IND vs AUS, 3rd T20I: எல்லிஸ் பெர்ரி, ஹாரிஸ் காட்டடி; இந்திய அணிக்கு 173 டார்கெட்!
இந்திய மகளிர் அணிக்கெதிரான 3ஆவது டி20 போட்டியில் முதலில் பேட்டிங் செய்த ஆஸ்திரேலிய மகளிர் அணி 173 ரன்களை இலக்காக நிர்ணயித்துள்ளது.
இந்நிலையில் இரு அணிகளுக்கும் இடையேயான மூன்றாவது டி20 போட்டி இன்று பிரபோர்ன் கிரிக்கெட் மைதானத்தில் நடைபெறுகிறது. இப்போட்டியில் டாஸ் வென்றுள்ள இந்திய அணி கேப்டன் ஹர்மன்ப்ரீத் கவுர் முதலில் பந்துவீசுவதாக தீர்மானித்தார்.
Trending
அதன்படி களமிறங்கிய ஆஸ்திரேலிய அணியில் நட்சத்திர வீராங்கனைகள் கேப்டன் அலிசா ஹீலி, தஹிலா மெக்ராத் ஆகியோர் சொற்ப ரன்களுக்கு விக்கெட்டை இழந்து பெவிலியன் திரும்பினர். அதன்பின் ஜோடி சேர்ந்த பெத் மூனி - எல்லிஸ் பெர்ரி இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர்.
இதில் கடந்த இரு போட்டிகளிலும் அரைசதம் கடந்த பெத் மூனி இப்போட்டியிலும் அரைசதம் அடிப்பார் என எதிர்பார்க்கப்பட்ட நிலையில், 30 ரன்களுக்கு ஆட்டமிழந்து வெளியேறினார். அவரைத் தொடர்ந்து வந்த ஆஷ்லே கார்ட்னரும் 7 ரன்களோடு நடையைக் கட்டினார்.
பின்னர் ஜோடி சேர்ந்த எல்லிஸ் பெர்ரி - கிரேஸ் ஹாரிஸ் இணை அபாரமான ஆட்டத்தை வெளிப்படுத்தி, பவுண்டரியும் சிக்சர்களுமாக பறக்கவிட்டு அசத்தினர். இதனால் 150 ரன்களைக் கூட தாண்டாது என நினைத்த ஆஸ்திரேலிய அணி 17ஆவது ஓவரிலேயே 150 ரன்களைக் கடந்தது.
இதில் அரைசதம் கடந்து சதத்தை நோக்கி நகர்ந்து கொண்டிருந்த எல்லிஸ் பெர்ரி 47 பந்துகளில் 9 பவுண்டரி, 3 சிக்சர்கள் என 75 ரன்கள் எடுத்த நிலையில் ஆட்டமிழந்தார். அவரைத் தொடர்ந்து வந்த அனபெல் சதர்லாந்த் ஒரு ரன்னில் அவுட்டாக, அரைசத்தை விளாச வெறிகொண்டு விளையாடிய கிரேஸ் ஹாரிஸும் 18 பந்துகளில் 4 பவுண்டரி, 3 சிக்சர்கள் என 41 ரன்களைச் சேர்த்து ஆட்டமிழந்தார்.
அதன்பின் களமிறங்கிய வீராங்கனைகல் சோபிக்க தவறியதால், 20 ஓவர்கள் முடிவில் ஆஸ்திரேலிய மகளிர் அணி 8 விக்கெட் இழப்பிற்கு 172 ரன்களை எடுத்தது. இந்திய அணி தரப்பில் தீப்தி சர்மா, ரேனுகா சிங், தேவிகா வைத்யா, அஞ்சலி சர்வானி ஆகியோர் தலா 2 விக்கெட்டுகளைக் கைப்பற்றினர்.
Win Big, Make Your Cricket Tales Now
