IND vs ENG: முதலிரண்டு டெஸ்ட் போட்டிகளில் இருந்து விலகிய விராட் கோலி!
இங்கிலாந்து அணிக்கெதிரான முதலிரண்டு டெஸ்ட் போட்டிகளில் இருந்து இந்திய அணியின் நட்சத்திர வீரர் விராட் கோலி தனிப்பட்ட காரணங்களினால் விலகியுள்ளார்.
இந்தியா - இங்கிலாந்து அணிகளுக்கு இடையேயான 5 போட்டிகள் கொண்ட டெஸ்ட் தொடர் இம்மாதம் முதல் தொடங்கவுள்ளது. அதன்படி இவ்விரு அணிகளுக்கும் இடையேயான முதலாவது டெஸ்ட் போட்டி வரும் 25ஆம் தேதி ஹைத்ராபாத்திலுள்ள ராஜீவ் காந்தி கிரிக்கெட் மைதானத்தில் நடைபெறவுள்ளது. உலக டெஸ்ட் சாம்பியன்ஷிப் தொடரின் அங்கமாக இத்தொடர் நடைபெறவுள்ளதால் ரசிகர்களின் எதிர்பார்ப்பும் அதிகரித்துள்ளன.
இதையடுத்து இப்போட்டிக்கான இரு அணி வீரர்களும் நேற்றைய தினம் ஹைத்ராபாத்திற்கு சென்று தங்களது பயிற்சிகளை மேற்கொண்டு வருகின்றன. இந்நிலையில் இங்கிலாந்து அணிக்கெதிரான முதலிரண்டு டெஸ்ட் போட்டிக்கான இந்திய அணியில் இடம்பிடித்திருந்த நட்சத்திர வீரர் விராட் கோலி தனிப்பட்ட காரணங்களினால் விலகியுள்ளதாக பிசிசிஐ அறிவித்துள்ளது.
Trending
இதுகுறித்து பிசிசிஐ வெளியிட்டுள்ள அறிக்கையில், “இங்கிலாந்துக்கு எதிரான டெஸ்ட் தொடரின் முதல் இரண்டு டெஸ்ட் போட்டிகளிலிருந்து தனிப்பட்ட காரணங்களுக்காக விலகுவதாக பிசிசிஐயிடம் விராட் கோலி தெரிவித்துள்ளார். மேலும் கேப்டன் ரோஹித் சர்மா, அணி நிர்வாகம் மற்றும் தேர்வாளர்கள் ஆகியோரிடம் பேசிய விராட் கோலி, நாட்டைப் பிரதிநிதித்துவப்படுத்துவதே தனது முதன்மையான கடமையாக இருக்கும் அதே வேளையில், சில தனிப்பட்ட சூழ்நிலைகளின் காரணமாக இப்போட்டிகளிலிருந்து விலகுகிறேன் என்று தெரிவித்துள்ளார்.
விராட் கோலியின் இந்த முடிவை மதித்து பிசிசிஐ மற்றும் அணி நிர்வாகம் தனது ஆதரவை வழங்கியுள்ளது. மேலும் மீதமுள்ள வீரர்கள் இந்த டெஸ்ட் தொடரில் சிறந்த ஆட்டத்தை வெளிப்படுத்துவார்கள் என்ற நம்பிக்கையையும் நாங்கள் கொண்டுள்ளோம். இந்த நேரத்தில் விராட் கோலியின் தனியுரிமைக்கு மதிப்பளிக்குமாறும் அவரது தனிப்பட்ட காரணங்களின் தன்மை குறித்து ஊகங்களைத் தவிர்க்குமாறும் ஊடகங்கள் மற்றும் ரசிகர்களை பிசிசிஐ கேட்டுக்கொள்கிறது” என்றும் குறிப்பிட்டுள்ளது.
முன்னதாக ஐசிசி ஒருநாள் உலகக்கோப்பை தொடருக்கு பின் நடைபெற்ற ஆஸ்திரேலியாவுக்கு எதிரான டி20 தொடர் மற்றும் தென் ஆப்பிரிக்காவுக்கு எதிரான ஒருநாள் மற்றும் டி20 தொடர்களிலிருந்தும், சமீபத்தில் நடந்துமுடிந்த ஆஃப்கானிஸ்தானுக்கு எதிரான முதல் டி20 போட்டியிலிருந்தும் விராட் கோலி தனிப்பட்ட காரணங்களால் விலகியிருந்தது குறிப்பிடத்தக்கது. அதேசமயம் விராட் கோலிக்கான மாற்று வீரர் குறித்தும் பிசிசிஐ எந்தவித தகவலும் தெரிவிக்கவில்லை என்பது குறிப்பிடத்தக்கது.
Win Big, Make Your Cricket Tales Now
Cricket Scorecard
Major Clubs T20 Tournament
