IND vs NZ, 1st T20I: வாஷிங்டன் போராட்டம் வீண்; இந்தியாவை வீழ்த்தியது நியூசிலாந்து!

இந்தியாவிற்கு எதிரான முதல் டி20 போட்டியில் 21 ரன்கள் வித்தியாசத்தில் அபார வெற்றி பெற்ற நியூசிலாந்து அணி 1-0 என டி20 தொடரில் முன்னிலை வகிக்கிறது.

IND vs NZ, 1st T20I: New Zealand beat India by 21 runs, take 1-0 lead in series! (Image Source: Google)

இந்தியா - நியூசிலாந்து இடையேயான 3 டி20 போட்டிகள் கொண்ட தொடரின் முதல் போட்டி இன்று ராஞ்சியில் நடந்தது. இந்த போட்டியில் டாஸ் வென்ற இந்திய அணியின் கேப்டன் ஹர்திக் பாண்டியா ஃபீல்டிங்கை தேர்வு செய்தார்.

முதலில் பேட்டிங் ஆடிய நியூசிலாந்து அணியின் தொடக்க வீரர்கள் டெவான் கான்வே மற்றும் ஃபின் ஆலன் இணைந்து அதிரடியாக ஆடி முதல் விக்கெட்டுக்கு 4.2 ஓவரில் 43 ரன்கள் அடித்து நல்ல தொடக்கத்தை அமைத்து கொடுத்தனர். 23 பந்தில் 35 ரன்கள் அடித்து ஃபின் ஆலன் ஆட்டமிழந்தார். ஃபின் ஆலனை  அவுட்டாக்கி முதல் பிரேக்கை கொடுத்தார் வாஷிங்டன் சுந்தர். ஃபின் ஆலனை வீழ்த்திய அதே 5ஆவது ஓவரில் மார்க் சாப்மேனையும் டக் அவுட்டாக்கி அனுப்பினார் சுந்தர்.

ஆனால் நிலைத்து நின்று அதிரடியாக விளையாடிய தொடக்க வீரர் டெவான் கான்வே அரைசதம் அடித்தார். 35 பந்தில் 52 ரன்கள் அடித்து கான்வே அர்ஷ்தீப் சிங்கின் பவுலிங்கில் 18வது ஓவரில் ஆட்டமிழந்தார். அதே ஓவரில் மைக்கேல் பிரேஸ்வெல்லும் ரன் அவுட்டானார். அர்ஷ்தீப் சிங் வீசிய கடைசி ஓவரில் 3 சிக்ஸர்கள் மற்றும் ஒரு பவுண்டரி விளாசிய டேரைல் மிட்செல் 26 பந்தில் அரைசதம் அடித்தார். 30 பந்தில் 3 பவுண்டரிகள் மற்றும் 5 சிக்ஸர்களுடன் 59 ரன்களை குவித்து நியூசிலாந்து அணிக்கு இன்னிங்ஸை சிறப்பாக முடித்து கொடுக்க, 20 ஓவரில் 176 ரன்களை குவித்தது நியூசிலாந்து அணி.

இதையடுத்து 177 ரன்கள் என்ற சவாலான இலக்கை விரட்டிய இந்திய அணியின் டாப் 3 வீரர்களான இஷான் கிஷன் (4), ஷுப்மன் கில் (7), ராகுல் திரிபாதி (0) ஆகிய மூவரும் தொடக்கத்திலேயே ஆட்டமிழந்து ஏமாற்றமளித்தனர். அதன்பின்னர் அதிரடியாக ஆடி 34 பந்தில் 47 ரன்கள் அடித்து நம்பிக்கையளித்த சூர்யகுமார் யாதவும் அரைசதத்தை தவறவிட்டு ஆட்டமிழக்க, ஹர்திக் பாண்டியா(21), தீபக் ஹூடா(10) ஆகியோரும் ஏமாற்றமளித்தனர். 

ஆனால் ஒருமுனையில் நிலைத்து நின்று அடித்து ஆடிய வாஷிங்டன் சுந்தர் 25 பந்தில் 5 பவுண்டரிகள் மற்ரும் 3 சிக்ஸர்களுடன் அரைசதம் அடித்த நிலையிலும், அது இந்திய அணியின் வெற்றிக்கு உதவவில்லை. ஏனெனில் 20 ஓவர்கள் முடிவில் இந்திய அணியால் 9 விக்கெட் இழப்பிற்கு 155 ரன்கள் மட்டுமே அடிக்க முடிந்தது. நியூசிலாந்து தரப்பில் மைக்கேல் பிரேஸ்வெல், மிட்செல் சான்ட்னர், லோக்கி ஃபர்குசன் ஆகியோர் தலா 2 விக்கெட்டுகளைக் கைப்பற்றினர்.

இதன்மூலம் நியூசிலாந்து அணி 21 ரன்கள் வித்தியாசத்தில் இந்திய அணியை வீழ்த்தி அபார வெற்றியைப் பதிவுசெய்தது. இந்த வெற்றியின் மூலம் டி20 தொடரில் 1-0 என நியூசிலாந்து அணி முன்னிலை வகிக்கிறது.

Win Big, Make Your Cricket Tales Now