டி20 தொடரிலும் வெஸ்ட் இண்டீஸை ஒயிட்வாஷ்செய்த ஆஸ்திரேலியா!
வெஸ்ட் இண்டீஸுக்கு எதிரான ஐந்தாவது டி20 போட்டியில் ஆஸ்திரேலியா அணி 3 விக்கெட் வித்தியாசத்தில் வெற்றி பெற்று அசத்தியுள்ளது.
ஆஸ்திரேலிய அணி தற்சமயம் வெஸ்ட் இண்டீஸில் சுற்றுப்பயணம் மேற்கொண்டு 5 போட்டிகள் கொண்ட டி20 தொடரில் விளையாடியது.இதில் நடந்து முடிந்த நான்கு டி20 போட்டிகளிலும் ஆஸ்திரேலிய அணி வெற்றிபெற்று 4-0 என்ற கணக்கில் தொடரை கைப்பற்றி அசத்திய நிலையில், அணிகளுக்கு இடையேயான ஐந்தாவது மற்றும் கடைசி டி20 போட்டி இன்று (ஜூலை 29) செயிண்ட் கிட்ஸில் உள்ள வார்னர் பார்க் கிரிக்கெட் மைதானத்தில் நடைபெற்றது. இந்த போட்டியில் டாஸ் வென்ற ஆஸ்திரேலிய அணி முதலில் பந்துவீசுவதாக தீர்மானித்து வெஸ்ட் இண்டீஸை பேட்டிங் செய்ய அழைத்தது.
முதலில் பேட்டிங் செய்ய களமிறங்கிய வெஸ்ட் இண்டீஸ் அணியில் தொடக்க வீரர்கள் கேப்டன் ஷாய் ஹோப் 9 ரன்னிலும், பிராண்டன் கிங் 11 ரன்னிலும் என விக்கெட்டை இழக்க, அடுத்து வந்த கேசி கார்டி ஒரு ரன்னுடன் நடையைக் கட்டினார். பின்னர் இணைந்த ஷெர்ஃபேன் ரூதர்ஃபோட் - ஷிம்ரான் ஹெட்மையர் இணை ஓரளவு தாக்குப்பிடித்து அணியின் ஸ்கோரை உயர்த்தினர். இதில் ரூதர்ஃபோர்ட் 6 பவுண்டரி, ஒரு சிக்ஸர் என 35 ரன்களில் விக்கெட்டை இழக்க, மறுபக்கம் சிறப்பான ஆட்டத்தை வெளிப்படுத்திய ஹெட்மையர் தனது அரைசதத்தைப் பதிவுசெய்த கையோடு 3 பவுண்டரிகள், 3 சிக்ஸர்களுடன் 52 ரன்களுக்கு ஆட்டமிழந்தார்.
மேற்கொண்டு களமிறங்கிய வீரர்களில் ஜேசன் ஹோல்டர் 20 ரன்களைச் சேர்த்ததை தவிர்த்து மற்ற வீரர்கள் யாரும் பெரிதளவில் ரன்களைச் சேர்க்க தவறினர். இதனால் வெஸ்ட் இண்டீஸ் அணி 19.4 ஓவர்களிலேயே அனைத்து விக்கெட்டுகளையும் இழந்து 170 ரன்களில் ஆல் அவுட்டானது. ஆஸ்திரேலிய அணி தரப்பில் பென் துவார்ஷுயிஸ் 3 விக்கெட்டுகளை கைப்பற்றினார். பின்னர் இலக்கை நோக்கி விளையாடிய ஆஸ்திரேலிய அணிக்கு தொடக்கமே அதிர்ச்சியளிக்கும் வகையில் கிளென் மேக்ஸ்வெல் ரன்கள் ஏதுமின்றியும், ஜோஷ் இங்கிலிஸ் 10 ரன்களுக்கும், கேப்டன் மிட்செல் மார்ஷ் 14 ரன்னிலும் என விக்கெடுகளை இழந்து ஏமாற்றமளித்தனர்.
Also Read: LIVE Cricket Score
பின்னர் களமிறங்கிய கேமரூன் க்ரீன் 5 பவுண்டரிகளுடன் 32 ரன்களையும், டிம் டேவிட் ஒரு பவுண்டரி, 4 சிக்ஸர்களுடன் 30 ரன்களையும், மிட்செல் ஓவன் 3 பவுண்டரிகள், 3 சிக்ஸர்களுடன் 37 ரன்களையும் சேர்த்து விக்கெட்டை இழந்தாலும், இறுதிவரை ஆட்டமிழக்காமல் இருந்த ஆரோன் ஹார்டி 28 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் ஆஸ்திரேலிய அணி 17 ஓவர்களில் இலக்கை எட்டியதுடன் 3 விக்கெட் வித்தியாசத்தில் வெஸ்ட் இண்டீஸை வீழ்த்தி வெற்றிபெற்றது. இந்த வெற்றியின் மூலம் ஆஸ்திரேலிய அணி 5-0 என்ற கணக்கில் தொடரைக் கைப்பற்றி வெஸ்ட் இண்டீஸை ஒயிட்வாஷ் செய்தது.
Win Big, Make Your Cricket Tales Now
