ENG vs WI: தொடரிலிருந்து விலகிய ஜோமி ஓவர்டன்; பின்னடைவை சந்திக்கும் இங்கிலாந்து!

வெஸ்ட் இண்டீஸூக்கு எதிரான ஒருநாள் தொடரிலிருந்து இங்கிலாந்து ஆல் ரவுண்டர் ஜேமி ஓவர்டன் காயம் காரணமாக விலகியுள்ளார்.

ENG vs WI: தொடரிலிருந்து விலகிய ஜோமி ஓவர்டன்; பின்னடைவை சந்திக்கும் இங்கிலாந்து! (Image Source: Google)

இங்கிலாந்து - வெஸ்ட் இண்டீஸ் அணிகளுக்கு இடையேயான மூன்று போட்டிகள் கொண்ட ஒருநாள் தொடரானது நடைபெற்று வருகிறது. இதில் நடைபெற்று முடிந்த முதல் ஒருநாள் போட்டியில் இங்கிலாந்து அணி அபார வெற்றியைப் பதிவுசெய்து அசத்தியுள்ளது. 

இந்நிலையில் இங்கிலாந்து - வெஸ்ட் இண்டீஸ் அணிகளுக்கு இடையேயான இரண்டாவது ஒருநாள் போட்டி நாளை கார்டிஃபில் உள்ள சோஃபியா கார்டன்ஸ் கிரிக்கெட் மைதானத்தில் நடைபெறவுள்ளது. இதில் ஏற்கெனவே இங்கிலாந்து அணி இப்போட்டியிலும் வெற்றிபெற்று தொடரை கைப்பற்ரும் முனைப்பிலும், வெஸ்ட் இண்டீஸ் அணி முந்தைய தோல்விக்கு பதிலடி கொடுக்கும் முனைப்பிலும் இப்போட்டியை எதிர்கொள்ளவுள்ளது. 

இதனால் இப்போட்டியில் எந்த அணி வெற்றிபெறும் என்ற எதிர்பார்ப்புகள் அதிகரித்துள்ளது. இதற்காக இரு அணி வீரர்களும் தயாராகி வருகின்றனர். இந்நிலையில் இப்போட்டிக்கு முன்னதாக இங்கிலாந்து அணி பின்னடைவை சந்தித்துள்ளது. அதன்படி அந்த அணியின் ஆல் ரவுண்டர் ஜேமி ஓவர்டன் விரலில் ஏற்பட்ட எழும்பு முறிவு காரணமாக வெஸ்ட் இண்டீஸுக்கு எதிரான ஒருநாள் தொடரிலிருந்து விலகுவதாக அறிவிக்கப்பட்டுள்ளது. 

வெஸ்ட் இண்டீஸுக்கு எதிரான முதல் ஒருநாள் போட்டியின் போது தனது முதல் ஓவரை வீச வந்த ஜேமி ஓவர்டன், ஓவரின் இரண்டாவது பந்தை எதிர்கொண்ட கேசி கார்டி அடித்த பந்தை தடுக்க முயன்றார். அப்போது அவரது கைகளில் பந்து பலமாக தாக்கியதை அடுத்து ஓவர்டன் உடனடியாக பெவிலியனுக்கு திரும்பினார். அதன்பின் ஜேக்கப் பெத்தல் அந்த ஓவரின் எஞ்சிய பந்துகளை வீசினார். இருப்பினும் மீண்டும் பந்துவீசிய ஓவர்டன் இப்போட்டியில் 5.2 ஓவர்களை வீசியதுடன் 3 விக்கெட்டுகளையும் வீழ்த்தினார்.

இதுகுறித்து இங்கிலாந்து கிரிக்கெட் வாரியம் வெளியிட்டுள்ள அறிக்கையில், “ஜேமி ஓவர்டன் இப்போது இங்கிலாந்து மருத்துவக் குழுவின் மேற்பார்வையின் கீழ் சிகிச்சைப் பெற்று வருகிறார். இதன் காரணமாக அவர் இத்தொடரிலிருந்து விலகிவுள்ளார். இருப்பினும் இங்கிலாந்து ஒருநாள் அணியில் மாற்று வீரர் யாரும் சேர்க்கப்படமாட்டார்” என்று அறிவித்துள்ளது. முன்னதாக கஸ் அட்கின்சன் காயம் காரணமாக விலகிய நிலையில் தற்போது ஓவர்டனும் விலகியுள்ளது அணிக்கு பின்னடைவாக பார்க்கப்படுகிறது. 

இங்கிலாந்து ஒருநாள் அணி: ஹாரி புரூக் (கேப்டன்), டாம் பான்டன், ஜேக்கப் பெத்தேல், ஜோஸ் பட்லர், பிரைடன் கார்ஸ், பென் டக்கெட், டாம் ஹார்ட்லி, வில் ஜாக்ஸ், சாகிப் மஹ்மூத்,மேத்யூ பாட்ஸ், ஆதில் ரஷித், ஜோ ரூட், ஜேமி ஸ்மித், லுக் வுட்.