் நுழைந்துள்ளது. இப்போட்டியில் சிறப்பாக பந்துவீசிய ரஜிதா ஆட்டநாயகனாகத் தேர்வு செய்யப்பட்டார்.

Win Big, Make Your Cricket Tales Now